കെ എസ് ആര്‍ ടി സി ബസുകള്‍ക്ക് ഇനി ജില്ല തിരിച്ചുള്ള നമ്പര്‍ സിസ്റ്റം

പത്തനംതിട്ട | കെ എസ് ആര്‍ ടി സി ബസുകള്‍ക്ക് ഇനി ജില്ല തിരിച്ചുള്ള നമ്പര്‍ സിസ്റ്റം. ജില്ലാ അടിസ്ഥാനത്തില്‍ സീരിയല്‍ നമ്പര്‍ നല്‍കുന്നതിന് വേണ്ടി നിലവിലുള്ള ബോണറ്റ് നമ്പര്‍ ഒഴിവാക്കാതെ അതിനൊപ്പം ബസിന്റെ ഇടത് ഭാഗത്തായി ഓരോ ജില്ലക്കും രണ്ട് അക്ഷരങ്ങള്‍ കൂടെ ഉള്‍പ്പെടുത്തി ഇംഗ്ലീഷ് അക്ഷരങ്ങള്‍ കൂട്ടിച്ചേര്‍ത്ത് നമ്പര്‍ അനുവദിച്ചു.

തിരുവനന്തപുരം- TV, കൊല്ലം- KL, പത്തനംതിട്ട- PT, ആലപ്പുഴ- AL കോട്ടയം- KT, ഇടുക്കി- ID, എറണാകുളം- EK , തൃശൂര്‍- TR , പാലക്കാട്- PL , മലപ്പുറം- ML, കോഴിക്കോട്- KK, വയനാട്- WN, കണ്ണൂര്‍- KN , കാസര്‍കോട്- KG എന്നിങ്ങനെയുള്ള ഇംഗ്ലീഷ് അക്ഷരങ്ങള്‍ക്കൊപ്പം ബസുകളുടെ കാലപ്പഴക്കത്തിന് അനുസരിച്ച് 1 മുതലുള്ള നമ്പറുകളും നല്‍കും. ഇനി മുതല്‍ നിലവില്‍ രേഖപ്പെടുത്തിയിരുന്ന ഡിപ്പോ കോഡ് രേഖപ്പെടുത്തില്ല. ജന്റം ബസുകളില്‍ JN സീരിയലില്‍ ഉള്ള ബോണറ്റ് നമ്പറുകള്‍ വലത് വശത്തും, സിറ്റി സര്‍ക്കുലര്‍ (CC), സിറ്റി ഷട്ടില്‍ (CS) എന്നീ അക്ഷരങ്ങള്‍ ഇടത് വശത്തും പതിക്കുകയും ചെയ്യും.

മൂന്ന് മാസം മുതല്‍ ആറ് മാസം വരെ പ്രിവന്റീവ് മെയിന്റനന്‍സ് (കൃത്യമായ ഇടവേളകളില്‍ പരിശോധനകള്‍ നടത്തി സര്‍വീസിന് വേണ്ടി സജ്ജമാക്കല്‍) ചെയ്യുന്നതിന്റെ ഭാഗമായി ഓരോ ഡിപ്പോയില്‍ നിന്നും ബസുകള്‍ ജില്ലാ പൂളിലേക്ക് പിന്‍വലിക്കുകയും, സര്‍വീസിന് വേണ്ടി പകരം ബസുകള്‍ ജില്ലാ പൂളില്‍ നിന്നും കൊടുക്കുകയും ചെയ്യും. ഏതെങ്കിലും ഡിപ്പോയില്‍ ഡ്രൈവര്‍മാര്‍ക്കോ യാത്രക്കാര്‍ക്കോ താത്പര്യമുള്ള ബസുകള്‍, മറ്റുള്ള സ്ഥാപനങ്ങള്‍ സ്‌പോണ്‍സണ്‍ ചെയ്തിട്ടുള്ള ബസുകള്‍, ബസ് ഓണ്‍ ഡിമാന്‍ഡ്, ടൂറിസം എന്നിവക്ക് ഉപയോഗിക്കുന്ന ബസുകള്‍ എന്നിവ അതാത് ഡിപ്പോകളില്‍ തന്നെ നിലനിര്‍ത്തും. അല്ലാതെയുള്ള ബസുകളുടെ സാധാരണ നമ്പറുകള്‍ ഒഴിവാക്കി ജില്ലാ പൂളിന്റെ ഭാഗമാക്കും. ഈ ബസുകളുടെ മെയിന്റിനന്‍സ് കഴിഞ്ഞാല്‍ തിരികെ ഡിപ്പോകള്‍ക്ക് നല്‍കുകയും ചെയ്യും. ബ്രേക്ക് ഡൗണ്‍ സമയത്തും, തിരക്കുള്ള സമയങ്ങളിലും ജില്ലാ പൂളില്‍ നിന്നും ഈ ബസുകള്‍ സര്‍വീസിനായി നല്‍കും.