മദ്യപിച്ച് ഔദ്യോഗിക വാഹനം ഓടിച്ച ഡിവൈഎസ്പിയുടെ അറസ്റ്റ് രേഖപ്പെടുത്തി

ആലപ്പുഴ |  ആലപ്പുഴയില്‍ മദ്യപിച്ച് വാഹനം ഓടിച്ച ഡിവൈഎസ്പിയുടെ അറസ്റ്റ് രേഖപ്പെടുത്തി. സംസ്ഥാന ക്രൈം റെക്കോര്‍ഡ്സ് ബ്യൂറോ ഡിവൈഎസ്പി വി അനില്‍കുമാറിനെയാണ് അരൂര്‍ പോലീസ് അറസ്റ്റ് ചെയ്തത്. ഇദ്ദേഹത്തെ പിന്നീട് ജാമ്യത്തില്‍ വിട്ടു. ചന്തിരൂരില്‍ വെച്ചാണ് ഡിവൈഎസ്പി പിടിയിലായത്. ഔദ്യോഗിക വാഹനമാണ് മദ്യപിച്ച് അപകടകരമായ വിധത്തില്‍ ഓടിച്ചത്.

പോലീസ് നടത്തിയ പരിശോധനയിലാണ് മദ്യപിച്ചതായി മനസിലായത്. നേരത്തെ തന്നെ വാഹനം അപകടകരമായി ഓടിച്ചുവരുന്നത് കണ്ട പലരും പരാതി പറഞ്ഞിരുന്നു. തുടര്‍ന്ന് ചന്തിരൂരില്‍ വെച്ച് അരൂര്‍ പൊലീസ് വാഹനം നിര്‍ത്തിച്ച് പരിശോധന നടത്തുകയായിരുന്നു.