മാനദണ്ഡങ്ങളില്ലാതെ ഇനി ആശമാര്‍ക്ക് ഓണറേറിയം; ഇന്‍സെന്റീവിനുള്ള മാനദണ്ഡങ്ങളിലും ഇളവ്

തിരുവനന്തപുരം | ആശ പ്രവര്‍ത്തകര്‍ക്ക് ഓണറേറിയം തുക ലഭിക്കാനുള്ള 10 മാനദണ്ഡങ്ങളും ഒഴിവാക്കി സര്‍ക്കാര്‍. ഇന്‍സെന്റീവിനുള്ള മാനദണ്ഡങ്ങളിലും ഇളവ് വരുത്തിയിട്ടുണ്ടെന്ന് സമരസമിതി നേതാക്കള്‍ പറഞ്ഞു.

സമരം ഒരു മാസം പിന്നിട്ടതിന് പിന്നാലെ ഇന്ന് സെക്രട്ടേറിയേറ്റ് ഉപരോധം നടത്തുകയാണ് ആശമാര്‍. ഇതിനിടെയാണ് ഓണറേറിയം സംബന്ധിച്ച് സര്‍ക്കാറിന്റെ ഉത്തരവിറങ്ങിയത്. ഓണറേറിയം നല്‍കുന്നതിന് ഏര്‍പ്പെടുത്തിയിട്ടുള്ള അഞ്ച് മാനദണ്ഡങ്ങള്‍ നേരത്തേ പിന്‍വലിച്ചിരുന്നു. ബാക്കിയുള്ളത് കൂടിയാണ് ഇപ്പോള്‍ പിന്‍വലിച്ചത്. ആരോഗ്യമന്ത്രി വീണാ ജോര്‍ജുമായി നടത്തിയ ചര്‍ച്ചയില്‍ ഓണറേറിയം ലഭിക്കാനുള്ള നിര്‍ദേശങ്ങള്‍ പിന്‍വലിക്കുമെന്ന് ഉറപ്പ് നല്‍കിയിരുന്നു.

നിലവില്‍ പ്രതിമാസം 7,000 രൂപയാണ് ആശമാര്‍ക്ക് ഓണറേറിയമായി ലഭിക്കുന്നത്. 10 മാനദണ്ഡങ്ങളില്‍ അഞ്ചെണ്ണം പൂര്‍ത്തീകരിച്ചാലാണ് ഓണറേറിയമായ 7,000 രൂപ ലഭിക്കുക. എന്നാല്‍ ഇനി മുതല്‍ ഓണറേറിയം ലഭിക്കാന്‍ മാനദണ്ഡങ്ങളുണ്ടാകില്ല. ഒപ്പം ഭവന സന്ദര്‍ശനത്തിനും മറ്റ് പ്രവര്‍ത്തനങ്ങള്‍ക്കുമായി പ്രതിമാസം നല്‍കിവരുന്ന ഫിക്സഡ് ഇന്‍സെന്റീവായ 3,000 അനുവദിക്കുന്നതിനുള്ള മാനദണ്ഡങ്ങളിലുമാണ് സര്‍ക്കാര്‍ ഭേദഗതി വരുത്തിയത്. ആശാ സമരത്തിന്റെ വിജയമാണിതെന്ന് സമര സമിതി അറിയിച്ചു.

അതിനിടെ, വിവിധയിടങ്ങളില്‍ നിന്നായി എത്തിയ നൂറ് കണക്കിന് ആശാ പ്രവര്‍ത്തകര്‍ സെക്രട്ടേറിയറ്റ് ഉപരോധിക്കുകയാണ്. രാവിലെ 10 മണിയോടെ വിവിധ ജില്ലകളില്‍ നിന്നെത്തിയ ആശമാര്‍ പ്രതിഷേധവുമായി സമര ഗേറ്റിലേക്ക് നീങ്ങി. തുടര്‍ന്ന് റോഡിലിരുന്നും കിടന്നും പ്രതിഷേധം തീര്‍ത്തായിരുന്നു നിയമ ലംഘന സമരം.