സ്ത്രീകൾക്ക് വമ്പൻ വാഗ്ദാനങ്ങൾ; മഹാരാഷ്ട്രയിൽ പ്രകടന പത്രിക പുറത്തിറക്കി ഇരു മുന്നണികളും

മുംബൈ | വോട്ടർമാർക്ക് വൻ വാഗ്ദാനങ്ങൾ മുന്നോട്ടുവെച്ച് മഹാരാഷ്ട്ര നിയമസഭാ തിരഞ്ഞെടുപ്പിനുള്ള പ്രകടന പത്രിക പുറത്തിറക്കി ബിജെപി നേതൃത്വം നൽകുന്ന മഹായുതി സഖ്യവും കോൺഗ്രസ് നേതൃത്വം നൽകുന്ന മഹാ വികാസ് അഘാഡി സഖ്യവും. കർഷകരുടെ കടം എഴുതിത്തള്ളുമെന്നും എല്ലാ മാസവും സ്ത്രീകൾക്ക് 2100 രൂപ നൽകുമെന്നുമാണ് ബിജെപിയുടെ സങ്കൽപ് പത്രികയിലെ പ്രധാന വാഗ്ദാനം. മഹാലക്ഷ്മി യോജനയ്ക്ക് കീഴിൽ സ്ത്രീകൾക്ക് പ്രതിമാസം 3,000 രൂപ സഹായവും സ്ത്രീകൾക്ക് സൗജന്യ ബസ് യാത്രയും ഉൾപ്പെടെ വാഗ്ദാനങ്ങളാണ് പ്രതിപക്ഷ സഖ്യമായ മഹാ വികാസ് അഘാഡി മുന്നോട്ടുവെക്കുന്നത്. സ്ത്രീകൾക്ക് കൂടുതൽ ആനുകൂല്യങ്ങൾ വാഗ്ദാനം ചെയ്യുന്നതാണ് രണ്ട് പ്രകടന പത്രികകളും.

വയോജന പെൻഷൻ പദ്ധതിയിൽ 1500 രൂപയ്ക്ക് പകരം 2100 രൂപ നൽകുാമെന്നാണ് മഹായുതിയുടെ മറ്റൊരു വാഗ്ദാനം. മഹാരാഷ്ട്രയിൽ 25 ലക്ഷം പേർക്ക് തൊഴിൽ നൽകുമെന്നും സങ്കൽപ്പ പത്രികയിൽ വാഗ്ദാനം ചെയ്യുന്നു. 2028 ഓടെ മഹാരാഷ്ട്രയുടെ സമ്പദ്‌വ്യവസ്ഥയെ ഒരു ട്രില്യൺ സമ്പദ്‌വ്യവസ്ഥയാക്കുക എന്നതാണ് പാർട്ടിയുടെ ലക്ഷ്യമെന്നും പ്രകടന പത്രിക വ്യക്തമാക്കുന്നു. അധികാരത്തിൽ തിരിച്ചെത്തിയാൽ ഭക്ഷ്യസുരക്ഷയും ശരിയായ താമസസൗകര്യവും ഉറപ്പാക്കുമെന്നും അവശ്യസാധനങ്ങളുടെ വില സ്ഥിരപ്പെടുത്തുമെന്നും പ്രകടന പത്രികയിൽ പറയുന്നു.

25 ലക്ഷം പുതിയ ജോലികളും 10 ലക്ഷം വിദ്യാർത്ഥികൾക്ക് 10,000 രൂപ സ്റ്റൈപ്പൻ്റും ബിജെപി വാഗ്ദാനം ചെയ്യുന്നു . 45,000 ഗ്രാമങ്ങളിൽ പുതിയ റോഡുകളും പുനരുപയോഗ ഊർജത്തിൽ ശ്രദ്ധ കേന്ദ്രീകരിച്ച് വൈദ്യുതി ബില്ലിൽ 30 ശതമാനം കുറവും വാഗ്ദാനം ചെയ്തിട്ടുണ്ട്. മേക്ക് ഇൻ മഹാരാഷ്ട്ര സംസ്ഥാനത്തെ ഫിൻടെക് ആക്കും, നാഗ്പൂർ, പൂനെ, നാസിക് തുടങ്ങിയ എഐ തലസ്ഥാന നഗരങ്ങളെ എയ്‌റോസ്‌പേസ് ഹബ്ബുകളാക്കും, സർക്കാർ സ്‌കൂളുകളിൽ AI പരിശീലനം, നൈപുണ്യ സെൻസസ്, സംരംഭകർക്ക് പിന്തുണ, പിന്നാക്കക്കാരായ വിദ്യാർത്ഥികൾക്ക് സാമ്പത്തിക സഹായം തുടങ്ങിയ വാഗ്ദാനങ്ങളുമുണ്ട്. നിർബന്ധിത മതപരിവർത്തനത്തിനെതിരെ നിയമം കൊണ്ടുവരുമെന്നും മനുഷ്യ-മൃഗ സംഘർഷം തടയാൻ സാങ്കേതികവിദ്യ ഉപയോഗിക്കുമെന്നും ബിജെപി വാഗ്ദാനം ചെയ്തു.

