ഏറ്റവും വിലകുറഞ്ഞ 5ജി ഫോണുമായി ജിയോ

ന്യൂഡല്‍ഹി| ഇന്ത്യയില്‍ 5ജി വിപ്ലവം ഈ വര്‍ഷം ആരംഭിക്കാനിരിക്കെ നിരവധി കമ്പനികളാണ് 5ജി ഫോണ്‍ പുറത്തിറക്കുന്നത്. റിലയന്‍സ് ജിയോയാണ് ഇക്കാര്യത്തില്‍ മുന്നിലുള്ളത്. ഈ വര്‍ഷാവസാനം ലോഞ്ച് ചെയ്യാന്‍ ജിയോ ഒരു ജിയോഫോണ്‍ 5ജി തയ്യാറെടുക്കുന്നതായി റിപ്പോര്‍ട്ട്. ജിയോയില്‍ നിന്നുള്ള ആദ്യത്തെ 5ജി ഫോണ്‍ ഇന്ത്യയിലെ ഏറ്റവും വിലകുറഞ്ഞ 5ജി ഫോണായിരിക്കുമെന്നതും പ്രത്യേകതയാണ്.

റിലയന്‍സ് ജിയോ 5ജി ഫോണിന് ഏകദേശം 10,000 രൂപയായിരിക്കും വില. ഇതുവരെയുള്ള ഏറ്റവും വിലകുറഞ്ഞ 5ജി ഫോണായിരിക്കും ഇത്. ഇന്ത്യയിലെ ഏറ്റവും താങ്ങാനാവുന്ന 5ജി ഫോണ്‍ കഴിഞ്ഞ വര്‍ഷം ഏകദേശം 13,000 രൂപയ്ക്ക് എത്തിയിരുന്നു. ഏറ്റവും വിലകുറഞ്ഞ 5ജി ഫോണുകള്‍ വില്‍ക്കുന്ന റിയല്‍മി, റെഡ്മി എന്നിവയെ ഏറ്റെടുക്കാനാണ് ജിയോ ലക്ഷ്യമിടുന്നത്. ഇത് കുറഞ്ഞ വിലയില്‍ കുറഞ്ഞ സ്പെസിഫിക്കേഷനുകള്‍ മാത്രമാണ് നല്‍കുന്നതെന്നാണ് സൂചന. എന്നാല്‍ ജിയോഫോണ്‍ 5ജിയില്‍ കുറച്ചുകൂടി മികച്ച ഹാര്‍ഡ് വെയറിലേക്ക് പോകുകയാണെന്ന് റിപ്പോര്‍ട്ട്. ഫോണ്‍ എന്‍3, എന്‍5, എന്‍28, എന്‍40, എന്‍78 എന്നീ ബാന്‍ഡുകളെ പിന്തുണയ്ക്കും. ഇന്ത്യയിലുടനീളമുള്ള 5ജി നെറ്റ് വര്‍ക്കുകളെ ഇത് പിന്തുണയ്ക്കുമെന്നര്‍ത്ഥം.

മൈക്രോ എസ്ഡി കാര്‍ഡ് സ്ലോട്ടിനൊപ്പം 4 ജിബി റാമും 32 ജിബി ഇന്റേണല്‍ സ്റ്റോറേജുമായാണ് ജിയോഫോണ്‍ 5 ജി വരുന്നത്. എച്ച്ഡി+ റെസല്യൂഷനോടുകൂടിയ 6.5 ഇഞ്ച് എല്‍സിഡിയുമായി ജിയോഫോണ്‍ 5ജി വന്നേക്കാം. ഫോണ്‍ പവര്‍ ചെയ്യുന്നത് ആന്‍ഡ്രോയിഡ് 11 ആയിരിക്കാം.
ജിയോയുടെ 5ജി ഫോണ്‍ പ്രോട്ടോടൈപ്പിംഗ് ഘട്ടത്തിലേക്ക് കടന്നതായി റിപ്പോര്‍ട്ടുണ്ട്. എന്നാല്‍ ഈ വര്‍ഷം ഇന്ത്യയില്‍ 5ജി നെറ്റ് വര്‍ക്കുകളുടെ ആദ്യ തരംഗം നടപ്പാക്കല്‍ ആരംഭിക്കാന്‍ ജിയോ തയ്യാറാണോ എന്നതിനെ ആശ്രയിച്ചിരിക്കും അതിന്റെ അവതരണം. ജൂണില്‍ നടക്കാനിരിക്കുന്ന ഈ വര്‍ഷത്തെ വാര്‍ഷിക ഷെയര്‍ഹോള്‍ഡര്‍ മീറ്റിംഗില്‍ റിലയന്‍സ് ജിയോ 5ജി പ്ലാനുകളും 5ജി ഫോണും പ്രഖ്യാപിച്ചേക്കുമെന്ന് റിപ്പോര്‍ട്ട്.