ഇത്തിഹാദ് റെയിൽ അതിവേഗ ട്രെയിൻ പ്രഖ്യാപിച്ചു; ദുബൈയിൽ നിന്ന് അബൂദബിയിലെത്താൻ 30 മിനിറ്റ് മാത്രം

ദുബൈ | ഇത്തിഹാദ് റെയിൽ അതിവേഗ, ഓൾ-ഇലക്‌ട്രിക് പാസഞ്ചർ ട്രെയിൻ ഇന്നലെ അനാച്ഛാദനം ചെയ്തു.ഇത്തിഹാദ് റെയിൽ അൽ ഫയ ഡിപ്പോയിൽ സംഘടിപ്പിച്ച ഔദ്യോഗിക ചടങ്ങിൽ അബൂദബി കിരീടാവകാശിയും എക്സിക്യൂട്ടീവ് കൗൺസിൽ ചെയർമാനുമായ ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്്യാനും ദുബൈ കിരീടാവകാശിയും യു എ ഇ ഉപപ്രധാനമന്ത്രി, പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാശിദ് അൽ മക്തൂമും പുതിയ അതിവേഗ ട്രെയിൻ പദ്ധതിയുടെ പ്രഖ്യാപനത്തിന് സാക്ഷ്യം വഹിച്ചു.

അബൂദബിയെയും ദുബൈയെയും ബന്ധിപ്പിക്കുന്ന അതിവേഗ ട്രെയിൻ രണ്ട് എമിറേറ്റുകൾക്കിടയിലുള്ള യാത്രാ സമയം 30 മിനിറ്റായി കുറക്കും.350 കിലോമീറ്റർ വേഗതയിൽ ഓടുന്ന അതിവേഗ ട്രെയിൻ ആറ് സ്റ്റേഷനുകളിലൂടെ കടന്നുപോകും. റീം ഐലൻഡ്, സാദിയാത്ത്, യാസ് ഐലൻഡ്, സായിദ് ഇന്റർനാഷണൽ എയർപോർട്ട്, അൽ മക്തൂം ഇന്റർനാഷണൽ എയർപോർട്ട്, അൽ ജദ്ദാഫ് എന്നിവയാണത്.

അതിവേഗ ട്രെയിൻ പ്രഖ്യാപനത്തിന്റെ ഭാഗമായി ശൈഖ് ഖാലിദും ശൈഖ് ഹംദാനും യു എ ഇയുടെ ആദ്യത്തെ പാസഞ്ചർ ട്രെയിനും അവലോകനം ചെയ്തു. മണിക്കൂറിൽ 200 കി. മീ. വേഗതയിൽ തടസ്സമില്ലാത്ത യാത്രാനുഭവം നൽകാൻ സഹായിക്കുന്ന ട്രെയിനിന്റെ അത്യാധുനിക രൂപകൽപ്പനയും നൂതന സവിശേഷതകളും പര്യവേക്ഷണം ചെയ്തുകൊണ്ട് അവരുടെ ഹൈനസ് ഒരു ട്രെയിനിൽ പര്യടനം നടത്തി. പാസഞ്ചർ ട്രെയിനിൽ ഏകദേശം 400 പേർ ഉൾക്കൊള്ളും. ബിസിനസ് ക്ലാസ് കമ്പാർട്ടുമെന്റും ഇക്കണോമി ക്ലാസ് കമ്പാർട്ടുമെന്റും ഇതിലുണ്ടാകും.
900 കിലോമീറ്റർ നീളമുള്ള പദ്ധതിയാണ് ഇത്തിഹാദ് റെയിൽ. പൂർത്തിയാകുമ്പോൾ, ഗുവെയ്‌ഫാത്തിൽ നിന്ന് ഫുജൈറയിലേക്ക് ഏഴ് എമിറേറ്റുകളെയും 11 പ്രധാന നഗരങ്ങളെയും ബന്ധിപ്പിക്കും.

നാല് പാസഞ്ചർ റെയിൽവേ സ്റ്റേഷനുകളുടെ പ്രഖ്യാപനവും ചടങ്ങിൽ നടന്നു.  അബൂദബി, ദുബൈ, ഷാർജ, ഫുജൈറ എന്നിവിടങ്ങളിലെ ഈ സ്റ്റേഷനുകൾ റെയിൽ സേവനങ്ങളിലേക്കുള്ള പ്രവേശനം മെച്ചപ്പെടുത്തും. അവ മെട്രോ, ബസ് ലൈനുകളുമായി സംയോജിപ്പിച്ച് സമഗ്രവും പരസ്പരബന്ധിതവുമായ ഗതാഗത ശൃംഖല സൃഷ്ടിക്കും.

അയൽരാജ്യങ്ങളിലേക്ക് റെയിൽ കണക്ഷൻ പ്രഖ്യാപിച്ച ആദ്യ ഗൾഫ് രാജ്യം കൂടിയാണ് യു എ ഇ. ഹഫീത് റെയിൽ പദ്ധതി എന്നാണ് യു എ ഇ – ഒമാൻ ട്രെയിൻ യാത്രക്ക് പേരിട്ടിരിക്കുന്നത്. യു എ ഇ മുതൽ ഒമാൻ വരെ മൂന്ന് ബില്യൺ ഡോളർ ചിലവിൽ നിർമിക്കുന്ന ഹഫീത് റെയിൽ ശൃംഖല 60 പാലങ്ങളും 2.5 കിലോമീറ്റർ തുരങ്കവും ഉൾക്കൊള്ളുന്നതാണ്. വാസ്തുവിദ്യയിൽ വിസ്മയമായും ഇത് മാറും.യു എ ഇ ദേശീയ റെയിൽ നെറ്റ്‌വർക്ക് അടുത്ത അഞ്ച് പതിറ്റാണ്ടിനുള്ളിൽ മൊത്ത ആഭ്യന്തര ഉത്പാദനത്തിൽ (ജി ഡി പി) 145 ബില്യൺ ദിർഹം കൂട്ടിച്ചേർക്കുമെന്ന് പ്രതീക്ഷിക്കുന്നു.