വയോധികയുടെ മരണം; നിര്‍ത്താതെപോയ വാഹനം അഞ്ചുമാസത്തിനു ശേഷം ഹൈദരാബാദില്‍ കണ്ടെത്തി

കോട്ടയം | വയോധിക വാഹനാപകടത്തില്‍ മരിച്ച സംഭവത്തില്‍ നിര്‍ത്താതെ പോയ വാഹനം അഞ്ച് മാസത്തിന് ശേഷം ഹൈദരാബാദില്‍ കണ്ടെത്തി പോലീസ്.

ഡിസംബര്‍ 15 നാണ് കോരുത്തോട് പനക്കച്ചിറയില്‍ തങ്കമ്മ (88)യെ ഇടിച്ചിട്ട് വാഹനം നിര്‍ത്താതെ പോയത്. ശബരിമല തീര്‍ഥാടകരുടെ വാഹനം ഇടിച്ചാണ് തങ്കമ്മ മരിച്ചതെന്ന് വ്യക്ത മായിരുന്നു.എന്നാല്‍ നിര്‍ത്താതെ പോയ വാഹനം കണ്ടെത്താന്‍ സാധിച്ചിരുന്നില്ല.
കേസ് അന്വേഷണം തുടര്‍ന്ന മുണ്ടക്കയം പോലീസ് ഇതിനായി 2000ത്തിലേറെ സി സി ടി വികള്‍ പരിശോധിച്ചു. മൂന്നാറില്‍ നിന്ന് ലഭിച്ച ഒരു ദൃശ്യത്തിനു പിന്നാലെ പോയ പോലീസ് ഒടുവില്‍ ഹൈദരാബാദില്‍ നിന്ന്‌വാഹനം കണ്ടെത്തി.

വാഹനം വാടകയ്ക്ക് കൊടുത്തതാണെന്ന ഉടമയുടെ മൊഴിയുടെ അടിസ്ഥാനത്തില്‍ അപകടത്തിന് കാരണക്കാരനായ ഡ്രൈവറെ തിരിച്ചറിഞ്ഞു. തുടര്‍ന്ന് കരിംനഗര്‍ വചുനൂര്‍ സ്വദേശി കെ ദിനേശ് റെഡ്ഡിയെ പൊലീസ് കസ്റ്റഡിയിലെടുത്തു. ദിനേശ് റെഡ്ഡിയുടെ അറസ്റ്റ് രേഖപ്പെടുത്തിയ ശേഷം കോടതിയില്‍ ഹാജരാക്കും. മനപ്പൂര്‍വമല്ലാത്ത നരഹത്യക്ക് പ്രതിക്കെതിരെ കേസെടുത്തിട്ടുണ്ട്. സംഭവത്തില്‍ മുണ്ടക്കയം പോലീസിന്റെ ആത്മാര്‍ഥമായ അന്വേഷണം പ്രശംസിക്കപ്പെടുകയാണ്.