ചാറ്റൽ

അടച്ചിട്ട മുറികളിലെ
വാതിൽപഴുതിലൂടെ
അവസരം കാത്ത്
കിടക്കുന്നവരിലേക്ക്
നിങ്ങളയക്കുന്ന ഒളിയമ്പ്
ചിരിയുടെ ഇമോജിയിൽ
തുടങ്ങി ചുംബന
ഇമോജികളിലേക്ക്
മൗനമായി നിങ്ങളെറിയുന്ന ചൂണ്ട

അർധരാത്രികളിൽ
വിരൽതുമ്പിലൊളിപ്പിച്ച്
വരുന്ന പ്രണയം പുരട്ടിയ
വാക്കുകളിൽ കോർത്ത്
പോയവരുടെ പിടച്ചിൽ
ചൂണ്ടയിൽ കുടുങ്ങിയാൽ
വലിച്ചെടുത്ത് ഇരയോടൊപ്പം
ചേർക്കും
ആവേശത്തോടെ ഓടിയടുത്ത്
ചൂണ്ട മുനയിൽ പിടയുന്ന
തേങ്ങലുകൾക്ക്
ഒരേ ഭാവം
പ്രണയച്ചാലുകൾ
കാമത്തിന്റെ കുത്തൊഴുക്കിലേക്ക്
വഴിതിരിച്ചു വിടുന്ന
ചൂണ്ടക്കാരന്റെ കൗശലം
തീറെഴുതിക്കിട്ടിയ കൃഷിഭൂമി പോലെ ഉടൽ പറമ്പിൽ ക്യാമറക്കണ്ണൂകൾ കൊത്തിവലിക്കുമ്പോഴുള്ള രോദനം
ചൂണ്ടക്കാരും ഇരകളും ആവർത്തിക്കുന്ന ചിത്രങ്ങളായി
മടുപ്പിക്കാത്ത യാത്രയിലാണ്
കാഴ്ചക്കാർ ക്യൂവിലാണ്.