കർണാടക ജാതി സെൻസസ് റിപ്പോർട്ട് മന്ത്രിസഭ അംഗീകരിച്ചു; 17ന് പ്രത്യേക യോഗം ചർച്ച ചെയ്യും

ബെംഗളൂരു | കർണാടകയിലെ ഏറെ വിവാദമായ സാമൂഹിക-സാമ്പത്തിക, വിദ്യാഭ്യാസ സർവേ റിപ്പോർട്ടിന് (ജാതി സെൻസസ്) സംസ്ഥാന മന്ത്രിസഭ അംഗീകാരം നൽകി. വെള്ളിയാഴ്ച ചേർന്ന മന്ത്രിസഭാ യോഗത്തിലാണ് റിപ്പോർട്ട് അംഗീകരിച്ചത്. റിപ്പോർട്ടിലെ കണ്ടെത്തലുകൾ ചർച്ച ചെയ്യുന്നതിനായി ഏപ്രിൽ 17ന് പ്രത്യേക മന്ത്രിസഭാ യോഗം ചേരുമെന്നും സർക്കാർ അറിയിച്ചു.

2015ൽ എച്ച്. കാന്തരാജിന്റെ നേതൃത്വത്തിലുള്ള കർണാടക സംസ്ഥാന പിന്നാക്ക വിഭാഗ കമ്മീഷനാണ് സർവേക്ക് തുടക്കം കുറിച്ചത്. പിന്നീട് കമ്മീഷൻ്റെ ചുമതലയേറ്റ കെ. ജയപ്രകാശ് ഹെഗ്‌ഡെ 2024 ഫെബ്രുവരിയിൽ അന്തിമരൂപം നൽകി. മുദ്രവെച്ച കവറിൽ സമർപ്പിച്ച റിപ്പോർട്ട് മന്ത്രിസഭാ യോഗത്തിൽ വെച്ചാണ് തുറന്നത്.

റിപ്പോർട്ടിന്റെ 50 വാല്യങ്ങൾ അടങ്ങിയ പകർപ്പുകൾ എല്ലാ കാബിനറ്റ് അംഗങ്ങൾക്കും പഠിക്കുന്നതിനായി നൽകുമെന്നും ഏപ്രിൽ 17ലെ യോഗത്തിൽ വിശദമായ ചർച്ച നടക്കുമെന്നും പിന്നാക്ക വിഭാഗ ക്ഷേമ മന്ത്രി ശിവരാജ് തങ്കടഗി മാധ്യമങ്ങളോട് പറഞ്ഞു. ജാതി, സമുദായം എന്നിവയുമായി ബന്ധപ്പെട്ട വിവിധ വശങ്ങളെക്കുറിച്ചുള്ള വിശദാംശങ്ങൾ റിപ്പോർട്ടിലുണ്ട്.

സർവേയുടെ കണ്ടെത്തലുകൾ സർക്കാർ വെളിപ്പെടുത്തിയിട്ടില്ലെങ്കിലും, ഇത് ശാസ്ത്രീയമായാണ് നടത്തിയതെന്ന് സ്ഥാപിക്കാൻ ചില കണക്കുകൾ പുറത്തുവിട്ടു. 2011ലെ സെൻസസ് പ്രകാരം സംസ്ഥാനത്തെ ജനസംഖ്യ 6.11 കോടിയായിരുന്നു. 2015ൽ സർവേ നടക്കുമ്പോൾ ഇത് ഏകദേശം 6.35 കോടിയായി കണക്കാക്കപ്പെട്ടു. ഇതിൽ 5.98 കോടി പൗരന്മാരെ സർവേയിൽ ഉൾപ്പെടുത്താൻ സാധിച്ചു, ഇത് 94.17 ശതമാനം വരും. ഏകദേശം 37 ലക്ഷം പേർ (5.83%) മാത്രമാണ് സർവേയിൽ നിന്ന് വിട്ടുനിന്നതെന്നും മന്ത്രി തങ്കടഗി വിശദീകരിച്ചു.

സർവേ നടപടികൾക്കായി 1.6 ലക്ഷം ഉദ്യോഗസ്ഥരെ നിയോഗിച്ചിരുന്നു. ഒരു വിദഗ്ധ സമിതി രൂപീകരിച്ച് 54 മാനദണ്ഡങ്ങൾ തയ്യാറാക്കിയാണ് സർവേ നടത്തിയത്. ഡാറ്റ കൈകാര്യം ചെയ്യുന്നതിനായി ഭാരത് ഇലക്ട്രോണിക്സ് ലിമിറ്റഡുമായി (BEL) 43 കോടി രൂപയുടെ കരാറിൽ ഏർപ്പെട്ടു. സർവേയുടെ ആകെ ചെലവ് 165 കോടി രൂപയാണെന്നും മന്ത്രി കൂട്ടിച്ചേർത്തു.

ജാതി സെൻസസ് റിപ്പോർട്ട് കർണാടക രാഷ്ട്രീയത്തിൽ ഏറെ കോളിളക്കം സൃഷ്ടിച്ച ഒന്നാണ്. സംസ്ഥാനത്തെ പ്രബല സമുദായങ്ങളായ ലിംഗായത്തുകളും വൊക്കലിഗകളും 2015ലെ സർവേ ശരിയായ രീതിയിലല്ല നടത്തിയതെന്നും തങ്ങളുടെ എണ്ണം കുറച്ചാണ് കാണിച്ചിരിക്കുന്നതെന്നും ആരോപിച്ച് പുതിയ സർവേ വേണമെന്ന് ആവശ്യപ്പെടുന്നു. എന്നാൽ മറ്റ് പിന്നാക്ക വിഭാഗങ്ങളും (OBC) പട്ടികജാതി-പട്ടികവർഗ്ഗ (SC/ST) വിഭാഗങ്ങളും റിപ്പോർട്ട് നടപ്പാക്കണമെന്ന് വാദിക്കുന്നു.

2023ലെ നിയമസഭാ തിരഞ്ഞെടുപ്പിനും 2024ലെ ലോക്‌സഭാ തിരഞ്ഞെടുപ്പിനും മുന്നോടിയായി കോൺഗ്രസ് ജാതി സെൻസസ് റിപ്പോർട്ടിൽ നടപടിയെടുക്കുമെന്ന് വാഗ്ദാനം ചെയ്തിരുന്നു. ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധി ദേശീയ തലത്തിൽ ജാതി സെൻസസ് നടത്തണമെന്ന് നിരന്തരം ആവശ്യപ്പെടുന്നുണ്ട്. മുഖ്യമന്ത്രി സിദ്ധരാമയ്യ അടുത്തിടെ ഡൽഹിയിൽ രാഹുൽ ഗാന്ധിയുമായി കൂടിക്കാഴ്ച നടത്തിയതിനും അഹമ്മദാബാദിൽ നടന്ന കോൺഗ്രസ് സമ്മേളനത്തിനും പിന്നാലെയാണ് മന്ത്രിസഭ റിപ്പോർട്ട് അംഗീകരിച്ചത്.