നിയന്ത്രണം വിട്ട കണ്ടെയ്‌നര്‍ വാന്‍ ഇടിച്ചു; ബൈക്ക് യാത്രികന്‍ മരിച്ചു

പന്തളം | നിയന്ത്രണം വിട്ട കണ്ടെയ്‌നര്‍ വാന്‍ ഇടിച്ച് ബൈക്ക് യാത്രികന്‍ മരിച്ചു. ഒപ്പമുണ്ടായിരുന്ന ഭാര്യയ്ക്ക് ഗുരുതര പരുക്കേറ്റു. പറക്കോട് മുകാശിഭവനില്‍ മുരുകേഷ് (39) ആണ് മരിച്ചത്. തമിഴ്‌നാട് സ്വദേശിയായ മുരുകേഷ് കുറെയായി പറക്കോട്ടാണ് താമസം.

ഇന്ന് രാവിലെ ആറരയോടെ എം സി റോഡില്‍ കുരമ്പാലയിലാണ് അപകടം സംഭവിച്ചത്. കണ്ടെയ്‌നറിന്റെ ഡ്രൈവര്‍ ഉറങ്ങിപ്പോയതാണ് അപകടത്തിനിടയാക്കിയതെന്നാണ് സംശയിക്കുന്നത്.

വാന്‍ എതിരേ വന്ന കാറില്‍ ഇടിച്ച ശേഷം കാറിന്റെ പിന്നില്‍ വന്ന ബൈക്കില്‍ ഇടിക്കുകയും നിരക്കിക്കൊണ്ടു പോവുകയുമായിരുന്നു. മുരുകേഷിനെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.