കെ കരുണാകരന്റെ മക്കളെ കോണ്‍ഗ്രസിന് വേണ്ട, മുരളീധരന് അത് വൈകാതെ മനസിലാകും :പത്മജ വേണുഗോപാല്‍

പത്തനംതിട്ട | കെ കരുണാകരന്റെ മക്കളെ കോണ്‍ഗ്രസിന് വേണ്ടെന്നും മുരളീധരന് അത് വൈകാതെ മനസ്സിലാകുമെന്നും പത്മജ വേണുഗോപാല്‍. മുരളീധരന് വേണ്ടി പരവതാനി വിരിച്ചിട്ടാണ് താന്‍ ബിജെപിയിലേക്ക് വന്നതെന്നും പത്മജ പറഞ്ഞു. പത്തനംതിട്ടയില്‍ എന്‍ഡിഎ തെരഞ്ഞെടുപ്പ് പൊതുസമ്മേളനത്തില്‍ പ്രധാനമന്ത്രി നരേന്ദ്രമോദി എത്തുന്നതിന് മുന്നോടിയായി സംസാരിക്കുകയായിരുന്നു പത്മജ.

ഈ തെരഞ്ഞെടുപ്പ് കഴിയുന്നതോടെ എഐസിസി ആസ്ഥാനം അടച്ചു പൂട്ടുമെന്നും കോണ്‍ഗ്രസ് നശിച്ച് താഴെത്തട്ടില്‍ എത്തിയെന്നും പത്മജ കുറ്റപ്പെടുത്തി. കോണ്‍ഗ്രസില്‍ വനിതകള്‍ക്ക് വേദികളില്‍ ഒരിക്കലും സ്ഥാനമുണ്ടായിരുന്നില്ലെന്നും 50 വയസ്സില്‍ താഴെയുള്ള വനിതകള്‍ കോണ്‍ഗ്രസില്‍ ഇപ്പോള്‍ കുറവാണെന്നും പദ്മജ പറഞ്ഞു. അതേസമയം ബിജെപി വേദിയില്‍ തനിക്ക് അംഗീകാരം കിട്ടിയെന്നും തനിക്കൊപ്പം നിരവധി വനിതകളും ഉണ്ടായിരുന്നെന്നും അവര്‍ പറഞ്ഞു.

പണ്ട് കോണ്‍ഗ്രസില്‍ രണ്ട് ഗ്രൂപ്പുകളാണ് ഉണ്ടായിരുന്നതെങ്കില്‍ ഇന്ന് ഓരോ വ്യക്തിയും ഓരോ ഗ്രൂപ്പാണെന്നും പത്മജ കുറ്റപ്പെടുത്തി.