സി പി എം പ്രവർത്തന റിപ്പോർട്ടിൽ സെക്രട്ടറിയേറ്റ് അംഗങ്ങൾക്ക് വിമർശം

കൊച്ചി | സെക്രട്ടേറിയറ്റ് പൊതുവിൽ മികച്ച പ്രവർത്തനം കാഴ്ചവെക്കുന്നുണ്ടെങ്കിലും ചില അംഗങ്ങൾ ഉത്തരവാദിത്വങ്ങൾ നിർവഹിക്കുന്നില്ലെന്നും സി പി എമ്മിൽ വിമർശം. സി പി എം സംസ്ഥാന സമ്മേളനത്തിൽ അവതരിപ്പിച്ച പ്രവർത്തന റിപ്പോർട്ടിലാണ് സെക്രട്ടേറിയറ്റ് അംഗങ്ങൾക്ക് വിമർശം. എറണാകുളം ജില്ലാ സമ്മേളനം മറ്റു സമ്മേളനങ്ങളുടെ ശോഭ കെടുത്തിയെന്നും വിമർശമുണ്ട്.

സെക്രട്ടേറിയറ്റ് അംഗങ്ങളായ മന്ത്രിമാർ തലസ്ഥാനത്തുണ്ടെങ്കിലും അവൈലബിൾ സെക്രട്ടേറിയറ്റ് യോഗത്തിൽ പങ്കെടുക്കുന്നില്ലെന്നും ഇനി മുതൽ യോഗത്തില്‍ പങ്കെടുക്കാൻ ശ്രദ്ധിക്കണമെന്നും റിപ്പോർട്ടിൽ പറയുന്നു.  എറണാകുളം മുൻ ജില്ലാ കമ്മറ്റി അംഗം പി എൻ ബാലകൃഷ്ണന്‍ പരസ്യവിമർശനവുമായി സമ്മേളനത്തിൽനിന്ന് ഇറങ്ങിപ്പോയത് ഒഴിവാക്കണമായിരുന്നു. ജില്ലാ സെക്രട്ടറി സി എൻ മോഹനനും വിമർശനമുണ്ട്. തിരഞ്ഞെടുപ്പു പരാജയത്തിന്റെ പേരിൽ സെക്രട്ടറി നടപടി മയപ്പെടുത്തി. ചിലരോട് പക്ഷപാതിത്വം കാട്ടി. ശരിയായ നടപടിയെടുക്കാൻ സംസ്ഥാന നേതൃത്വം ഇടപെടേണ്ടി വന്നെന്നും റിപ്പോർട്ടിൽ പറയുന്നു.