ദുബൈ എയർപോർട്ട്‌സ് റിയൽ ടൈം നാവിഗേഷൻ പുറത്തിറക്കി

ദുബൈ | തിരക്കേറിയ അവധിക്കാലത്ത് അന്താരാഷ്ട്ര വിമാനത്താവളത്തിൽ ടെർമിനലുകളിലൂടെയുള്ള യാത്രക്കാരെ നയിക്കുന്നതിനായി ദുബൈ എയർപോർട്ട്‌സ് തത്സമയ നാവിഗേഷൻ ഉപകരണം പുറത്തിറക്കി.

ഡി എക്‌സ് ബി എക്‌സ്പ്രസ് മാപ്പുകൾ എന്ന പേരിലുള്ളതാണിത്. ഫ്ലൈറ്റ് ഇൻഫർമേഷൻ സ്‌ക്രീനിൽ പ്രദർശിപ്പിച്ചിരിക്കുന്ന ക്യു ആർ കോഡ് സ്‌കാൻ ചെയ്ത് യാത്രക്കാർക്ക് അവരുടെ ഗേറ്റ് കണ്ടെത്താനാകും. സമീപത്തുള്ള സൗകര്യങ്ങൾ വേഗത്തിൽ കണ്ടെത്താനും ഇതിലൂടെ കഴിയും.

മാർച്ച് 26 മുതൽ ഏപ്രിൽ ഏഴ് വരെയുള്ള ഈദ് യാത്രാ തിരക്കിൽ 3.6 ദശലക്ഷത്തിലധികം അതിഥികൾ ടെർമിനലുകളിലൂടെ കടന്നുപോകുമെന്ന് പ്രതീക്ഷിക്കുന്നതിനാൽ വ്യത്യസ്തമായ അവധിക്കാല കുതിച്ചുചാട്ടത്തിന് തയ്യാറെടുക്കുന്നതിനിടെയാണ് എക്‌സ്പ്രസ് മാപ്‌സ് ആരംഭിക്കുന്നത്. ഈ കാലയളവിലെ ഏറ്റവും തിരക്കേറിയ ദിവസം ഏപ്രിൽ അഞ്ച് ശനിയാഴ്ചയായിരിക്കും. അന്ന് 309,000 യാത്രക്കാരെ പ്രതീക്ഷിക്കുന്നു.

കഴിഞ്ഞ മാസത്തെ ശരാശരി പ്രതിവാര യാത്രക്കാരുടെ എണ്ണവുമായി താരതമ്യം ചെയ്യുമ്പോൾ ഈദ് ആഴ്ചയിലെ യാത്രക്കാരുടെ എണ്ണത്തിൽ 19 ശതമാനം വർധനവുണ്ടാകുമെന്ന് പ്രതീക്ഷിക്കുന്നു.