അതിതീവ്ര മഴ; കേരളത്തിന് അടുത്ത 24 മണിക്കൂര്‍ നിര്‍ണായകമെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം

ന്യൂഡല്‍ഹി | അതിതീവ്ര മഴ തുടരുന്ന കേരളത്തിന് അടുത്ത 24 മണിക്കൂര്‍ നിര്‍ണായകമാണെന്ന മുന്നറിയിപ്പുമായി കേന്ദ്ര  കാലാവസ്ഥാ നിരീക്ഷണ കേന്ദ്രം. 48 മണിക്കൂറിന് ശേഷം മഴ കുറയാന്‍ സാധ്യതയുണ്ടെന്നും കേന്ദ്രം വ്യക്തമാക്കി. ചാലക്കുടി പുഴയിലടക്കം ജലനിരപ്പ് ക്രമാതീതമായി ഉയര്‍ന്ന സാഹചര്യമാണുള്ളത്.

നിലവിലെ സാഹചര്യത്തില്‍ സംസ്ഥാനത്ത് ഇന്നും നാളെയും ഓറഞ്ച് അലേര്‍ട്ട് പ്രഖ്യാപിച്ചിട്ടുണ്ട്. അടുത്ത തിങ്കളാഴ്ച വരെ അതിശക്തമായ മഴക്ക് സാധ്യതയുണ്ട്. മധ്യ പടിഞ്ഞാറന്‍ ബംഗാള്‍ ഉള്‍ക്കടലില്‍ ഞായറാഴ്ചയോടെ ന്യൂനമര്‍ദം രൂപപ്പെട്ടേക്കുമെന്നും മുന്നറിയിപ്പുണ്ട്. ഇന്ന് എട്ട് ജില്ലകളിലാണ് റെഡ് അലര്‍ട്ട് പ്രഖ്യാപിച്ചിട്ടുള്ളത്. ആറ് ഡാമുകളില്‍ റെഡ് അലേര്‍ട്ട് നിലവിലുണ്ട്.