മഅ്ദിന്‍ അക്കാദമിയില്‍ അന്താരാഷ്ട്ര കലിഗ്രഫി എക്‌സ്പോക്ക് നാളെ തുടക്കം

മലപ്പുറം | മഅ്ദിന്‍ അക്കാദമിക്ക് കീഴില്‍ സംഘടിപ്പിക്കുന്ന അന്താരാഷ്ട്ര കലിഗ്രഫി എക്സ്പോക്ക് നാളെ (20-01-2024, ശനി) തുടക്കമാകും. വൈകിട്ട് നാലിന് പ്രശസ്ത അന്താരാഷ്ട്ര കലിഗ്രഫര്‍ മുഖ്താര്‍ അഹ്മദ് ബാംഗ്ലൂര്‍ ഉദ്ഘാടനം ചെയ്യും. മഅ്ദിന്‍ അക്കാദമി ചെയര്‍മാന്‍ സയ്യിദ് ഇബ്റാഹീമുല്‍ ഖലീല്‍ അല്‍ ബുഖാരി അധ്യക്ഷത വഹിക്കും.

മലയാളം കലിഗ്രഫിയുടെ പിതാവ് നാരായണ ഭട്ടതിരി മുഖ്യാതിഥിയാകും. തുര്‍ക്കി, യു എ ഇ, സഊദി അറേബ്യ, ബഹ്‌റൈന്‍, ഇന്ത്യ, ഇറാന്‍, ഇറാഖ്, ഇന്തോനേഷ്യ, ഈജിപ്ത് എന്നീ രാജ്യങ്ങളിലെ പ്രമുഖ കലിഗ്രഫര്‍മാരുടെ അറബിക്, ഇംഗ്ലീഷ്, മലയാളം സൃഷ്ടികള്‍ പ്രദര്‍ശിപ്പിക്കും.

അന്താരാഷ്ട്ര എക്സ്പോ വീക്ഷിക്കുന്നതിന് സ്‌കൂള്‍, കോളജ് വിദ്യാര്‍ഥികള്‍, പൊതുജനങ്ങള്‍ എന്നിവര്‍ക്ക് സൗജന്യ അവസരമൊരുക്കും. ഞായറാഴ്ച വൈകിട്ട് ആറു വരെ എക്സ്പോ കാണുന്നതിന് അവസരമുണ്ടാകും.

ഞായറാഴ്ച രാവിലെ 10 ന് കലിഗ്രഫി & ആര്‍ട് സെന്റര്‍ മഅ്ദിന്‍ അക്കാദമി ചെയര്‍മാന്‍ സയ്യിദ് ഇബ്റാഹീമുല്‍ ഖലീല്‍ അല്‍ ബുഖാരി നാടിന് സമര്‍പ്പിക്കും. കലിഗ്രഫി മേഖലയില്‍ താത്പര്യമുള്ളവര്‍ക്കും കൂടുതല്‍ പഠനത്തിന് ആഗ്രഹിക്കുന്നവര്‍ക്കും ഇന്‍സ്റ്റിറ്റ്യൂട്ട് വഴി വിവിധ കോഴ്സുകള്‍ നടക്കും.

അറബിക് കലിഗ്രഫിയിലെ മൂന്ന് ലിപികള്‍, മലയാളം കലിഗ്രഫി, ഇംഗ്ലീഷ് കലിഗ്രഫി, ഇസ്ലാമിക് ഇല്ലുമുനേഷന്‍, റസിന്‍ ആര്‍ട്ട്, പെന്‍സില്‍ ഡ്രോയിംഗ്, പെയിന്റിംഗ്, ഗ്രാഫിക് ഡിസൈന്‍, ടൈപോഗ്രഫി, എംബ്രോയ്ഡറി വര്‍ക്കുകള്‍ തുടങ്ങിയ കോഴ്‌സുകളാണ് കലിഗ്രഫി ആര്‍ട്ട് സെന്ററില്‍ ആരംഭിക്കുന്നത്. വിവരങ്ങള്‍ക്ക്: 9645338343, 9633677722.