സി പി എം സ്ലീപിങ് സെല്ലുകള്‍ സമുദായത്തിനകത്ത് പ്രവര്‍ത്തിക്കുന്നു: കെ എം ഷാജി

കോഴിക്കോട് | സി പി എമ്മിന്റെ സ്ലീപിങ് സെല്ലുകള്‍ സമുദായത്തിനകത്ത് പ്രവര്‍ത്തിക്കുന്നുണ്ടെന്ന് മുസ്ലിം ലീഗ് നേതാവ് കെ എം ഷാജി. ഏതു കൊമ്പത്തുള്ളയാളായാലും സി പി എമ്മും മാര്‍ക്സിസവും കൊള്ളാമെന്നു കരുതുന്നവര്‍ക്ക് അങ്ങോട്ടു പോകാമെന്നും സമുദായത്തെ അവിടേക്കു കൊണ്ടുപോകാമെന്ന് ആരും കരുതേണ്ടെന്നും ഷാജി പറഞ്ഞു. മലപ്പുറം വളാഞ്ചേരിയില്‍ മുസ്ലിം ലീഗ് സമ്മേളനത്തില്‍ സംസാരിക്കുകയായിരുന്നു കെ എം ഷാജി.

ഇ കെ വിഭാഗം സമസ്ത നേതാവ് മുക്കം ഉമര്‍ ഫൈസിയുടെ പാണക്കാട് സാദിഖലി ശിഹാബ് തങ്ങള്‍ക്കെതിരായ പരാമര്‍ശത്തിനെതിരെ ആഞ്ഞടിക്കുകയായിരുന്നു കെ എം ഷാജി. സാദിഖലി തങ്ങളെ ഒറ്റതിരിഞ്ഞ് അക്രമിക്കാമെന്ന് ആരും കരുതേണ്ട. ഉമര്‍ ഫൈസിക്കെതിരെ നടപടി വേണമെന്നും ഷാജി ആവശ്യപ്പെട്ടു.

ഇ കെ വിഭാഗം സമസ്തക്കാര്‍ മാത്രമല്ല, മറ്റു സംഘടനകളിലുമുള്ളവര്‍ക്കും കൂടിയുള്ളതാണ് ലീഗ്. സമുദായത്തിന്റെ ആകെ നേതൃത്വമാണ് പാണക്കാട് കുടുംബം. എല്ലാ മത സമുദായങ്ങളെയും ഒരുമിപ്പിക്കുന്ന നേതൃത്വമാണ് അവര്‍. ഇ കെ വിഭാഗം സമസ്ത പരന്നുകിടക്കുന്ന വലിയൊരു ആശയമാണ്.

എല്ലാവരെയും ഉള്‍ക്കൊള്ളുന്ന വിശാലമായ ഐക്യസംഘമാണത്. അതിനു മുകളിലാണ് പാണക്കാട് സയ്യിദുമാര്‍ ഇരിക്കുന്നത്. ഞങ്ങള്‍ പടയാളികളെപ്പോലെ പൊരുതി ഇവിടെ നില്‍ക്കുമെന്നും ഷാജി പറഞ്ഞു.