വിഴിഞ്ഞത്ത് കഞ്ചാവ് വേട്ട; പിടിച്ചെടുത്തത് 8.898 കിലോ, രണ്ടുപേര്‍ അറസ്റ്റില്‍

തിരുവനന്തപുരം | വിഴിഞ്ഞത്ത് കഞ്ചാവ് കടത്തിയ കേസില്‍ രണ്ടുപേര്‍ അറസ്റ്റില്‍. കരിമ്പിള്ളിക്കര സ്വദേശി അജീഷ് (33), പൂന്തുറ സ്വദേശി ഫിറോസ്ഖാന്‍ (36) എന്നിവരെയാണ് എക്‌സൈസ് അറസ്റ്റ് ചെയ്തത്.

8.898 കിലോഗ്രാം കഞ്ചാവാണ് ഇവരില്‍ നിന്ന് പിടിച്ചെടുത്തത്. ഓട്ടോറിക്ഷയില്‍ നിന്നും വീട്ടില്‍ നിന്നുമായാണ് ഇത്രയും കഞ്ചാവ് കണ്ടെടുത്തത്. രഹസ്യ വിവരത്തെ തുടര്‍ന്ന് നടത്തിയ പരിശോധനയില്‍ ആദ്യം ഓട്ടോറിക്ഷയില്‍ നിന്നും പിന്നീട് വീട്ടില്‍ നിന്നും കഞ്ചാവ് പിടിക്കുകയായിരുന്നു.

നെയ്യാറ്റിന്‍കര എക്‌സൈസ് റേഞ്ച് ഇന്‍സ്‌പെക്ടര്‍ ജെ എസ് പ്രശാന്തിന്റെ നേതൃത്വത്തിലായിരുന്നു അന്വേഷണം. എക്‌സൈസ് ഇന്‍സ്‌പെക്ടര്‍മാരായ റെജികുമാര്‍, സുനില്‍ രാജ്, സിവില്‍ എക്‌സൈസ് ഓഫീസര്‍മാരായ അനീഷ്, ലാല്‍കൃഷ്ണ, പ്രസന്നന്‍, വനിതാ സിവില്‍ എക്‌സൈസ് ഓഫീസര്‍മാരായ ശാലിനി, ജീനാ, സിവില്‍ എക്‌സൈസ് ഓഫീസര്‍ ഡ്രൈവര്‍ അനില്‍കുമാര്‍ എന്നിവരും അന്വേഷണ സംഘത്തിലുണ്ടായിരുന്നു.