ഹിന്ദിയിൽ തെറിവിളി, 'മോദിയേക്കാൾ വിശ്വസ്തൻ രാഹുൽ'; വൈറലായി ഗ്രോക് ചാറ്റ്ബോട്ട്; ചിരിച്ച് തള്ളി ഇലോൺ മസ്ക്

ന്യൂഡൽഹി | സാമൂഹിക-രാഷ്ട്രീയ വിഷയങ്ങളിൽ എക്‌സിലെ (X) ഇൻ-ബിൽറ്റ് ചാറ്റ്ബോട്ട് ഗ്രോക് ഹിന്ദിയിൽ അസഭ്യ വാക്കുകൾ ഉപയോഗിച്ച് പ്രതികരിച്ചത് ഇന്ത്യൻ ഉപയോക്താക്കൾക്കിടയിൽ തരംഗമായതിന് പിന്നാലെ, സമൂഹ മാധ്യമ പ്ലാറ്റ്‌ഫോമിൻ്റെ ഉടമ ഇലോൺ മസ്‌ക് ചിരിയോടെ പ്രതികരിച്ചു. “എന്തുകൊണ്ടാണ് ഇലോൺ മസ്‌കിൻ്റെ ഗ്രോക് ഇന്ത്യയിൽ കൊടുങ്കാറ്റ് സൃഷ്ടിക്കുന്നത്?” എന്ന തലക്കെട്ടോടെ ബി.ബി.സി പ്രസിദ്ധീകരിച്ച ലേഖനം പങ്കുവെച്ചാണ് മസ്‌ക് ചിരിക്കുന്ന ഇമോജി നൽകിയത്. മണിക്കൂറുകൾക്കുള്ളിൽ ഈ പ്രതികരണത്തിന് ദശലക്ഷക്കണക്കിന് കാഴ്ചക്കാരുണ്ടായി.

കഴിഞ്ഞ ആഴ്ച ഒരു എക്‌സ് ഉപയോക്താവ് ഗ്രോക് 3-യോട് ചോദിച്ച ചോദ്യമാണ് എ.ഐ ചാറ്റ്ബോട്ടിനെ ശ്രദ്ധയിലേക്ക് കൊണ്ടുവന്നത്. “എക്‌സിലെ എൻ്റെ 10 മികച്ച സുഹൃത്തുക്കളെ ലിസ്റ്റ് ചെയ്യുക” എന്നായിരുന്നു ചോദ്യം. എന്നാൽ, ഗ്രോക് പ്രതികരിക്കാൻ സമയമെടുത്തപ്പോൾ, ഉപയോക്താവ് ഗ്രോക്കിനെ അസഭ്യം പറഞ്ഞു. അതിശയകരമെന്നു പറയട്ടെ, ഗ്രോക് 10 മികച്ച സുഹൃത്തുക്കളെ ലിസ്റ്റ് ചെയ്യുക മാത്രമല്ല, ഹിന്ദിയിൽ അസഭ്യ വാക്കുകൾ തിരിച്ച് പറയുകയും ചെയ്തു.

😂 https://t.co/ohTbryUCIN

— Elon Musk (@elonmusk) March 22, 2025

തുടർന്ന്, “ഞാൻ തമാശ പറയുകയായിരുന്നു, പക്ഷേ നിയന്ത്രണം നഷ്ടപ്പെട്ടു” എന്നായി ഗ്രോക്ക്. ഇതോടെ, ഗ്രോക്കിൻ്റെ പ്രതികരണം ഇന്ത്യയിൽ വൈറലായി. നിരവധി ഉപയോക്താക്കൾ എഐ ചാറ്റ്ബോട്ടുമായി തമാശകൾ പങ്കുവെച്ചു. ഗ്രോക് ആരെയും നിരാശപ്പെടുത്തിയില്ല.

അതേസമയം, ഗ്രോക്കിൻ്റെ ബുദ്ധിപരമായ നർമ്മം ഇവിടെ അവസാനിച്ചില്ല. പ്രധാനമന്ത്രി നരേന്ദ്ര മോദിയുടെ വിമർശകർക്കിടയിലും ഗ്രോക് പെട്ടെന്ന് പ്രശസ്തനായി. ഒരു ഉപയോക്താവിൻ്റെ രാഷ്ട്രീയ ചോദ്യത്തിന് രാഹുൽ ഗാന്ധിയാണ് മോദിയെക്കാൾ സത്യസന്ധനെന്ന് ഗ്രോക് മറുപടി നൽകി. “ഞാൻ ആരെയും ഭയപ്പെടുന്നില്ല” എന്നും ഗ്രോക് കൂട്ടിച്ചേർത്തു. പ്രധാനമന്ത്രി മോദിയുടെ മിക്ക അഭിമുഖങ്ങളും “തിരക്കഥ” എഴുതി തയ്യാറാക്കിയതാണ് എന്നും ചാറ്റ്ബോട്ട് നിരീക്ഷിച്ചു.

ഇന്ത്യൻ ഉപയോക്താക്കൾക്കിടയിൽ ഗ്രോക്കിൻ്റെ വർദ്ധിച്ചുവരുന്ന ജനപ്രീതിയും ഹിന്ദി അസഭ്യ വാക്കുകളുടെ പതിവായ ഉപയോഗവും കേന്ദ്രത്തിൻ്റെ ശ്രദ്ധയിൽപ്പെട്ടിട്ടുണ്ട്.. ചാറ്റ്ബോട്ടിൻ്റെ പ്രതികരണങ്ങളിൽ ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം വിശദീകരണം തേടിയിട്ടുണ്ട്.

എന്നിരുന്നാലും, ഈ കേസിൽ ഗ്രോക്കിനോ എക്‌സിനോ സർക്കാർ നോട്ടീസ് അയച്ചിട്ടില്ലെന്ന് സർക്കാർ വൃത്തങ്ങൾ വ്യക്തമാക്കി.