Kerala
മാതാപിതാക്കള് ഉപേക്ഷിച്ച നവജാത ശിശുവിനെ ഏറ്റെടുത്ത് സര്ക്കാര്
കുഞ്ഞിന്റെ മുമ്പത്തെ സ്വകാര്യ ആശുപത്രിയിലെ ചികിത്സാ ചെലവിന്റെ തുക ആരോഗ്യ വകുപ്പ് ഡയറക്ടര് നിശ്ചയിക്കുന്ന പ്രകാരം വനിത ശിശുവികസന വകുപ്പിന്റെ ബാലനിധിയിലൂടെ അനുവദിക്കുന്നതാണ്.

കൊച്ചി|ജാര്ഖണ്ഡ് സ്വദേശികളായ ദമ്പതികള് ആശുപത്രി ഐസിയുവില് ഉപേക്ഷിച്ച് പോയ മൂന്നാഴ്ച മാത്രം പ്രായമുള്ള ശിശുവിനെ ഏറ്റെടുത്ത് സര്ക്കാര്. കുഞ്ഞിനെ ജനറല് ആശുപത്രിയിലേക്ക് മാറ്റി. കുഞ്ഞ് ലൂര്ദ് ഹോസ്പിറ്റല് ഐസിയുവില് ചികിത്സയിലായിരുന്നു. ആശുപത്രിയിലെ പീഡിയാട്രീഷ്യന്റെ നേതൃത്വത്തില് സ്പെഷ്യല് ന്യൂ ബോണ് കെയറില് പരിശീലനം നേടിയ നഴ്സ്, എമര്ജന്സി മെഡിക്കല് ടെക്നീഷ്യന് എന്നിവരടങ്ങുന്ന സംഘമാണ് കുഞ്ഞിനെ ജനറല് ആശുപത്രിയിലെത്തിച്ചത്.
കുഞ്ഞ് ഇപ്പോഴും ഓക്സിജന് സപ്പോര്ട്ടിലാണ്. കുഞ്ഞിന് നിലവില് ഒരു കിലോ ഭാരമുണ്ട്. തലയില് ചെറിയ രക്തസ്രാവമുണ്ട്. ഓറല് ആന്റിബയോട്ടിക് ചികിത്സ തുടരുന്നുണ്ട്. ഒരു മാസത്തോളം തീവ്ര പരിചരണം ആവശ്യമാണ്.
കുഞ്ഞിനെ ‘ബേബി ഓഫ് രഞ്ജിത’ എന്ന മേല്വിലാസത്തിലായിരുന്നു ചികിത്സിച്ചിരുന്നത്. കുഞ്ഞിന് വനിത ശിശു വികസന വകുപ്പ് സംരക്ഷണമൊരുക്കുമെന്ന് കഴിഞ്ഞ ദിവസം ആരോഗ്യമന്ത്രി വീണാ ജോര്ജ് പറഞ്ഞിരുന്നു. കുഞ്ഞിന് വിദഗ്ധ ചികിത്സ ഉറപ്പാക്കാന് ജനറല് ആശുപത്രി സൂപ്രണ്ടിനും മന്ത്രി നിര്ദേശം നല്കിയിരുന്നു. ആശുപത്രി സൂപ്രണ്ട് ഡോ. ഷഹിര്ഷായുടെ ഏകോപനത്തില് പീഡിയാട്രീഷ്യന് ഡോ. വിജിയുടെ നേതൃത്വത്തിലുള്ള വിദഗ്ധ ഡോക്ടര്മാരടങ്ങിയ പ്രത്യേക മെഡിക്കല് ബോര്ഡ് കുഞ്ഞിന്റെ ചികിത്സാ മേല്നോട്ടം വഹിക്കും. കുഞ്ഞിന്റെ മുമ്പത്തെ സ്വകാര്യ ആശുപത്രിയിലെ ചികിത്സാ ചെലവിന്റെ തുക ആരോഗ്യ വകുപ്പ് ഡയറക്ടര് നിശ്ചയിക്കുന്ന പ്രകാരം വനിത ശിശുവികസന വകുപ്പിന്റെ ബാലനിധിയിലൂടെ അനുവദിക്കുന്നതാണ്.
ബന്ധുക്കളാരും ഇല്ലാത്തതിനാല് പ്രത്യേക പരിചരണത്തിന് ന്യൂബോണ് കെയറിലെ നഴ്സുമാരെ നിയോഗിച്ചു. കുഞ്ഞിന് മുലപ്പാല് ബാങ്കില് നിന്നും മുലപ്പാല് ലഭ്യമാക്കി. വനിതാ ശിശു വികസന വകുപ്പിന്റെ ജില്ലാ ചൈല്ഡ് പ്രൊട്ടക്ഷന് ഓഫീസര് ദിവസവും കുഞ്ഞിനെ സന്ദര്ശിച്ച് ആവശ്യമായ നടപടികള് സ്വീകരിക്കുന്നുണ്ട്. ആവശ്യമെങ്കില് വനിത ശിശുവികസന വകുപ്പിന്റെ കെയര് ടേക്കര്മാരേയും നിയോഗിക്കും. മാതാപിതാക്കള് വന്നാല് കുഞ്ഞിനെ അവര്ക്ക് കൈമാറും. മാതാപിതാക്കള്ക്ക് കുഞ്ഞിനെ വേണ്ട എന്നാണെങ്കില് നിയമപരമായ നടപടികളിലൂടെ കുഞ്ഞിനെ ശിശുക്ഷേമ സമിതി ഏറ്റെടുക്കും.
കോട്ടയം ഫിഷ് ഫാമില് ജോലി ചെയ്തിരുന്ന ജാര്ഖണ്ഡ് സ്വദേശികളായ മംഗളേശ്വര്-രഞ്ജിത എന്നിവരുടേതാണ് കുഞ്ഞ്. പ്രസവത്തിനായി നാട്ടിലേക്ക് പോകുന്ന സമയത്ത് രഞ്ജിതയ്ക്ക് അസ്വസ്ഥത അനുഭവപ്പെടുകയും എറണാകുളം ജനറല് ആശുപത്രിയില് പ്രവേശിപ്പിക്കുകയുമായിരുന്നു. ജനുവരി 29-നാണ് കുഞ്ഞ് ജനിച്ചത്. 28 ആഴ്ച മാത്രമായിരുന്നു കുഞ്ഞിന് വളര്ച്ചയുണ്ടായിരുന്നത്. തുടര്ന്ന് വിദഗ്ധ ചികിത്സയ്ക്കായി കുഞ്ഞിനെ ലൂര്ദ് ആശുപത്രിയിലേക്ക് മാറ്റി.
ഈ ദിവസങ്ങളില് പിതാവ് രണ്ട് ആശുപത്രികളിലുമായി മാറിമാറി നിന്നു. ആരോഗ്യനില മെച്ചപ്പെട്ടതോടെ രഞ്ജിതയെ 31-ന് ഡിസ്ചാര്ജ് ചെയ്തു. പിന്നാലെ മംഗളേശ്വറിനേയും രഞ്ജിതയേയും കാണാതാവുകയായിരുന്നു. ഇവരെ ആശുപത്രി അധികൃതര് ബന്ധപ്പെടാന് ശ്രമിച്ചപ്പോള് നാട്ടിലെത്തിയെന്ന സന്ദേശമാണ് ലഭിച്ചത്. പിന്നീട് ഫോണ് സ്വിച്ച് ഓഫ് ആകുകയായിരുന്നു.