അനധികൃത സ്വത്ത് സമ്പാദന കേസ്: കോണ്‍ഗ്രസ്സ് നേതാവ് കെ ബാബു എം എല്‍ എക്ക് തിരിച്ചടി

കൊച്ചി | അനധികൃത സ്വത്തുസമ്പാദന കേസില്‍ കോണ്‍ഗ്രസ്സ് നേതാവ് കെ ബാബു എം എല്‍ എക്കെതിരെ ഇ ഡി കുറ്റപത്രം സമര്‍പ്പിച്ചു. 2007 ജൂലായ് മുതല്‍ 2016 മെയ് വരെയുള്ള കാലയളവില്‍ മന്ത്രിയായിരിക്കെ അനധികൃതമായി സ്വത്ത് സമ്പാദിച്ചെന്ന പരാതിയിലാണ് കുറ്റപത്രം.

കെ ബാബു അനധികൃതമായി 25 ലക്ഷം രൂപയുടെ സ്വത്ത് സമ്പാദിച്ചെന്ന് വ്യക്തമാക്കിക്കൊണ്ടാണ് ഇ ഡി അന്വേഷണം പൂര്‍ത്തിയാക്കി കൊച്ചി പി എം എല്‍ എ കോടതിയില്‍ കുറ്റപത്രം സമര്‍പ്പിച്ചത്. നിലവില്‍ എം എല്‍ എയായ കെ ബാബുവിനെതിരെ വിജിലന്‍സ് നേരത്തെ അനധികൃത സ്വത്ത് സമ്പാദനക്കേസ് എടുത്തിരുന്നു. ഇതിന് പിന്നാലെയാണ് ഇ ഡി അന്വേഷണം നടത്തിയത്.

കേസുമായി ബന്ധപ്പെട്ട് കെ ബാബുവിന്റെ 25.82 ലക്ഷം രൂപയുടെ സ്വത്ത് എന്‍ഫോഴ്സ്മെന്റ് ഡയറക്ടറേറ്റ് കണ്ടുകെട്ടിയിരുന്നു. 25.82 ലക്ഷം രൂപയുടെ അധികസ്വത്ത് കെ ബാബുവിനുണ്ടെന്ന് വ്യക്തമാക്കി വിജിലന്‍സും കുറ്റപത്രം സമര്‍പ്പിച്ചിരുന്നു.

ഇ ഡി അന്വേഷണത്തിന് എതിരെ നേരത്തെ കെ ബാബു ഹൈക്കോടതിയെയും സുപ്രീം കോടതിയെയും സമീപിച്ചിരുന്നെങ്കിലും തിരിച്ചടിയായിരുന്നു ഫലം. ഇഡി കുറ്റപത്രം സമര്‍പ്പിച്ചതോടെ കെ ബാബു എം എല്‍ എ വിചാരണ നേരിടേണ്ടിവരും.