സി പി എം അമ്പലപ്പുഴ ഏരിയാ സമ്മേളനത്തിലേക്ക് ജി സുധാകരനെ ക്ഷണിച്ചില്ല

ആലപ്പുഴ | മുന്‍ മന്ത്രിയും മുതിര്‍ന്ന നേതാവുമായ ജി സുധാകരനെ സ്വന്തം നാട്ടില്‍ നടക്കുന്ന സി പി എം ഏരിയാ സമ്മേളനത്തിലേക്ക് ക്ഷണിച്ചില്ല. ഇദ്ദേഹത്തിന്റെ വീട്ടില്‍ നിന്ന് ഒരു കിലോമീറ്റര്‍ മാത്രം ദൂരെയാണ് അമ്പലപ്പുഴ ഏരിയാ സമ്മേളനം നടക്കുന്നത്.

പ്രതിനിധി സമ്മേളനത്തിന്റെ ഉദ്ഘാടന ചടങ്ങിലേക്കോ ഇന്ന് നടക്കുന്ന പൊതുസമ്മേളന ത്തിലേക്കോ ജി സുധാകരന് ക്ഷണമില്ല. സമ്മേളന ദിവസങ്ങളില്‍ ജി സുധാകരന്‍ വീട്ടില്‍ തന്നെയുണ്ട്. പ്രായപരിധി കടന്നതിനാല്‍ പാര്‍ട്ടി സംസ്ഥാന സമിതിയില്‍ നിന്ന് ഒഴിഞ്ഞ ജി സുധാകരന്‍ നിലവില്‍ പാര്‍ട്ടി അംഗവും സി പി എം ജില്ലാ കമ്മിറ്റിയില്‍ പ്രത്യേക ക്ഷണിതാ വുമാണ്. തനിക്ക് പാര്‍ട്ടി പദവികളില്ലാത്തത് കൊണ്ടാവും തന്നെ ക്ഷണിക്കാതിരുന്നതെന്ന് ജി സുധാകരന്‍ പ്രതികരിച്ചു.

പ്രായപരിധിയെ തുടര്‍ന്ന് ഒഴിയേണ്ടിവന്നെങ്കിലും വിവിധ വിഷയങ്ങളില്‍ അദ്ദേഹം നടത്തുന്ന പ്രതികരണങ്ങള്‍ പാര്‍ട്ടിക്ക് തലവേദനയായിരുന്നു.