വളാഞ്ചേരിയില്‍ വീട്ടില്‍ അതിക്രമിച്ച് കയറി യുവതിയെ കൂട്ടബലാത്സംഗം ചെയ്‌തെന്ന പരാതി; മൂന്ന് പേര്‍ കസ്റ്റഡിയില്‍

മലപ്പുറം|മലപ്പുറം വളാഞ്ചേരിയില്‍ വീട്ടില്‍ അതിക്രമിച്ച് കയറി യുവതിയെ കൂട്ടബലാത്സംഗം ചെയ്‌തെന്ന പരാതിയില്‍ മൂന്ന് പേര്‍ കസ്റ്റഡിയില്‍. ഞായറാഴ്ച രാത്രി വീട്ടില്‍ അതിക്രമിച്ചു കടന്ന് മൂന്നംഗസംഘം ബലാത്സംഗം ചെയ്തെന്നാണ് യുവതി വളാഞ്ചേരി പോലീസില്‍ പരാതി നല്‍കിയത്. പത്തനംതിട്ടയില്‍ ജോലി ചെയ്യുന്ന യുവതി ബന്ധുവിന്റെ വീട്ടില്‍ കഴിയുമ്പോഴാണ് ആക്രമണമുണ്ടായത്. പിടിയിലായവര്‍ വളാഞ്ചേരി സ്വദേശികളാണെന്ന് പോലീസ് പറഞ്ഞു. പീടികപടി സ്വദേശികളായ സുനില്‍, ശശി, പ്രകാശന്‍ എന്നിവരാണ് പിടിയിലായത്.

സംഭവത്തിനുശേഷം കടുത്ത മാനസിക സമ്മര്‍ദത്തിലായിരുന്ന യുവതിയോട് സുഹൃത്തുക്കള്‍ വിവരങ്ങള്‍ ചോദിച്ചപ്പോഴാണ് വിവരം പുറത്തറിഞ്ഞത്. പിന്നീട് സുഹൃത്തുക്കളാണ് വിവരം പോലീസില്‍ അറിയിച്ചത്.

യുവതിയുടെ പരാതിയുടെ അടിസ്ഥാനത്തില്‍ പോാലീസ് കേസെടുത്തു. തുടര്‍ന്ന് പോലീസ് നടത്തിയ അന്വേഷണത്തിലാണ് മൂന്നുപേരെ കസ്റ്റഡിയിലെടുത്തത്. തിരൂര്‍ ഡി വൈ എസ് പി പി.പി ഷംസുവിനാണ് അന്വേഷണ ചുമതല. സംഭവത്തെ കുറിച്ച് കൂടുതല്‍ വിവരങ്ങള്‍ ലഭിച്ചതിനുശേഷം അറസ്റ്റിലേക്ക് കടക്കുമെന്ന് അധികൃതര്‍ വ്യക്തമാക്കി.