ആരോഗ്യ സംരക്ഷണ പദ്ധതികൾ സമൂഹ ഭാവിക്ക് നിക്ഷേപം: പ്രസിഡന്റ്

അബൂദബി|ആരോഗ്യ സംരക്ഷണ പദ്ധതികൾ “സമൂഹ ഭാവിയിലെ’ നിർണായക നിക്ഷേപമായി മുന്നോട്ട് കൊണ്ടുപോകുന്നതിന് യു എ ഇ പ്രതിജ്ഞാബദ്ധമാണെന്ന് പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്്യാൻ. ലോകാരോഗ്യ ദിനത്തിൽ സംസാരിക്കുകയായിരുന്നു ശൈഖ് മുഹമ്മദ്. ആരോഗ്യകരമായ ജീവിത സംസ്‌കാരം പ്രോത്സാഹിപ്പിക്കേണ്ടത് പ്രധാനമാണ്. എല്ലാവരുടെയും പ്രയോജനത്തിനായി ശാസ്ത്രത്തിലൂടെയും നവീകരണത്തിലൂടെയും ആഗോള ആരോഗ്യ വെല്ലുവിളികളെ നേരിടാൻ ലക്ഷ്യമിട്ടുള്ള അന്താരാഷ്ട്ര ശ്രമങ്ങളെ പിന്തുണക്കുന്നതിനും ഞങ്ങൾ പ്രതിജ്ഞാബദ്ധരാണ്. സമീപ വർഷങ്ങളിൽ സ്വദേശത്തും വിദേശത്തും ആരോഗ്യ സംരക്ഷണം ശക്തിപ്പെടുത്തുന്നതിനായി യു എ ഇ ഗണ്യമായ മുന്നേറ്റം നടത്തിയിട്ടുണ്ട്.

ആരോഗ്യകരമായ ജീവിതശൈലി പ്രോത്സാഹിപ്പിക്കുന്നതിന് തന്ത്രങ്ങൾ ആവിഷ്‌കരിച്ചു. രോഗം പരിമിതപ്പെടുത്തുന്നതിനും തുടച്ചുനീക്കുന്നതിനും ലക്ഷ്യമിട്ടുള്ള ആഗോള പരിപാടികൾക്ക് ധനസഹായം നൽകുന്നു. മാർച്ചിൽ, യു എ ഇ മുഹമ്മദ് ബിൻ സായിദ് ഫൗണ്ടേഷൻ ഫോർ ഹ്യുമാനിറ്റി ആരംഭിച്ചു. ഇത് ലോകമെമ്പാടും ആവശ്യക്കാർക്ക് ജീവിതം മാറ്റിമറിക്കുന്ന പരിചരണം നൽകുന്നതിനുള്ള ഒരു വേദിയായി പ്രവർത്തിക്കാൻ ലക്ഷ്യമിടുന്നു.
സമ്പന്നത കുറഞ്ഞ രാജ്യങ്ങളിലെ തൊഴിൽ ശക്തി വർധിപ്പിക്കുന്നതിനും  രോഗങ്ങൾ കൈകാര്യം ചെയ്യാൻ സഹായിക്കുന്ന പുതിയ ഉപകരണങ്ങൾ നൽകുന്നതിനുമായി ഫൗണ്ടേഷൻ ആരോഗ്യ സംവിധാനങ്ങളിൽ നിക്ഷേപം നടത്തും.

അഞ്ച് വർഷത്തെ കാലയളവിൽ ഏഷ്യ, ആഫ്രിക്ക, മിഡിൽ ഈസ്റ്റ് എന്നിവിടങ്ങളിലായി 50-ലധികം രാജ്യങ്ങളിലെ 50 കോടിയിലധികം ആളുകളിലേക്ക് അതിന്റെ പരിപാടികൾ എത്തിച്ചേരുമെന്ന് പ്രതീക്ഷിക്കുന്നു. പ്രതിരോധ ആരോഗ്യ സംരക്ഷണം മെച്ചപ്പെടുത്തുന്നതിനും ചികിത്സാഫലങ്ങൾ മെച്ചപ്പെടുത്തുന്നതിനുമുള്ള ദീർഘകാല നീക്കത്തിന്റെ ഭാഗമായി എമിറേറ്റ്‌സ് പുതിയ സാങ്കേതികവിദ്യയും സ്വീകരിക്കുന്നു.