ഏഴാം ക്ലാസ് വിദ്യാര്‍ഥിയെ തട്ടിക്കൊണ്ടുപോയി മദ്യം കുടിപ്പിച്ച ശേഷം മര്‍ദ്ദിച്ചതായി പരാതി

പത്തനംതിട്ട | അടൂരില്‍ ഏഴാം ക്ലാസ് വിദ്യാര്‍ഥിയെ തട്ടിക്കൊണ്ടുപോയി മദ്യം കുടിപ്പിച്ച ശേഷം മര്‍ദ്ദിച്ചതായി പരാതി. രാത്രി ഒമ്പതു മണിയോടെ കുഞ്ഞിനെ തട്ടിക്കൊണ്ടു പോവുകയായിരുന്നുവെന്ന കുട്ടിയുടെ അച്ഛന്റെ പരാതിയില്‍ പോലീസ് അന്വേഷണം ആരംഭിച്ചു.

കുട്ടിയെ ബലമായി വായ തുറന്ന് മദ്യം കുടിപ്പിച്ചശേഷം ക്രൂരമായി മര്‍ദിക്കുകയായിരുന്നു. ആടിക്കുഴഞ്ഞാണ് മകന്‍ വന്നത്. തുടര്‍ന്നാണ് കുട്ടി മര്‍ദനമേറ്റ വിവരം പറഞ്ഞതെന്നും അച്ഛന്‍ പറഞ്ഞു. ഉടനെ തന്നെ ആശുപത്രിയിലെത്തിക്കുകയായിരുന്നു. സമീപത്തെ വീടിന്റെ അരികില്‍ ഉപേക്ഷിച്ചശേഷം കടന്നുകളയുകയായിരുന്നു. പ്ലസ് വണ്‍ വിദ്യാര്‍ഥിയായ കുട്ടിയുടെ സഹോദരനെ തേടിയാണ് സംഘം എത്തിയതെന്നും അവനെ കിട്ടാത്തതിനെ തുടര്‍ന്ന് അനുജനെ തട്ടിക്കൊണ്ടുപോയി മര്‍ദ്ദിക്കുകയായിരുന്നുവെന്നും അച്ഛന്‍ പറഞ്ഞു.

സഹോദരനായ പ്ലസ് വണ്‍ വിദ്യാര്‍ഥി മറ്റു വിദ്യാര്‍ഥികളുമായി തര്‍ക്കമുണ്ടായിരുന്നു. ഈ തര്‍ക്കം പ്രിന്‍സിപ്പല്‍ ഇടപെട്ട് പരിഹരിച്ചിരുന്നു. എന്നാല്‍, തര്‍ക്കത്തില്‍ ഏര്‍പ്പെട്ട വിദ്യാര്‍ഥികളുടെ ബന്ധുക്കളായ യുവാക്കളാണ് വീട്ടിലെത്തി ഏഴാം ക്ലാസുകാരനെ തട്ടിക്കൊണ്ടുപോയതെന്നാണ് പരാതി. കുട്ടിയുടെയും അച്ഛന്റെയും മൊഴി പോലീസ് രേഖപ്പെടുത്തി. കൂടുതല്‍ അന്വേഷണങ്ങള്‍ക്കുശേഷമെ ആരാണ് മര്‍ദിച്ചതെന്ന് വ്യക്തമാകുകയുള്ളുവെന്ന് പോലീസ് പറഞ്ഞു.