പുതിയ വാര്‍ഷിക 5ജി പ്ലാനുകളുമായി ജിയോ

ഇന്ത്യയിലെ ആദ്യത്തെ 5ജി നെറ്റ്‌വർക്ക് ആരംഭിച്ചിട്ട് രണ്ടു വര്‍ഷം തികയാന്‍ പോകുന്ന വേളയിലാണ് ജിയോ പുതിയ 5ജി വാര്‍ഷിക ഓഫറുമായെത്തുന്നത്. 2022 ഒക്ടോബറിലാണ് ഇന്ത്യയിൽ 5ജി നെറ്റ്‌വർക്ക് ആരംഭിച്ചത്. അതേതുടര്‍ന്ന് എല്ലാ ടെലികോം സർക്കിളുകളിലും 5ജി മീഡിയത്തിലുള്ള ഡൗൺലോഡ് വേഗത വർദ്ധിച്ചിരുന്നു.

ജമ്മു കാശ്മീർ ഒഴികെ എല്ലായിടത്തും 200 Mbps കവിഞ്ഞു. കൊൽക്കത്തയിലാണ് ഏറ്റവും കൂടിയ വേഗത. അവിടെ 500 Mbps ആണ് വേഗത. നിലവില്‍ ഇന്ത്യയുടെ മൊബൈൽ നെറ്റ്‌വർക്ക് വേഗത 115% വർധിച്ചിട്ടുണ്ടെന്നാണ് കണക്ക്. 5ജി നെറ്റ്‌വർക്ക് ആരംഭിച്ചതിന് ശേഷം രാജ്യം സ്പീഡ്ടെസ്റ്റ് ഗ്ലോബൽ ഇൻഡക്സിൽ 49 സ്ഥാനങ്ങൾ കയറി. എയർടെല്ലിനും ജിയോയ്ക്കും 5ജി നെറ്റ്‌വർക്ക് റോൾഔട്ടിൻ്റെ കാര്യത്തിൽ അതിമോഹമായ ലക്ഷ്യങ്ങളുണ്ട്. അതിനാൽ തന്നെ ഇവര്‍ക്കിടയിലെ കിടമത്സരവും തീവ്രമാണ്.

കഴിഞ്ഞ മാസം മൊബൈൽ കമ്പനികള്‍ പുതിയ താരിഫ് പ്രഖ്യാപിക്കുന്നതുവരെ ജിയോ തങ്ങളുടെ 5ജി ഉപഭോക്താക്കള്‍ക്ക് അണ്‍ലിമിറ്റഡ് ഉപഭോഗത്തിനുള്ള അവസരം നല്‍കിയിരുന്നു. പുതിയ താരിഫ് വന്നതോടെ 5ജിക്ക് പ്രത്യേകം പ്രതിമാസ പാക്കേജുകൾ നിലവിൽ വന്നിട്ടുണ്ട്.

ഇപ്പോഴിതാ. ജിയോ പുതിയൊരു വാര്‍ഷിക പ്ലാനുമായി വന്നിരിക്കുന്നു. 3,599 രൂപ വിലയുള്ള ഈ പുതിയ പ്ലാൻ ഒരു വർഷം മുഴുവൻ തടസ്സമില്ലാത്ത സേവനം നൽകുന്നു. 365 ദിവസത്തെ വാലിഡിറ്റിയോടെ, ഉപയോക്താക്കൾക്ക് പ്രതിദിനം 2.5 ജിബി ഡാറ്റ അലവൻസ് ആസ്വദിക്കാം. വർഷത്തിൽ മൊത്തം 912.5 ജിബി. പ്ലാനിൽ അൺലിമിറ്റഡ് കോളിംഗും ഉൾപ്പെടുന്നു. അധിക നിരക്കുകളെക്കുറിച്ച് ആകുലപ്പെടാതെ നെറ്റ്‌വർക്കുകളിലുടനീളം സൗജന്യമായി കണക്റ്റുചെയ്യാൻ ഉപയോക്താക്കളെ ഈ പ്ലാൻ അനുവദിക്കും.

എന്നാൽ അത് മാത്രമല്ല. ജിയോ ഈ പ്ലാനിന്‍റെ പ്രത്യേകത. ചില അധിക ആനുകൂല്യങ്ങളും ജിയോ ഇതില്‍ ചേർത്തിട്ടുണ്ട്. ഇത് ഈ പ്ലാനിനെ കൂടുതൽ ആകർഷകമാക്കുന്നു. വരിക്കാർക്ക് പ്രതിദിനം 100 എസ്എംഎസുകളും ജിയോ ടിവി, ജിയോ സിനിമ, ജിയോ ക്ലൗഡ് എന്നിവയുൾപ്പെടെയുള്ള ജിയോയുടെ ഡിജിറ്റൽ സേവനങ്ങളിലേക്കുള്ള കോംപ്ലിമെൻ്ററി ആക്‌സസും ലഭിക്കും. 5ജി ഉപയോഗിക്കാവുന്ന സ്‌മാർട്ട്‌ഫോണുകൾ ഉള്ളവർക്ക്, 5ജി നെറ്റ്‌വർക്കില്‍ ലഭ്യമാകുന്ന ഹൈ-സ്പീഡ് ഇൻ്റർനെറ്റിൻ്റെ അധിക നേട്ടവും ഈ പ്ലാൻ വാഗ്ദാനം ചെയ്യുന്നുണ്ട്.