മൂന്നാറില്‍ കക്കൂസ് മാലിന്യം പുഴയിലേക്ക് ഒഴുക്കി; ഹോട്ടലും റിസോര്‍ട്ടും പൂട്ടിച്ചു

ഇടുക്കി| മൂന്നാറില്‍ കക്കൂസ് മാലിന്യം പുഴയിലേക്ക് ഒഴുക്കിയ ഹോട്ടലും റിസോര്‍ട്ടും പൂട്ടിച്ച് ആരോഗ്യ വകുപ്പ്. മൂന്നാര്‍ ടൗണില്‍ പ്രവര്‍ത്തിക്കുന്ന അല്‍ ബുഹാരി ഹോട്ടല്‍, തങ്കം ഇന്‍ റിസോര്‍ട്ട് എന്നിവയാണ് പൂട്ടിച്ചത്. സ്ഥാപനങ്ങള്‍ക്ക് ഒരു ലക്ഷം രൂപ വീതം പിഴയും ചുമത്തി.

റോഡരികില്‍ സ്ഥിതി ചെയ്യുന്ന ഈ കെട്ടിടങ്ങളുടെ പിന്‍ഭാഗത്തുള്ള നല്ലതണ്ണിയാറിലേക്കാണ് കക്കൂസ് മാലിന്യം ഒഴുക്കിയത്. നല്ലതണ്ണിയാര്‍ ഒഴുകിയെത്തുന്നത് മുതിരപ്പുഴയാറിലേക്കാണ്. മുതിരപ്പുഴയാറിലെ വെള്ളം കുടിവെള്ളമായി ഉപയോഗിക്കുന്നുണ്ട്.

പ്രദേശവാസികള്‍ നല്‍കിയ പരാതിയെ തുടര്‍ന്നാണ് നടപടി. പ്രദേശത്ത് ദുര്‍ഗന്ധം അനുഭവപ്പെട്ടതോടെ നാട്ടുകാര്‍ ആരോഗ്യ വകുപ്പിനെയും പഞ്ചായത്തിനെയും സമീപിക്കുകയായിരുന്നു. പരിശോധനയില്‍ പരാതി ശരിയാണെന്ന് കണ്ടെത്തി.

അനിശ്ചിത കാലത്തേക്കാണ് ഹോട്ടലും റിസോര്‍ട്ടും അടപ്പിച്ചത്. കൃത്യമായി മാലിന്യം സംസ്‌കരിക്കാനുള്ള നടപടി സ്വീകരിച്ച ശേഷം മലിനീകരണ നിയന്ത്രണ ബോര്‍ഡിന്റെയും ആരോഗ്യ വകുപ്പിന്റെയും അനുമതി ലഭിച്ചെങ്കിലേ ഹോട്ടലും റിസോര്‍ട്ടും തുറക്കാന്‍ കഴിയൂവെന്ന് പഞ്ചായത്ത് അധികൃതര്‍ അറിയിച്ചു.