ചാറ്റ് ജിപിടി: ഐ ഫോൺ ആപ്പ് പുറത്തിറക്കി; തുടക്കത്തിൽ യു എസിൽ മാത്രം; ആൻഡ്രോയിഡിൽ ഉടനെയെന്ന് ഓപ്പൺ എ ഐ

വെബ് ബ്രൗസറിൽ ഏത് വിഷയത്തിലും ചോദ്യങ്ങൾക്ക് ഉത്തരം നൽകാനും ഇമെയിലുകൾ ഡ്രാഫ്റ്റ് ചെയ്യാനും രചനകൾ നടത്താനും കഴിയുന്ന ഓൺലൈൻ ചാറ്റ്ബോട്ടായി ഇതിനകം കോടിക്കണക്കിന് ജനങ്ങളെ സ്വാധീനിച്ചു കഴിഞ്ഞ ചാറ്റ്ജിപിടി, ഐഫോണിനായുള്ള ചാറ്റ്ബോട്ടിന്റെ പുതിയ പതിപ്പ് ഇന്നലെ പുറത്തിറക്കി. സാൻ ഫ്രാൻസിസ്കോ ആസ്ഥാനമായി പ്രവർത്തിക്കുന്ന ആർട്ടിഫിഷ്യൽ ഇന്റലിജൻസ് ലാബായ ഓപ്പൺ എ ഐ കമ്പനി നവംബറിൽ ആരംഭിച്ച ചാറ്റ്ജിപിടിക്ക് ജനപ്രീതി വർദ്ധിപ്പിക്കുന്നതാവും പുതിയ ആപ്പ്.

ബ്രൗസർ അധിഷ്‌ഠിത പതിപ്പിൽ നിന്ന് വ്യത്യസ്തമായി, സ്‌മാർട്ട്‌ഫോൺ ആപ്പ് വോയ്‌സ് കമാൻഡുകളോട് പ്രതികരിക്കുന്നു എന്നതാണ് പ്രത്യേകത. ആപ്പിളിന്റെ സിരി ഡിജിറ്റൽ അസിസ്റ്റന്റ്, ആമസോണിന്റെ അലക്‌സാ പോലെയാണ് ഇത് പ്രവർത്തിക്കുന്നത്. അതേസമയം ആപ്പ് വോയ്‌സിലൂടെ ഉത്തരം നൽകുന്നില്ല, പക്ഷേ ടെക്സ്റ്റ് രൂപത്തിൽ പ്രതികരണങ്ങൾ നൽകും.

‘ആളുകളെ ശാക്തീകരിക്കുന്ന ഉപയോഗപ്രദമായ ഉപകരണങ്ങളെക്കുറിച്ചുള്ള ഗവേഷണം നടത്തിവരികയാണെന്നും തുടർച്ചയായി അവരെ കൂടുതൽ ഉപയോഗിക്കാൻ പ്രാപ്തമാക്കുകയുമാണെന്ന് ഓപ്പൺഎഐ വ്യക്തമാക്കി. കോടിക്കണക്കിന് ഐഫോൺ ഉപയോക്താക്കൾക്ക് സാങ്കേതികവിദ്യ വാഗ്ദാനം ചെയ്യുന്നതിലൂടെ, ടെക് വ്യവസായത്തിലെ ഭീമന്മാർക്കിടയിൽ സ്ഥാനം ഉറപ്പിക്കുന്നതിനാണ് ഓപ്പൺ എ ഐ കമ്പനി ശ്രമിക്കുന്നത്.

ചെറിയ നിർദ്ദേശങ്ങളെ അടിസ്ഥാനമാക്കി ടെക്‌സ്‌റ്റ്, ഇമേജുകൾ, മറ്റ് മീഡിയ എന്നിവ സൃഷ്‌ടിക്കാൻ കഴിയുന്ന സാങ്കേതികവിദ്യയായ ജനറേറ്റീവ് എഐ എന്ന് വിളിക്കപ്പെടുന്നതിന്റെ ഏറ്റവും ശക്തമായ പ്ലാറ്ഫോമാണ് ചാറ്റ്ജിപിടി. ഗൂഗിളും മൈക്രോസോഫ്റ്റും വിവിധ സ്റ്റാർട്ടപ്പുകളും സമാനമായ ബോട്ടുകൾ പുറത്തിറക്കുകയും അത്തരം സാങ്കേതികവിദ്യയെ വിപുലമായ ഓൺലൈൻ സേവനങ്ങളിലേക്ക് മാറ്റാൻ തുടങ്ങുകയും ചെയ്തു വരുന്നുണ്ട്. ഗൂഗിൾ സെർച്ച്, ബിംഗ് തുടങ്ങിയ ഇന്റർനെറ്റ് സെർച്ച് എഞ്ചിനുകൾ മുതൽ ജിമെയിൽ, ഔട്ട്‌ലുക്ക് പോലുള്ള ഇമെയിൽ പ്രോഗ്രാമുകൾ വരെ റീമേക്ക് ചെയ്യാനുള്ള ശക്തമായ മത്സരമാണ് നടക്കുന്നത്.

