Kerala
ആലപ്പുഴയില് അസാധാരണ വൈകല്യത്തോടെ കുഞ്ഞു പിറന്ന സംഭവം; ചികിത്സാപ്പിഴവ് സമ്മതിച്ച് ആരോഗ്യവകുപ്പ്
ഡോ. സി വി പുഷ്പ കുമാരി, ഡോ. കെ എ ഷെര്ലി എന്നിവര്ക്കെതിരെ നടപടിക്ക് ശിപാര്ശ ചെയ്തു

ആലപ്പുഴ|ആലപ്പുഴയില് അസാധാരണ വൈകല്യത്തോടെ കുഞ്ഞു പിറന്ന സംഭവത്തില് ചികിത്സാപ്പിഴവ് സമ്മതിച്ച് ആരോഗ്യവകുപ്പ്. മാതാവിന് ആദ്യ മൂന്നുമാസം നല്കിയ പ്രസവ ചികിത്സ തൃപ്തികരമല്ലെന്ന് ആരോഗ്യവകുപ്പ് വ്യക്തമാക്കി. അപകടസാധ്യത അറിയിക്കുന്നതില് രണ്ട് ഗൈനക്കോളജിസ്റ്റുകളും പരാജയപ്പെട്ടെന്നും കണ്ടെത്തി. സംഭവത്തില് ഡോ. സി വി പുഷ്പ കുമാരി, ഡോ. കെ എ ഷെര്ലി എന്നിവര്ക്കെതിരെ നടപടിക്ക് ശിപാര്ശ ചെയ്തിട്ടുണ്ട്.
അന്വേഷണ റിപ്പോര്ട്ടിന്റെ പകര്പ്പ് കുടുംബത്തിന് കൈമാറി. അന്വേഷണം നടത്തി മാസങ്ങള് കഴിഞ്ഞിട്ടും റിപ്പോര്ട്ട് പുറത്തുവിടാത്തതിനെതിരെ കുടുംബം മുഖ്യമന്ത്രിക്ക് പരാതി നല്കിയിരുന്നു. പിന്നാലെയാണ് അന്വേഷണ റിപ്പോര്ട്ട് തപാല് വഴി നല്കിയത്.
2024 നവംബര് എട്ടിനാണ് ആലപ്പുഴ സക്കറിയ ബസാര് സ്വദേശികളായ അനീഷ് -സുറുമി ദമ്പതികള്ക്ക് കുഞ്ഞു പിറന്നത്. നിരവധി വൈകല്യങ്ങളോടെയായിരുന്നു കുഞ്ഞ് ജനിച്ചത്. കുഞ്ഞിന്റെ ചെവിയും കണ്ണും ക്രമംതെറ്റിയായിരുന്നു. വായ തുറക്കുന്നില്ല. മലര്ത്തികിടത്തിയാല് കുഞ്ഞിന്റെ നാവ് ഉള്ളിലേക്ക് പോകും കാലിനും കൈക്കും വളവുണ്ട്. ഗര്ഭകാലത്തെ സ്കാനിങ്ങില് ഡോക്ടര്മാര് വൈകല്യം അറിയിച്ചില്ലെന്നാണ് കുടുംബത്തിന്റെ പരാതി.