എളുപ്പത്തിലുള്ള വിസ, താങ്ങാനാവുന്ന ഭവനങ്ങള്‍ മികച്ച ആഗോള നഗരമായി റാക്

റാസ് അല്‍ ഖൈമ| ലോകത്തിലെ ഏറ്റവും മികച്ച പ്രവാസികളുടെ ലക്ഷ്യസ്ഥാനമായി റാസ് അല്‍ ഖൈമ ഒന്നാം സ്ഥാനത്ത്. ആഗോള പ്രവാസി ശൃംഖലയായ ഇന്റര്‍നാഷന്‍സ് നടത്തിയ സര്‍വേയിലാണ് പ്രവാസികള്‍ക്ക് ജീവിക്കാനും ജോലി ചെയ്യാനും പര്യവേക്ഷണം ചെയ്യാനുമുള്ള പ്രമുഖ ആഗോള ലക്ഷ്യസ്ഥാനമായി റാസ് അല്‍ ഖൈമ തിരഞ്ഞെടുക്കപ്പെട്ടത്. 53 നഗരങ്ങളില്‍ നടത്തിയ സര്‍വേയില്‍ എമിറേറ്റ് ഒന്നാം സ്ഥാനത്തെത്തി.

വിസ ലഭിക്കുന്നത്, പ്രാദേശിക ബ്യൂറോക്രസിയുമായി ഇടപെടല്‍, ബേങ്ക് അക്കൗണ്ട് തുറക്കല്‍, താങ്ങാനാവുന്ന പാര്‍പ്പിടം, താമസസൗകര്യം കണ്ടെത്താനുള്ള എളുപ്പം, സര്‍ക്കാര്‍ സേവനങ്ങളുടെ ഓണ്‍ലൈന്‍ ലഭ്യത, അതിവേഗ ഇന്റര്‍നെറ്റ്, ഭാഷ സമന്വയം തുടങ്ങിയ സൂചികയില്‍ എമിറേറ്റ് മുന്നിലെത്തി. വിദേശത്ത് ജോലി ചെയ്യുന്നത് എന്ന കാറ്റഗറിയില്‍ എമിറേറ്റ് രണ്ടാം സ്ഥാനത്തും എളുപ്പത്തില്‍ സ്ഥിരതാമസമാക്കുന്നതില്‍ അഞ്ചാം സ്ഥാനത്തുമെത്തി.420 നഗരങ്ങളിലും 166 രാജ്യങ്ങളിലുമായി 5.4 ദശലക്ഷത്തിലധികം അംഗങ്ങള്‍ ഉള്‍പ്പെടുന്നതാണ് ഇന്റര്‍നാഷന്‍സിന്റെ പ്രവാസി സമൂഹം.