പാചകത്തിനിടെ ഗ്യാസ് സിലണ്ടര്‍ പൊട്ടിത്തെറിച്ചു ; തലനാരിഴക്ക് രക്ഷപ്പെട്ട് വീട്ടുകാര്‍

ഹരിപ്പാട് | പാചകത്തിനിടെ ഗ്യാസ് സിലിണ്ടര്‍ പൊട്ടിത്തെറിച്ച് അടുക്കളയില്‍ തീപിടുത്തം. പള്ളിപ്പാട് നാലുകെട്ടും കവല വിശാഖത്തില്‍ ബിനുവിന്റെ വീട്ടിലാണ് അപകടം. ബിനുവിന്റെ ഭാര്യ ലത പാചകം ചെയ്യുന്നതിനിടയിലാണ് തീപിടുത്തം ഉണ്ടായത്. ഏകദേശം മൂന്ന് ഇഞ്ചോളം വലിപ്പത്തിലാണ് പൊട്ടല്‍ ഉണ്ടായത്.

സംഭവം നടന്നയുടന്‍ വീട്ടിലുള്ളവര്‍ പുറത്തിറങ്ങിയതിനാല്‍ ആര്‍ക്കും കാര്യമായ പരിക്കുകള്‍ ഉണ്ടായില്ല. ലതയുടെ കാലിനും മകന്‍ അശ്വിന്റെ കൈക്കും നേരിയ പരിക്കുണ്ട്. അടുക്കളയിലുണ്ടായിരുന്ന ഉപകരണങ്ങള്‍ പൂര്‍ണമായും കത്തി നശിച്ചു. ഫ്രിഡ്ജ്, വാഷിംഗ് മെഷീന്‍ അടുക്കളയിലെ മറ്റ് പാത്രങ്ങള്‍ എല്ലാം പൂര്‍ണമായും നശിച്ചു. അടുക്കളയിലെ ഭിത്തികള്‍ക്കും തകരാറുകള്‍ സംഭവിച്ചു. അഗ്‌നി രക്ഷാസേന സ്ഥലത്തെത്തിയാണ് തീ അണച്ചത്.