കെജരിവാളിന്റെ രാജി പ്രഖ്യാപനം; നീക്കം തന്ത്രപരം; ലക്ഷ്യങ്ങൾ പലത്

ഡൽഹി മദ്യനയക്കേസിൽ സുപ്രീം കോടതിയിൽ നിന്ന് ജാമ്യം ലഭിച്ച് രണ്ട് ദിവസത്തിനുള്ളിൽ രാജിപ്രഖ്യാപനം നടത്തിയിരിക്കുകയാണ് മുഖ്യമന്ത്രി അരവിന്ദ് കെജരിവാൾ. അപ്രതീക്ഷിതമായിട്ടായിരുന്നു, ജയിലിലിരുന്ന് സംസ്ഥാനം ഭരിച്ച നേതാവിന്റെ രാജിപ്രഖ്യാപനം. രണ്ട് ദിവസത്തിനുള്ളിൽ രാജിവെക്കുമെന്നാണ് കെജരിവാൾ അറിയിച്ചിരിക്കുന്നത്. ഇനി ജനം വോട്ട് നൽകി പിന്തുണച്ച ശേഷം മാത്രമേ മുഖ്യമന്ത്രിസ്ഥാനത്ത് മടങ്ങി എത്തൂവെന്നും എഎപി നേതാവ് പ്രഖ്യാപിച്ചു. ഇതോടെ കെജരിവാളിന്റെ അപ്രതീക്ഷിത രാജി പ്രഖ്യാപനത്തിന് പിന്നിലെ കാരണം തേടുകയാണ് രാഷ്ട്രീയ രംഗം.

കെജ്‌രിവാളിൻ്റെ രാജി തീരുമാനം തന്ത്രപരമായ നീക്കമായാണ് വിലയിരുത്തപ്പെടുന്നത്. വരാനിരിക്കുന്ന നിയമസഭാ തെരഞ്ഞെടുപ്പിന് മുന്നോടിയായി ആം ആദ്മി പാർട്ടിയെ (എഎപി) ശക്തിപ്പെടുത്താൻ രാജി ഉപകരിക്കുമെന്ന് അദ്ദേഹം കരുതുന്നു. സ്ഥാനമൊഴിയാൻ തീരുമാനിക്കുന്നതിലൂടെ, സ്വയം ഒരു രക്തസാക്ഷിയായി ചിത്രീകരിക്കാനും അഴിമതി നിറഞ്ഞ വ്യവസ്ഥയ്‌ക്കെതിരെ പോരാട്ടം തുടരുകയാണെന്ന് പ്രഖ്യാപിക്കാനും അദ്ദേഹത്തിന് സാധിക്കും. പുതിയ ജനവിധിയോടെ മാത്രമേ താൻ മുഖ്യമന്ത്രിയായി തിരിച്ചെത്തുകയുള്ളൂവെന്ന പ്രഖ്യാപനം പൊതുജന പിന്തുണ വർദ്ധിപ്പിക്കുകയും ആം ആദ്മി പാർട്ടിക്ക് വോട്ടായി മാറുകയും ചെയ്യുമെന്നും വിലയിരുത്തപ്പെടുന്നു.

എന്നാൽ ഇതത്ര എളുപ്പമുള്ള കാര്യമല്ല. എഎപിയിലെ ആഭ്യന്തര പ്രശ്നങ്ങൾ വലിയ വെല്ലുവിളിയാകും. വോട്ടർമാരെയും പാർട്ടി അംഗങ്ങളെയും തൃപ്തിപ്പെടുത്തുംവിധം ഒരു ഇടക്കാല മുഖ്യമന്ത്രിയെ കണ്ടെത്തുക എന്നതും അത്ര എളുപ്പമാകില്ല. പ്രതിപക്ഷ പാർട്ടികളായ കോൺഗ്രസും ബിജെപിയും ഈ സാഹചര്യം മുതലെടുക്കാനുള്ള സാധ്യതയുമുണ്ട്.

എന്തുകൊണ്ടാണ് കെജ്രിവാൾ രാജിവെക്കാൻ തീരുമാനിച്ചത്?

അരവിന്ദ് കെജ്‌രിവാളിൻ്റെ രാജി പ്രഖ്യാപനം സഹതാപം നേടാനും പുതിയ ജനവിധി നേടാനുമുള്ള രാഷ്ട്രീയ കളി മാത്രമല്ലെന്ന് രാഷ്ട്രീയ നിരീക്ഷകർ വാദിക്കുന്നുണ്ട്. ജാമ്യത്തിന് സുപ്രിം കോടതി വെച്ച കടുത്ത ഉപാധികൾ പാലിക്കാൻ സാധിക്കാത്തതാണ് രാജി പ്രഖ്യാപനത്തിലേക്ക് എത്തിച്ചത് എന്നാണ് ഇവർ കരുതുന്നത്. എഎപി ദേശീയ കൺവീനർ കൂടിയായ കെജരിവാളിനെ ഓഫീസിൽ ഹാജരാകുന്നതിൽ നിന്നും ഔദ്യോഗിക ഫയലുകളിൽ ഒപ്പിടുന്നതിൽ നിന്നും വിലക്കിയ സുപ്രീം കോടതി വിധി കാര്യമായ ഭരണ തടസ്സം സൃഷ്ടിക്കുമെന്ന് ഉറപ്പാണ്. അത്തരം സാഹചര്യങ്ങളിൽ മുഖ്യമന്ത്രിയായി തുടരുന്നത് പ്രധാന നയങ്ങൾ നടപ്പിലാക്കുന്നതിന് തടസ്സമാകും.

