ദേശീയ ദിനാഘോഷം അതിരുകടക്കരുത്

ദുബൈ|ദേശീയ ദിനാഘോഷത്തിന് ക്രമരഹിതമായ മാര്‍ച്ചുകളോ ഒത്തുചേരലുകളോ പാടില്ലെന്ന് യു എ ഇ ആഭ്യന്തര മന്ത്രാലയം. റോഡില്‍ വാഹനങ്ങള്‍ കൊണ്ട് അഭ്യാസ പ്രകടനം നടത്തുകയോ ഗതാഗതം തടസ്സപ്പെടുത്തുകയോ ചെയ്യരുത്. ഡിസംബര്‍ രണ്ടിനാണ് ഈദ് അല്‍ ഇത്തിഹാദ്. ആഘോഷങ്ങള്‍ രാജ്യത്തിന്റെ പല ഭാഗങ്ങളിലും തുടങ്ങിയിട്ടുണ്ട്. എല്ലാ നിയമങ്ങളും മാര്‍ഗനിര്‍ദേശങ്ങളും പാലിക്കാന്‍ പൊതുജനങ്ങളോട് അഭ്യര്‍ഥിക്കുന്നു.

അപകടസാധ്യതകള്‍ ഒഴിവാക്കണം. എല്ലാവര്‍ക്കും സുരക്ഷിതവും ചിട്ടയുള്ളതും ആസ്വാദ്യകരവുമായ ആഘോഷം ഉറപ്പാക്കണം. എല്ലാ ട്രാഫിക് നിയമങ്ങളും പാലിക്കുകയും പോലീസ് ഉദ്യോഗസ്ഥര്‍ നല്‍കുന്ന നിര്‍ദേശങ്ങള്‍ അനുസരിക്കുകയും ചെയ്യുക. ഡ്രൈവര്‍മാരോ യാത്രക്കാരോ കാല്‍നടയാത്രക്കാരോ പാര്‍ട്ടി സ്പ്രേകള്‍ ഉപയോഗിക്കരുത്. വാഹനത്തിന്റെ മുന്നിലും പിന്നിലും നമ്പര്‍ പ്ലേറ്റുകള്‍ ദൃശ്യമാണെന്ന് ഉറപ്പാക്കുക. വാഹനത്തിന്റെയോ മുന്‍വശത്തെ ഗ്ലാസുകളുടെയോ നിറം മാറ്റുകയോ ഇരുണ്ടതാക്കുകയോ ചെയ്യരുത്.

വാഹനത്തില്‍ ഏതെങ്കിലും തരത്തിലുള്ള സ്റ്റിക്കറുകളും അടയാളങ്ങളും ലോഗോകളും സ്ഥാപിക്കരുത്. ഒരു വാഹനത്തില്‍ അനുവദനീയമായ യാത്രക്കാരുടെ എണ്ണത്തില്‍ കവിയരുത്. കാറിന്റെ ഗ്ലാസുകളിലൂടെയോ സണ്‍റൂഫിലൂടെയോ പുറത്തിറങ്ങരുത്. വാഹനത്തില്‍ അനധികൃത മാറ്റങ്ങള്‍ വരുത്തരുത്. ശബ്ദമുണ്ടാക്കുന്നതോ കാഴ്ചയെ തടസ്സപ്പെടുത്തുന്നതോ ആയ ലൈസന്‍സില്ലാത്ത ഫീച്ചറുകള്‍ ചേര്‍ക്കുന്നത് ഒഴിവാക്കുക. ഗതാഗതം തടസ്സപ്പെടുത്തരുത്. അടിയന്തര വാഹനങ്ങള്‍ക്ക് റോഡുകള്‍ തടയരുത് (ആംബുലന്‍സ്, സിവില്‍ ഡിഫന്‍സ്, പോലീസ് പട്രോളിംഗ്). ആന്തരിക റോഡുകളിലായാലും സ്റ്റണ്ടുകള്‍ നടത്തരുത്. വാഹനത്തിന്റെ വശമോ മുന്‍ഭാഗമോ പിന്‍ഭാഗമോ സ്റ്റിക്കറുകള്‍ കൊണ്ട് മൂടരുത്, ദൃശ്യപരതയെ തടയുന്ന സണ്‍ഷേഡുകള്‍ ഉപയോഗിക്കുന്നത് ഒഴിവാക്കുക.

ഈദ് അല്‍ ഇത്തിഹാദ് ആഘോഷങ്ങള്‍ക്കായി പ്രത്യേകം രൂപകല്‍പ്പന ചെയ്ത സ്‌കാര്‍ഫുകള്‍ മാത്രം ധരിക്കുക. യുണൈറ്റഡ് അറബ് എമിറേറ്റ്സിന്റെ പതാക മാത്രം ഉയര്‍ത്തുക. മറ്റ് രാജ്യങ്ങളുടെ പതാകകള്‍ അനുവദനീയമല്ല. ഈദ് അല്‍ ഇത്തിഹാദ് ആഘോഷങ്ങളുമായി ഔദ്യോഗികമായി ബന്ധപ്പെട്ട പാട്ടുകളുടെയും ഗാനങ്ങളുടെയും അളവ് പരിമിതപ്പെടുത്തുക. ഡെക്കറേഷന്‍ ഷോപ്പുകളും ഡ്രൈവര്‍മാരും ഈദ് അല്‍ ഇത്തിഹാദിന് പ്രത്യേകമായി യു എ ഇ പതാകയോ അനുബന്ധ സ്റ്റിക്കറുകളോ നിര്‍മിക്കരുത്. അത്തരം സ്റ്റിക്കറുകളും പതാകകളും ഒട്ടിക്കുന്നത് കര്‍ശനമായി നിരോധിച്ചിരിക്കുന്നു.