പ്രണയ ദിനത്തില്‍ വാര്‍ത്തകളെ പ്രണയിച്ച് കോളജ് വിദ്യാര്‍ഥികള്‍

മാവൂര്‍ | പ്രണയ ദിനത്തില്‍ വാര്‍ത്തകളെ പ്രണയിച്ച് കേരളത്തിലെ വിവിധ കോളജുകളില്‍ നിന്നുള്ള വിദ്യാര്‍ഥികള്‍ മാവൂരില്‍ ഒത്തുകൂടി. മാവൂര്‍ മഹ്‌ളറ ആര്‍ട്‌സ് ആന്‍ഡ് സയന്‍സ് കോളജില്‍ വാലന്‍ഡൈന്‍സ് ഡേയില്‍ സംഘടിപ്പിച്ച കിസ് ടു ക്വിസ് എന്ന പരിപാടിയില്‍ പങ്കെടുക്കാനാണ് വിവിധ കലാലയങ്ങളില്‍ നിന്നുള്ളവര്‍ എത്തിയത്.

ഐ ലവ് ന്യൂസ് എന്ന പ്രമേയത്തില്‍ സംഘടിപ്പിച്ച ഇന്റർ കോളേജിയേറ്റ് ക്വിസ് മെഗാ കോമ്പറ്റീഷന്‍ സിറാജ് ന്യൂസ് എഡിറ്റര്‍ മുസ്തഫ പി എറയ്ക്കല്‍ ഉദ്ഘാടനം ചെയ്തു. വാര്‍ത്തകള്‍ക്കൊപ്പം തങ്ങളുടെ നിലപാടുകളും കാഴ്ചപ്പാടുകളും ഓരോ മാധ്യമങ്ങളും വെളിപ്പെടുത്താറുണ്ടെന്നും ഇതുകൂടെ വായിക്കാന്‍ കഴിയുമ്പോഴെ യഥാര്‍ഥ വായനക്കാരാകാന്‍ നമ്മുക്ക് സാധിക്കൂവെന്നും അദ്ദേഹം വ്യക്തമാക്കി.

ഹജ്ജ് കമ്മിറ്റി അസി. സെക്രട്ടറിയും മഹ്‌ളറ ഗ്രൂപ്പ് ഓഫ് ഇന്‍സിറ്റിറ്റ്യൂഷന്‍ സെക്രട്ടറിയുമായ എന്‍ മുഹമ്മദ് അലി മുഖ്യപ്രഭാഷണം നടത്തി. കോളജ് പ്രിന്‍സിപ്പല്‍ ഒ മുഹമ്മദ് സ്വാലിഹ് മുക്കം അധ്യക്ഷത വഹിച്ചു.

വാര്‍ത്തകളുമായി ബന്ധപ്പെട്ട് നടത്തിയ ക്വിസ് മത്സരത്തില്‍ കൈതപ്പൊയില്‍ ലിസാ കോളജിലെ നന്ദന വി, മിഥുന്‍ എന്നിവര്‍ ചാമ്പ്യന്മാരായി. ദാറുന്നജാത് അറബിക് കോളജ് വിദ്യാര്‍ഥികളായ മുഹമ്മദ് ഷഹീന്‍, അംജദ് ഖാന്‍ എന്നിവര്‍ക്ക് രണ്ടാം സ്ഥാനവും ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റിയിലെ മുഹമ്മദ് ഷഹീം, മുഹമ്മദ് അന്‍സാരി മൂന്നാം സ്ഥാനവും നേടി.

ലവ് അറ്റ് ഫസ്റ്റ് സൈറ്റ്, പ്രപ്പോസല്‍, കമ്മിറ്റഡ്, ഹു ഡു ഐ ലവ്, ലവ് ലെറ്റര്‍ എന്നിങ്ങനെ വ്യത്യസ്തമായ റൗണ്ടുകളിലാണ് മത്സരം സംഘടിപ്പിച്ചത്. വിജയികള്‍ക്ക് മെട്രോ ജേര്‍ണല്‍ സ്‌പോണ്‍സര്‍ ചെയ്ത ട്രോഫിയും സര്‍ട്ടിഫിക്കറ്റും പ്രൈസ് മണിയും രതി, നിഷിത, സൗമ്യ, റിഷാദ്, ഗോകുല്‍ എന്നിവര്‍ വിതരണം ചെയ്തു. ജംഷീര്‍ സ്വാഗതവും നഹാന്‍ നന്ദിയും പറഞ്ഞു.