ചാമ്പ്യന്‍സ് ട്രോഫി; ഇന്ത്യ പാക്കിസ്ഥാനിലേക്കില്ല

ന്യൂഡല്‍ഹി | ചാമ്പ്യന്‍സ് ട്രോഫിയില്‍ പങ്കെടുക്കാനായി ഇന്ത്യന്‍ ക്രിക്കറ്റ് ടീം പാക്കിസ്ഥാനിലേക്ക് പോകില്ലെന്ന് വ്യക്തമാക്കി കേന്ദ്ര വിദേശകാര്യ വക്താവ് രണ്‍ധിര്‍ ജയ്‌സ്വാള്‍. ഇക്കാര്യത്തില്‍ ബി സി സി ഐയുടെ നിലപാട് ആവര്‍ത്തിക്കുകയായിരുന്നു രണ്‍ധിര്‍.

‘സുരക്ഷാ ആശങ്കകളുള്ളതിനാല്‍ ടീം പാക്കിസ്ഥാനിലേക്കില്ലെന്ന് വ്യക്തമാക്കി ബി സി സി ഐ പ്രസ്താവന പുറപ്പെടുവിച്ചിട്ടുണ്ട്.’- ഡല്‍ഹിയില്‍ വാര്‍ത്താ സമ്മേളനത്തില്‍ സംസാരിക്കവേ ജയ്‌സ്വാള്‍ പറഞ്ഞു.

2025 ഫെബ്രുവരി 19 മുതല്‍ മാര്‍ച്ച് ഒമ്പത് വരെയാണ് ചാമ്പ്യന്‍സ് ട്രോഫി ഷെഡ്യൂള്‍ ചെയ്തിട്ടുള്ളത്. 2023 ക്രിക്കറ്റ് ലോകകപ്പില്‍ ഉയര്‍ന്ന റാങ്കിലെത്തിയ എട്ട് ടീമുകളാണ് അന്താരാഷ്ട്ര ക്രിക്കറ്റ് കൗണ്‍സില്‍ സംഘടിപ്പിക്കുന്ന ടൂര്‍ണമെന്റില്‍ പങ്കെടുക്കുന്നത്. ചാമ്പ്യന്‍സ് ട്രോഫിയുടെ ഒമ്പതാം പതിപ്പാണ് ഫെബ്രുവരി 19 മുതല്‍ മാര്‍ച്ച് ഒമ്പത് വരെ നടക്കുക. പാക്കിസ്ഥാനാണ് നിലവിലെ ചാമ്പ്യന്മാര്‍.