ജി സുധാകരന്‍ മഹാനായ നേതാവെന്ന് എച്ച് സലാം എംഎല്‍എ

ആലപ്പുഴ |  ജി സുധാകരന്‍ മഹാനായ നേതാവെന്ന് അമ്പലപ്പുഴ എംഎല്‍എ എച്ച് സലാം. മാധ്യമ പരിലാളനയില്‍ വളര്‍ന്ന നേതാവല്ല അദ്ദേഹമെന്നും എച്ച് സലാം പറഞ്ഞു. നിയമസഭാ തെരഞ്ഞെടുപ്പില്‍ സജീവമായില്ലെന്ന പരാതിയില്‍ പാര്‍ട്ടി ജി സുധാകരന് പാര്‍ട്ടിയുടെ പരസ്യശാസന നേരിടേണ്ടി വന്നതിന് പിറകെയാണ് സുധകരനെ പുകഴ്ത്തി സലാം രംഗത്തെത്തിയിരിക്കുന്നത്. സുധാകരനെയും തന്നെയും താരതമ്യപ്പെടുത്തരുതെന്നും എച്ച് സലാം പറഞ്ഞു.നല്ലകാര്യം നടക്കുമ്പോള്‍ വാര്‍ത്ത നല്‍കി ജി സുധാകരനെ ചുരുക്കി കാണിക്കരുത്. അതു ശരിയല്ല. എംഎല്‍എ എന്ന നിലയില്‍ സുധാകരന്‍ മാതൃകയാണ്. മഹാനായ നേതാവാണ്. അദ്ദേഹത്തെ ചുരുക്കിക്കാണിക്കരുത്. താന്‍ സുധാകരനെക്കാള്‍ താഴെ നില്‍ക്കുന്ന ആളാണെന്നും എച്ച് സലാം പറഞ്ഞു.

നിയമസഭാ തിരഞ്ഞെടുപ്പിലെ പ്രചരണരംഗത്ത് സുധാകരന്‍ സജീവമായില്ലെന്ന പരാതിയുമായി എച്ച് സലാം ഉന്നയിച്ചതോടെയാണ് സിപിഎം പ്രത്യേക അന്വേഷണകമ്മീഷനെ വച്ചതും കമ്മീഷന്‍ സുധാകരന്‍ കുറ്റക്കാരനാണെന്ന് കണ്ടെത്തുന്നതും. നിയമസഭാ തെരഞ്ഞെടുപ്പില്‍ അമ്പലപ്പുഴയില്‍ വീണ്ടും മത്സരിക്കാനുള്ള തയ്യാറെടുപ്പുകള്‍ സുധാകരന്‍ നടത്തിയിരുന്നുവെന്നും എന്നാല്‍ അവസാന നിമിഷം സീറ്റ് ലഭിക്കാതെ വന്നതോടെ അദ്ദേഹം പ്രചാരണരംഗത്ത് നിര്‍ജീവമായെന്നും സലാം പാര്‍ട്ടിയോട് പരാതിപ്പെട്ടിരുന്നു. തന്നെ എസ്ഡിപിഐക്കാരനാക്കി ചിത്രീകരിച്ച് കൊണ്ട് വ്യാപകപ്രചാരണം നടന്നിട്ടും അതിനെ തള്ളിപ്പറയാനോ തന്നെ പ്രതിരോധിക്കാനോ സുധാകരന്‍ തയ്യാറായില്ലെന്ന പരാതിയും സലാം ഉന്നയിച്ചിരുന്നു.