തിരുവനന്തപുരത്ത് പോലീസിന് നേരെ ഗുണ്ടാ ആക്രമണം

തിരുവനന്തപുരം| ‌ തലസ്ഥാനത്ത് അക്രമികളെ അറസ്റ്റ് ചെയ്യാനെത്തിയ പോലീസിന് നേരെ ഗുണ്ടാ ആക്രമണം. വെള്ളറട സ്റ്റേഷനിലെ ഗ്രേഡ് എസ് ഐ സുരേഷ്, ഡ്രൈവര്‍ സി പി ഒ അരുണ്‍ എന്നിവര്‍ക്കാണ് കാരക്കോണത്ത് വെച്ച് ആക്രമണമുണ്ടായത്. സംഭവത്തില്‍ 11 പേര്‍ക്കെതിരെ കേസെടുത്തു

ഇന്നലെ രാത്രി പത്ത് മണിയോടെയാണ് സംഭവം. ഓണാഘോഷത്തിനിടെ രണ്ട് സംഘങ്ങള്‍ തമ്മില്‍ ഏറ്റുമുട്ടുന്നതായ വിവരം ലഭിച്ചതിന്റെ അടിസ്ഥാനത്തിലാണ് വെള്ളറട സ്റ്റേഷനില്‍ നിന്നുള്ള പോലീസുകാര്‍ കാരക്കോണത്ത് എത്തിയത്. സ്ഥലത്ത് നിന്ന് അക്രമസംഘത്തില്‍പ്പെട്ട രണ്ട് പേരെ പോലീസ് കസ്റ്റഡിയിലെടുത്ത് ജീപ്പിലേക്ക് കയറ്റുന്നതിനിടെയായിരുന്നു ആക്രമണം. കസ്റ്റഡിയിലെടുത്തവരുടെ ഒപ്പമുണ്ടായിരുന്നവരാണ് ആക്രമിച്ചത്. പോലീസുകാരുടെ യൂണിഫോം വലിച്ച് കീറുകയും ലാത്തി തകര്‍ക്കുകയും ചെയ്തു. പരുക്കേറ്റ പോലീസുകാര്‍ ആശുപത്രിയില്‍ ചികിത്സ തേടി.