മഹാ വികാസ് അഘാഡിയും വൻ വാഗ്ദാനങ്ങളാണ് മുന്നോട്ടുവെക്കുന്നത്. 500 രൂപ നിരക്കിൽ ആറ് സിലിണ്ടറുകൾ, സ്ത്രീ സുരക്ഷ ഉറപ്പാക്കാൻ ശക്തമായ നിയമങ്ങൾ, 9-16 വയസ് പ്രായമുള്ള പെൺകുട്ടികൾക്ക് സൗജന്യ സെർവിക്കൽ ക്യാൻസർ വാക്സിൻ, എല്ലാ മാസവും രണ്ട് ദിവസത്തെ ആർത്തവ അവധി തുടങ്ങിയ വാഗ്ദാനങ്ങൾ പ്രകടന പത്രികയിലുണ്ട്. കർഷക ആത്മഹത്യ തടയാനും ആത്മഹത്യ ചെയ്ത കർഷകരുടെ കുടുംബങ്ങൾക്ക് സഹായപദ്ധതികൾ നൽകാനും ഒരു ഉന്നതതല സമിതി രൂപീകരിക്കും. കർഷകർക്ക് അവരുടെ ഉൽപന്നങ്ങൾക്ക് ശരിയായ വില ലഭിക്കുമെന്ന് ഉറപ്പ് നൽകുമെന്നും പ്രകടന പത്രിക പറയുന്നു. തൊഴിലില്ലാത്ത യുവാക്കൾക്ക് പ്രതിമാസം 4,000 രൂപ പെൻഷൻ നൽകുമെന്നും സംസ്ഥാന സ്കോളർഷിപ്പ് പദ്ധതികൾ വിപുലീകരിക്കുമെന്നും വ്യക്തമാക്കുന്നുണ്ട്. മഹാരാഷ്ട്രയിൽ ജാതി സെൻസസ് നടത്തുമെന്നും പ്രകടന പത്രികയിൽ വ്യക്തമാക്കുന്നു.

കേന്ദ്ര ആഭ്യന്തര മന്ത്രി അമിത്ഷായാണ് ഇന്ന് മുംബൈയിൽ ബിജെപി പ്രകടന പത്രിക പുറത്തിറക്കിയത്. കർഷകരുടെയും ദരിദ്രരുടെയും സ്ത്രീകളുടെയും അന്തസ്സിനു വേണ്ടിയാണ് മഹായുതി സർക്കാർ പ്രവർത്തിച്ചതെന്ന് ചടങ്ങിൽ അദ്ദേഹം പറഞ്ഞു. പ്രകടനപത്രിക മഹാരാഷ്ട്രയിലെ ജനങ്ങളുടെ അഭിലാഷങ്ങളെ പ്രതിഫലിപ്പിക്കുന്നതാണെന്നും അദ്ദേഹം വ്യക്തമാക്കി.

ലോകം മുംബൈയിലേക്കാണ് നോക്കുന്നതെന്നും സാമൂഹിക മാറ്റത്തിൽ രാജ്യത്തെ നയിക്കുന്നത് മഹാരാഷ്ട്രയാണെന്നും മഹാ വികാസ് അഘാഡി പ്രകടന പത്രിക പുറത്തിറക്കി കോൺഗ്രസ് അധ്യക്ഷൻ മല്ലികാർജുൻ ഖാർഗെ പറഞ്ഞു.