ചന്ദ്രനെ തൊട്ടുരുമ്മി ചാന്ദ്രയാൻ; അവസാന ഭ്രമണപഥം താഴ്ത്തലും വിജയകരം

ബംഗളൂരു | ഇന്ത്യയുടെ അഭിമാന ചാന്ദ്ര ദൗത്യമായ ചാന്ദ്രയാൻ മൂന്ന് ചന്ദ്രന് തൊട്ടരികിലെത്തി. ഇന്ന് നടന്ന അവസാന ഭ്രമണപഥം താഴ്ത്തലും ഐ എസ് ആർ ഒ വിജയകരമായി പൂർത്തീകരിച്ചു. ഇതോടെ ചാന്ദ്രയാന്   153 കിലോമീറ്റർ X 163 കിലോമീറ്റർ വലിപ്പമുള്ള ചന്ദ്രന്റെ വൃത്താകൃതിയിലുള്ള ഭ്രമണപഥത്തിൽ പ്രവേശിച്ചു. നേരത്തെ ചന്ദ്രയാൻ 150 കിലോമീറ്റർ x 177 കിലോമീറ്റർ ഭ്രമണപഥത്തിലായിരുന്നു.

നാളെ, ആഗസ്റ്റ് 17 ചന്ദ്രയാന് വളരെ പ്രധാനപ്പെട്ട ദിവസമാണ്. ഈ ദിവസം, ലാൻഡറിൽ നിന്ന് ചന്ദ്രയാൻ -3 ന്റെ പ്രൊപ്പൽഷൻ മൊഡ്യൂളിനെ ഐഎസ്ആർഒ വേർപെടുത്തും. തുടർന്ന് ഓഗസ്റ്റ് 23 ന് വൈകുന്നേരം 05:30 ന് ലാൻഡർ ചന്ദ്രോപരിതലത്തിൽ ഇറങ്ങും.

Chandrayaan-3 Mission:

Today’s successful firing, needed for a short duration, has put Chandrayaan-3 into an orbit of 153 km x 163 km, as intended.

With this, the lunar bound maneuvres are completed.

It’s time for preparations as the Propulsion Module and the Lander Module… pic.twitter.com/0Iwi8GrgVR

— ISRO (@isro) August 16, 2023

22 ദിവസത്തെ യാത്രയ്‌ക്ക് ശേഷം ഓഗസ്റ്റ് 5 ന് വൈകുന്നേരം 7:15 നാണ് ചാന്ദ്രയാൻ ചന്ദ്രന്റെ ഭ്രമണപഥത്തിലെത്തിയത്. ചാന്ദ്രയാൻ ആദ്യമായി ചന്ദ്രന്റെ ഭ്രമണപഥത്തിൽ പ്രവേശിച്ചപ്പോൾ അതിന്റെ ഭ്രമണപഥം 164 കി.മീ x 18,074 കി.മീ ആയിരുന്നു. ഭ്രമണപഥത്തിൽ പ്രവേശിക്കുമ്പോൾ, അതിന്റെ ഓൺബോർഡ് ക്യാമറകൾ ചന്ദ്രന്റെ ചിത്രങ്ങൾ പകർത്തി അയച്ചിരുന്നു. ചന്ദ്രനിലെ ഗർത്തങ്ങൾ ഈ ചിത്രങ്ങളിൽ വ്യക്തമായി കാണാം.

ലാൻഡർ, റോവർ, പ്രൊപ്പൽഷൻ മൊഡ്യൂൾ എന്നിവയാണ് ചന്ദ്രയാനിലുള്ളത്. ലാൻഡറും റോവറും ചന്ദ്രന്റെ ദക്ഷിണധ്രുവത്തിൽ ഇറങ്ങി 14 ദിവസം പരീക്ഷണം നടത്തും. പ്രൊപ്പൽഷൻ മൊഡ്യൂൾ ചന്ദ്രന്റെ ഭ്രമണപഥത്തിൽ തങ്ങി ഭൂമിയിൽ നിന്ന് വരുന്ന വികിരണങ്ങളെ കുറിച്ച് പഠിക്കും. ഈ ദൗത്യത്തിലൂടെ ഐഎസ്ആർഒ ചന്ദ്രനിൽ ജലം തേടും.