രണ്ടിടത്തും അംഗീകരിക്കപ്പെടുന്ന പ്രധാനമന്ത്രി ഇന്ത്യക്കുണ്ട്, ഞാന്‍ എന്റെ മുഖത്ത് പതിച്ച ചീമുട്ട തുടക്കുകയാണ്; മോദിയെ വീണ്ടും പുകഴ്ത്തി തരൂര്‍

ന്യൂഡല്‍ഹി |  പ്രധാനമന്ത്രി നരേന്ദ്രമോദിയെ പുകഴ്ത്തി കോണ്‍ഗ്രസിനെ വീണ്ടും പ്രതിരോധത്തിലാക്കി ശശി തരൂര്‍.നേരത്തെ അമേരിക്കന്‍ പ്രസിഡന്റ് ഡൊണാള്‍ഡ് ട്രംപുമായി മോദി നടത്തിയ കൂടിക്കാഴ്ചയെ അഭിനന്ദിച്ചതില്‍ കോണ്‍ഗ്രസിലുണ്ടായ വിവാദം കെട്ടടങ്ങും മുന്‍പാണ് മോദിക്ക് പ്രശംസയുമായി തരൂര്‍ വീണ്ടുമെത്തിയതെന്നത് ശ്രദ്ധേയമാണ്.

റഷ്യ- യുക്രൈന്‍ യുദ്ധത്തില്‍ നരേന്ദ്രമോദി സ്വീകരിച്ച നയം ശരിയെന്ന് ശശി തരൂര്‍ പറഞ്ഞു. ഇതുമായി ബന്ധപ്പെട്ട് താന്‍ മുന്‍പ് എടുത്ത നിലപാട് അബദ്ധമായി പോയെന്നും തരൂര്‍ പറഞ്ഞു. ലോകത്തിന്റെ വിവിധ ഭാഗങ്ങളില്‍ നിന്നുള്ള നയതന്ത്രവിദഗ്ധര്‍ പങ്കെടുക്കുന്ന, ഡല്‍ഹിയില്‍ വച്ച് നടന്ന റായ്സിന ഡയലോഗില്‍ ആണ് ശശി തരൂര്‍ മോദിയെ പുകഴ്ത്തിയത്. ഇതാണ് ഇപ്പോള്‍ തിരുത്തിയിരിക്കുന്നത്.

മോദിയുടെ നയത്തെ എതിര്‍ത്തത് അബദ്ധമായി പോയെന്നും തന്റെ മുഖത്ത് ഏറ്റ ചീമുട്ടയേറ് തുടച്ചു കളയുകയാണെന്നും തരൂര്‍ വ്യക്തമാക്കി. റഷ്യ- യുക്രൈന്‍ യുദ്ധത്തില്‍ മോദി സ്വീകരിച്ച നയം കാരണം ശാശ്വത സമാധാനം കൊണ്ടുവരുന്നതില്‍ രാജ്യത്തിന് മാറ്റം വരുത്താന്‍ കഴിയുന്ന അവസ്ഥയുണ്ടായതായി തരൂര്‍ പറഞ്ഞു

2022 ഫെബ്രുവരിയില്‍ പാര്‍ലമെന്ററി ചര്‍ച്ചയില്‍ ഇന്ത്യന്‍ നിലപാടിനെ വിമര്‍ശിച്ച ഒരാളാണ് ഞാന്‍. യുഎന്‍ ചാര്‍ട്ടറിന്റെ ലംഘനം നടന്നു, അതിര്‍ത്തി വ്യവസ്ഥകളില്‍ ലംഘനം നടന്നു, യുക്രൈന്‍ എന്ന രാജ്യത്തിന്റെ പരമാധികാരത്തിന്റെ ലംഘനം നടന്നു, അന്താരാഷ്ട്ര തര്‍ക്കങ്ങള്‍ പരിഹരിക്കുന്നതിന് ബലപ്രയോഗം അംഗീകരിക്കാനാവില്ല എന്നതാണ് ഞങ്ങളുടെ നിലപാട് എന്നിങ്ങനെയാണ് പറഞ്ഞത്.എന്നാല്‍ ഇപ്പോള്‍ അത് അബദ്ധമായി പോയെന്ന് ഞാന്‍ കരുതുന്നു. കാരണം രണ്ടാഴ്ച ഇടവേളയില്‍ യുക്രൈന്‍ പ്രസിഡന്റിനെയും റഷ്യന്‍ പ്രസിഡന്റിനെയും കെട്ടിപ്പിടിക്കാനും രണ്ടു രാജ്യങ്ങളുമായി നല്ല ബന്ധം നിലനിര്‍ത്താനും മോദിക്ക് കഴിഞ്ഞു.രണ്ടിടത്തും അംഗീകരിക്കപ്പെടാന്‍ കഴിയുന്ന ഒരു പ്രധാനമന്ത്രി ഇന്ത്യുണ്ടെന്ന് വ്യക്തമാണ്. ശാശ്വത സമാധാനം കൊണ്ടുവരാന്‍ കഴിയുന്ന ചുരുക്കം ചില രാജ്യങ്ങളുടെ സ്ഥാനത്തേയ്ക്ക് ഇന്ത്യ വളര്‍ന്നുവെന്നും ശശി തരൂര്‍ പറഞ്ഞു. തരൂരിന്റെ വാക്കുകളെ കോണ്‍ഗ്രസ് ഇനി എങ്ങിനെ നോക്കിക്കാണുമെന്നാണ് ഇനി അറിയാനുള്ളത്. തരൂരിന്റെ വാക്കുകള്‍ ബിജെപി പ്രതിപക്ഷത്തിന് നേരെയുള്ള ആക്രമണത്തിനായി ഉപയോഗിച്ച് തുടങ്ങിയ സാഹചര്യത്തില്‍ കോണ്‍ഗ്രസിന് പ്രതികരിക്കാതിരിക്കാനാകില്ല.