ഇംഗ്ലണ്ടിനെ കശക്കി ഇന്ത്യ; ആധികാരിക ജയത്തോടെ ഫൈനലില്‍

ക്വാലാലംപുര്‍ | അണ്ടര്‍ 19 വനിതാ ടി20 ലോകകപ്പില്‍ നിലവിലെ ചാമ്പ്യന്മാരായ ഇന്ത്യ ഫൈനലില്‍. ഇന്ന് നടന്ന സെമിയില്‍ ഒമ്പത് വിക്കറ്റിന് ഇംഗ്ലണ്ടിനെ തകര്‍ത്താണ് ഇന്ത്യ കലാശക്കളിക്ക് അര്‍ഹത നേടിയത്. ഞായറാഴ്ച നടക്കുന്ന ഫൈനലില്‍ ദക്ഷിണാഫ്രിക്കയാണ് ഇന്ത്യയുടെ എതിരാളികള്‍.

ആധികാരിക വിജയമായിരുന്നു ഇന്ത്യയുടേത്. മത്സരത്തിന്റെ ഒരു ഘട്ടത്തിലും ഇംഗ്ലണ്ടിന് ശോഭിക്കാനായില്ല. ടോസിന്റെ ആനുകൂല്യം ലഭിച്ചത് ഇംഗ്ലണ്ടിനായിരുന്നു. ബാറ്റിങ് തിരഞ്ഞെടുത്ത ഇംഗ്ലണ്ടിന് രണ്ട് വിക്കറ്റ് കൈയിലിരിക്കെ നിശ്ചിത 20 ഓവറില്‍ 113 റണ്‍സ് മാത്രമേ നേടാനായുള്ളൂ. ഒരു വിക്കറ്റ് മാത്രം നഷ്ടപ്പെടുത്തി, 30 പന്തുകള്‍ ബാക്കിയിരിക്കേ ഇന്ത്യ അനായാസം ലക്ഷ്യത്തിലെത്തി.

കരുത്തരായ ആസ്‌ത്രേലിയയുടെ വെല്ലുവിളി മറികടന്നാണ് ദക്ഷിണാഫ്രിക്ക ഫൈനലിലെത്തിയത്. അഞ്ച് വിക്കറ്റിനായിരുന്നു ജയം. ആസ്േ്രതലിയ നിശ്ചിത 20 ഓവറില്‍ എട്ടു വിക്കറ്റ് നഷ്ടത്തില്‍ നേടിയ 105 റണ്‍സ് ദക്ഷിണാഫ്രിക്ക 11 പന്തും അഞ്ച് വിക്കറ്റും ബാക്കിയിരിക്കേ മറികടന്നു.

ഇന്ത്യയുടെ ഓപ്പണിങ് വിക്കറ്റ്, രണ്ടാം വിക്കറ്റ് കൂട്ടുകെട്ടുകളില്‍ നിന്ന് അര്‍ധശതക കൂട്ടുകെട്ടുകള്‍ പിറന്നു. 50 പന്തില്‍ 56 റണ്‍സെടുത്ത ജി കമാലിനിയാണ് ടോപ് സ്‌കോറര്‍. കമാലിനിയുടെ ബാറ്റില്‍ നിന്ന് എട്ട് ഫോറുകള്‍ പറന്നു. ജി തൃഷ 20 പന്തില്‍ അഞ്ച് ഫോറിന്റെ അകമ്പടിയോടെ 35 റണ്‍സെടുത്തു. ടൂര്‍ണമെന്റിലെ നിലവിലെ ടോപ് സ്‌കോററാണ് തൃഷ.

ഓപ്പണിങ് വിക്കറ്റില്‍ കമാലിനി-തൃഷ സഖ്യം 54 പന്തില്‍ 60 റണ്‍സെടുത്തു. പിരിയാത്ത രണ്ടാം വിക്കറ്റ് കൂട്ടുകെട്ടില്‍ കമാലിനി-സനിക സഖ്യം 36 പന്തില്‍ 57 റണ്‍സ് കൂടി കൂട്ടിച്ചേര്‍ത്ത് ഇന്ത്യയെ ലക്ഷ്യത്തിലെത്തിച്ചു.

ഇംഗ്ലണ്ടിനായി ഓപ്പണര്‍ ഡേവിന പെറിന്‍ 45 റണ്‍സെടുത്ത് ടോപ് സ്‌കോററായി. 40 പന്തില്‍ ആറു ഫോറും രണ്ടു സിക്‌സും സഹിതമാണ് പെറിന്‍ 45ല്‍ എത്തിയത്. നായകന്‍ അബി നോര്‍ഗ്രോവ് 25 പന്തില്‍ മൂന്നു ഫോറിന്റെയും ഒരു സിക്‌സിന്റെയും അകമ്പടിയോടെ 30 റണ്‍സെടുത്തു.

ഇന്ത്യയ്ക്കായി പരൂണിക സിസോദിയയും വൈഷ്ണവി ശര്‍മയും മൂന്നു വീതം വിക്കറ്റ് വീഴ്ത്തി. നാല് ഓവറില്‍ 21 റണ്‍സ് വഴങ്ങിയാണ് സിസോദിയ മൂന്നു വിക്കറ്റുകള്‍ വീഴ്ത്തിയതെങ്കില്‍ നാല് ഓവറില്‍ 23 റണ്‍സ് വഴങ്ങിയായിരുന്നു വൈഷ്ണവിയുടെ മൂന്നു വിക്കറ്റ് നേട്ടം. ആയുഷി ശുക്ല നാല് ഓവറില്‍ 21 റണ്‍സ് വിട്ടുകൊടുത്ത് രണ്ടു വിക്കറ്റെടുത്തു.