ചാറ്റ്ജിപിടി പുറത്തിറങ്ങിയത് മുതൽ, യാത്രയ്ക്കിടയിലും മറ്റും സൗകര്യപ്രദമായി ഉപയോഗിക്കാൻ ആപ്പ് വേണമെന്ന ആവശ്യം ഉയർന്നിരുന്നു. പുതിയ ആപ്പ് ചാറ്റ്ജിപിടി സേവനം സൗജന്യമായി നൽകുകയും ഉപകരണങ്ങളിലുടനീളം നിങ്ങളുടെ ചാറ്റ് ഹിസ്റ്ററി നൽകുകയും ചെയ്യും. ചാറ്റ്ജിപിടി പ്ലസ് സബ്‌സ്‌ക്രൈബർമാർക്ക് ജിപിടി-4-ന്റെ എക്‌സ്‌ക്ലൂസീവ് ആക്‌സസ് എന്നിവയെല്ലാം iOS-ൽ ലഭിക്കും.

ഇപ്പോൾ യുഎസിൽ മാത്രമാണ് തങ്ങളുടെ റോൾഔട്ട് ആരംഭിക്കുന്നതെന്നും വരും ആഴ്ചകളിൽ കൂടുതൽ രാജ്യങ്ങളിലേക്ക് വ്യാപിപ്പിക്കുമെന്നും കമ്പനി വ്യക്തമാക്കി. ‘ആൻഡ്രോയിഡ് ഉപയോക്താക്കളേ, നിങ്ങളാണ് അടുത്തത്! ചാറ്റ്ജിപിടി ഉടൻ നിങ്ങളുടെ ഉപകരണങ്ങളിലേക്ക് വരും.’ കമ്പനി വ്യക്തമാക്കുന്നു.

പണം സമ്പാദിക്കുന്ന ആപ്പുകൾ

അതേസമയം ചാറ്റ്‌ജിപിടി അധിഷ്‌ഠിത ചാറ്റ്‌ബോട്ട് സേവനം നൽകുന്നു എന്ന വ്യാജേന എത്തുന്ന ആപ്പുകൾ ഉപയോക്താക്കളിൽ നിന്ന് ധാരാളം പണം സമ്പാദിക്കുന്നതായി സൈബർ സുരക്ഷാ സ്ഥാപനമായ സോഫോസ് കണ്ടെത്തി. ‘ചാറ്റ് ജിബിടി’ ആണെന്ന ധാരണ ഉണ്ടാക്കുന്ന നിരവധി ആപ്പുകൾ ഗൂഗിൾ പ്ലേയിലും ആപ്പ് സ്റ്റോറിലും പ്രത്യക്ഷപ്പെടുന്നുണ്ട്.

ഓപ്പൺ എ ഐ നിർമിച്ച ചാറ്റ്‌ജിപിടി ഉപയോക്താക്കൾക്ക് അടിസ്ഥാന സേവനം ഓൺലൈനിലും ഇപ്പോൾ അമേരിക്കയിലെ വരിക്കാർക്ക് ഐ ഫോണിലും സൗജന്യമായി നൽകുമ്പോൾ, അതിന്റെ പകർപ്പുകളായി പ്രത്യക്ഷപ്പെടുന്ന ആപ്പുകൾ പ്രതിമാസം 10 മുതൽ 70.00 ഡോളർ വരെ വാർഷിക വരിസംഖ്യ ഈടാക്കുന്നുണ്ട്. റിപ്പോർട്ട് വ്യക്തമാക്കി. ഉപയോക്താക്കൾ പണമടച്ചുള്ള പതിപ്പിലേക്ക് മാറിയതിന് ശേഷവും ആപ്പ് ഫംഗ്‌ഷൻ പലപ്പോഴും അനുയോജ്യമല്ല. വ്യാജ അവലോകനങ്ങളിലൂടെയും ആപ്പ് ഉപയോഗിക്കുന്നതിന് മുമ്പോ സൗജന്യ ട്രയൽ അവസാനിക്കുന്നതിന് മുമ്പോ അത് റേറ്റുചെയ്യാനുള്ള നിരന്തരമായ അഭ്യർത്ഥനകളും മറ്റും നടത്തി റേറ്റിംഗ് വർദ്ധിപ്പിക്കാൻ ശ്രമിക്കുകയാണെന്നും പഠനത്തിലുണ്ട്.