കരുവന്നൂര്‍ ബേങ്ക് ക്രമക്കേട്; കെ രാധാകൃഷ്ണന്‍ എംപിയെ സാക്ഷിയാക്കാന്‍ ഇ ഡി

കൊച്ചി| കരുവന്നൂര്‍ സഹകരണ ബേങ്ക് ക്രമക്കേട് കേസില്‍ ചേലക്കര എം പിയും സി പി എം നേതാവുമായ കെ രാധാകൃഷ്ണനെ സാക്ഷിയാക്കാന്‍ എന്‍ഫോഴ്സ്മെന്റ് ഡയറക്ടറേറ്റ് (ഇ ഡി) തീരുമാനം. കെ രാധാകൃഷ്ണന്റെ മൊഴി രേഖപ്പെടുത്തിയതിനു പിന്നാലെയാണ് ഇ ഡിയുടെ നീക്കം. കെ രാധാകൃഷ്ണനെ ഇഡി ഇനി വിളിപ്പിച്ചേക്കില്ലെന്നാണ് വിവരം.

ഇന്നലെ എട്ട് മണിക്കൂറാണ് കെ രാധാകൃഷ്ണനില്‍ നിന്ന് ഇഡി മൊഴിയെടുത്തത്. കൊച്ചിയിലെ ഇ ഡി ഓഫീസിലേക്ക് വിളിച്ച് വരുത്തിയാണ് രാധാകൃഷ്ണനെ ചോദ്യം ചെയ്തത്. നേരത്തെ രണ്ട് തവണ നോട്ടീസ് നല്‍കിയിരുന്നെങ്കിലും അദ്ദേഹം ഹാജരായിരുന്നില്ല. തുടര്‍ന്നാണ് ഇന്നലെ ഹാജരാകണമെന്ന് ആവശ്യപ്പെട്ട് ഇ ഡി നോട്ടീസ് നല്‍കിയത്.

കേസില്‍ അന്തിമ കുറ്റപത്രം ഈ മാസം സമര്‍പ്പിക്കും. കരുവന്നൂര്‍ ബേങ്കില്‍ തൃശൂര്‍ ജില്ലാ കമ്മിറ്റിക്ക് അക്കൗണ്ട് ഇല്ലെന്ന് ചോദ്യം ചെയ്യലിനുശേഷം കെ രാധാകൃഷ്ണന്‍ പ്രതികരിച്ചു. അറിയാവുന്ന വിവരങ്ങള്‍ പറഞ്ഞു. തന്റെ സ്വത്ത് വിവരങ്ങള്‍ നേരത്തെ നല്‍കിയിരുന്നുവെന്നും താന്‍ പ്രതിയാണ് എന്ന മട്ടിലാണ് മറ്റുള്ളവര്‍ ഈ വിഷയത്തില്‍ പ്രചാരണം നടത്തുന്നതെന്നും അദ്ദേഹം കുറ്റപ്പെടുത്തി.