ഐ ബി ഉദ്യോഗസ്ഥയുടെ മരണം; സുകാന്തിനെ പ്രതിചേര്‍ത്തു

തിരുവനന്തപുരം | തിരുവനന്തപുരം വിമാനത്താവളത്തിലെ ഐ ബി ഉദ്യോഗസ്ഥയുടെ മരണത്തില്‍ ഐ ബി ഉദ്യോഗസ്ഥന്‍ സുകാന്തിനെ പ്രതി ചേര്‍ത്തു. ബലാത്സംഗം, തട്ടിക്കൊണ്ടുപോകല്‍ വകുപ്പുകളാണ് മലപ്പുറം സ്വദേശിയായ സുകാന്തിനെതിരെ ചുമത്തിയിട്ടുള്ളത്. പേട്ട പോലീസാണ് നടപടി സ്വീകരിച്ചത്.

സുകാന്തിനെതിരെ മരിച്ച യുവതിയുടെ കുടുംബം ഗുരുതര ആരോപണം ഉന്നയിച്ചിരുന്നു. മകള്‍ ലൈംഗിക, സാമ്പത്തിക ചൂഷണങ്ങള്‍ക്ക് ഇരയായെന്നും മകളെ ആത്മഹത്യയിലേക്ക് നയിച്ചത് സുകാന്താണെന്നുമാണ് പിതാവിന്റെ ആരോപണം. ഐ ബി ഉദ്യോഗസ്ഥയുടെ മരണത്തിനു പിന്നാലെ ഒളിവില്‍ പോയ സുകാന്തിനായി പോലീസ് ലുക്ക് ഔട്ട് നോട്ടീസ് പുറപ്പെടുവിച്ചിരുന്നു. ഇതിനിടെ, മുന്‍കൂര്‍ ജാമ്യം തേടി സുകാന്ത് ഹൈക്കോടതിയെ സമീപിക്കുകയും ചെയ്തു. നിരപരാധിയാണെന്നും ഐ ബി ഉദ്യോഗസ്ഥയുടെ മരണത്തില്‍ പങ്കില്ലെന്നുമാണ് മുന്‍കൂര്‍ ജാമ്യാപേക്ഷയില്‍ ഉള്ളത്.

കഴിഞ്ഞ മാസം 24നാണ് പേട്ട റെയില്‍വേ സ്റ്റേഷന് സമീപം ഐ ബി ഉദ്യോഗസ്ഥയെ ട്രെയിന്‍ തട്ടി മരിച്ച നിലയില്‍ കണ്ടെത്തിയത്.