മറ്റൊരു നിർണായക ഘടകം രാഷ്ട്രപതി ഭരണത്തിൻ്റെ ഭീഷണിയായാണ്. സംസ്ഥാനത്തെ ഭരണസ്തംഭനം ചൂണ്ടിക്കാട്ടി ബി.ജെ.പിയുടെ നേതൃത്വത്തിലുള്ള കേന്ദ്ര സർക്കാരിന് ഡൽഹിയിൽ രാഷ്ട്രപതി ഭരണം ഏർപ്പെടുത്താൻ കരുക്കൾ നീക്കാൻ സാധിക്കും. ഇതിന്റെ മുനയൊടിക്കുന്നതാണ് കെജരിവാളിന്റെ നീക്കം.

രാഷ്ട്രപതി ഭരണത്തിലേക്ക് നീങ്ങുന്ന സാഹചര്യമുണ്ടായാൽ തിരഞ്ഞെടുപ്പ് ആറ് മാസം വരെ വൈകാനിടയാകും. തിരഞ്ഞെടുപ്പ് വൈകിയാൽ ജയിലിൽ നിന്ന് ഇറങ്ങിയ ശേഷം അരവിന്ദ് കെജ്‌രിവാൾ നേടിയ വൈകാരിക ആക്കം ഇല്ലാതാകുമെന്നും വിലയിരുത്തപ്പെടുന്നു. തിരഞ്ഞെടുപ്പ് വൈകുംതോറും പൊതുജന സഹതാപം പ്രയോജനപ്പെടുത്താനുള്ള സാഹചര്യം നഷ്ടപ്പെടും.

കെജ്രിവാളിൻ്റെ പിൻഗാമി ആരാകും?

കെജ്‌രിവാളിൻ്റെ പിൻഗാമിയായി ആരെ മുഖ്യമന്ത്രിയാക്കുമെന്ന അഭ്യൂഹങ്ങൾ ശക്തമാണ്. എഎപിക്കുള്ളിൽ അരവിന്ദ് കെജ്‌രിവാളിന് ഉള്ള സ്വാധീനം ഇതിൽ നിർണായകമാകും. കെജരിവാളിന്റെ വിശ്വസ്തനും പൊതുജന അംഗീകാരം നേടാൻ സാധിക്കുകയും ചെയ്യുന്ന ഒരാളെ വേണം പിൻഗാമിയാക്കാൻ. അടുത്ത അസംബ്ലി തിരഞ്ഞെടുപ്പ് വരെ സർക്കാറിനെ നയിക്കേണ്ടതും പാർട്ടിയുടെ മുഖച്ഛായ കെടാതെ സൂക്ഷിക്കേണ്ടതും പിൻഗാമിയുടെ ഉത്തരവാദിത്തമാണ്. അതിന് സാധിക്കുന്ന ഒരാളെ എംഎൽഎമാരിൽ നിന്ന് കണ്ടെത്തുക എന്ന വെല്ലുവിളി കൂടി കെജരിവാളിന് മുന്നിലുണ്ട്.

അരവിന്ദ് കെജ്‌രിവാളിൻ്റെ പിൻഗാമി ഒന്നുകിൽ നിലവിലെ കാബിനറ്റിൽ നിന്ന് തന്നെയാകും. അല്ലെങ്കിൽ ഹരിയാനയിലെയും ഡൽഹിയിലെയും നിയമസഭാ തെരഞ്ഞെടുപ്പുകളിൽ കണ്ണുവെച്ച് ജാതിസമവാക്യങ്ങൾക്ക് ഒപ്പം വെക്കാവുന്ന മറ്റൊരാളെ കണ്ടെത്താനും സാധ്യതയുണ്ട്.

രണ്ട് ദിവസത്തിനകം അരവിന്ദ് കെജ്‌രിവാൾ രാജിവെക്കാനൊരുങ്ങുമ്പോൾ ഡൽഹിയുടെ രാഷ്ട്രീയ രംഗം നിർണായകമായ മാറ്റത്തെ അഭിമുഖീകരിക്കുകയാണ്. 70 അംഗ നിയമസഭയിൽ 61 എംഎൽഎമാരുടെ വൻ ഭൂരിപക്ഷമുള്ള സാഹചര്യത്തിൽ ഓരോ തീരുമാനവും ശ്രദ്ധിച്ച് എടുക്കേണ്ടി വരും.

രാജിവച്ച ശേഷം അരവിന്ദ് കെജ്‌രിവാൾ തൻ്റെ പിൻഗാമിയുടെ പേര് ലഫ്റ്റനൻ്റ് ഗവർണർക്ക് സമർപ്പിക്കും. ഡൽഹി ദേശീയ തലസ്ഥാന പ്രദേശമായതിനാൽ, മുഖ്യമന്ത്രിയുടെ ശുപാർശ ലെഫ്റ്റനൻ്റ് ഗവർണർ ആഭ്യന്തര മന്ത്രാലയം മുഖേന രാഷ്ട്രപതിക്ക് കൈമാറും. രാഷ്ട്രപതിയുടെ അംഗീകാരം ലഭിച്ചാലുടൻ പുതിയ മുഖ്യമന്ത്രിക്ക് ചുമതലയേൽക്കാം.

മഹാരാഷ്ട്രയിലും ജാർഖണ്ഡിലും നവംബറിൽ തിരഞ്ഞെടുപ്പ് നടക്കാനിരിക്കെ, അതേ സമയപരിധിക്കുള്ളിൽ ഡൽഹിയിൽ നേരത്തെയുള്ള തെരഞ്ഞെടുപ്പിന് തയ്യാറെടുക്കുന്നത് തിരഞ്ഞെടുപ്പ് കമ്മീഷനെ സംബന്ധിച്ചിടത്തോളം വെല്ലുവിളിയാകും.