കേരളത്തിന് നിലപാടുകളുണ്ട്; പ്രതീക്ഷകളും

നിതി ആയോഗ് മുന്‍ വൈസ് ചെയര്‍മാന്‍ ഡോ. അരവിന്ദ് പനഗാരിയ ചെയര്‍മാനായ പതിനാറാം ധനകാര്യ കമ്മീഷന്‍ റിപോര്‍ട്ട് തയ്യാറാക്കുന്നതിന് മുന്നോടിയായുള്ള ചര്‍ച്ചകള്‍ക്കായി കേരളത്തിലെത്തി മടങ്ങി.സംസ്ഥാനങ്ങള്‍ക്കുള്ള ധന വിഹിതം സംബന്ധിച്ച ധനകാര്യ കമ്മീഷന്റെ റിപോര്‍ട്ടിനും തീര്‍പ്പുകള്‍ക്കും (അവാര്‍ഡുകള്‍) വലിയ പ്രാധാന്യമാണുള്ളത്. ഇന്ത്യന്‍ ഭരണഘടനയുടെ 280ാം ആര്‍ട്ടിക്കിള്‍ പ്രകാരം രൂപവത്കരിക്കപ്പെട്ട കേന്ദ്ര ധനകാര്യ കമ്മീഷന്റെ പ്രധാന ചുമതല കേന്ദ്രവും സംസ്ഥാനങ്ങളും തമ്മിലുള്ള സാമ്പത്തിക ബന്ധങ്ങളെ വിശകലനം ചെയ്യുകയും ധനകാര്യ ഇടപാടുകള്‍ക്ക് മേല്‍നോട്ടം വഹിക്കുകയുമാണ്. വ്യത്യസ്തവും നാനാത്വങ്ങള്‍ നിറഞ്ഞതുമായ നമ്മുടെ രാജ്യത്തെ ഓരോ സംസ്ഥാനങ്ങളുടെയും സവിശേഷതകള്‍ മനസ്സിലാക്കി സന്തുലിതമായി നികുതി വിതരണം നിര്‍വഹിക്കേണ്ട ചുമതലയാണ് ധനകാര്യ കമ്മീഷനുള്ളത്. രാജ്യത്തിന്റെ പൊതുവരുമാനം സംസ്ഥാനങ്ങള്‍ക്ക് നീതിയുക്തമായി ലഭിക്കുന്നതിനുള്ള തീരുമാനങ്ങളും ധനകാര്യ കമ്മീഷനാണ് കൈക്കൊള്ളുന്നത്.
2026 ഏപ്രില്‍ ഒന്ന് മുതലാണ് കമ്മീഷന്റെ ശിപാര്‍ശ പ്രകാരമുള്ള ധന വിഹിതങ്ങള്‍ കേരളത്തിനും ലഭ്യമായി തുടങ്ങുക. ധനകാര്യ കമ്മീഷന്‍ മുമ്പാകെ കേരളത്തിന്റെ ആവശ്യങ്ങള്‍ ശക്തമായി അവതരിപ്പിക്കാനായിട്ടുണ്ട്. അര്‍ഹതപ്പെട്ട സാമ്പത്തികാവകാശങ്ങളെല്ലാം നേടിയെടുക്കാനുള്ള കൃത്യമായ കണക്കു കൂട്ടലുകളോടെയാണ് കേരളം കമ്മീഷനെ സമീപിച്ചത്.
കമ്മീഷന്റെ പരിഗണനാ വിഷയങ്ങളില്‍ എന്തെല്ലാം ഉള്‍പ്പെടണമെന്ന കാര്യത്തില്‍ കേരളത്തിന്റെ നിലപാട് കൃത്യമായി തന്നെ ബോധ്യപ്പെടുത്താനായിട്ടുണ്ട്. വിഭവ സമാഹരണ അധികാരങ്ങളിലെയും ചെലവിലെയും അസമത്വം കണക്കിലെടുത്ത്, ഈ സാമ്പത്തിക അസന്തുലിതാവസ്ഥ പരിഹരിക്കുന്നതിന് ഉതകുന്ന നിര്‍ദേശങ്ങള്‍ കമ്മീഷന്റെ ശിപാര്‍ശകളില്‍ ഉള്‍പ്പെടേണ്ടതുണ്ട്. കേന്ദ്ര നികുതി വരുമാനത്തിന്റെ കേന്ദ്ര-സംസ്ഥാന വിഹിത വിഭജനത്തിലെ അസമത്വം കേരളം കമ്മീഷന്‍ മുമ്പാകെ ചൂണ്ടിക്കാട്ടി. പതിനഞ്ചാം ധന കമ്മീഷന്‍ ശിപാര്‍ശ പ്രകാരം സംസ്ഥാനങ്ങള്‍ക്ക് അനുവദിച്ച കേന്ദ്ര നികുതി വിഹിതത്തില്‍ വലിയ കുറവുണ്ടായി. നികുതിക്കു പകരമായി കേന്ദ്ര സര്‍ക്കാര്‍ വലിയ തോതില്‍ സെസും സര്‍ചാര്‍ജും സമാഹരിക്കാന്‍ തുടങ്ങി. കേന്ദ്രാവിഷ്‌കൃത പദ്ധതികളുടെ കേന്ദ്ര വിഹിതം 75 ശതമാനത്തില്‍ നിന്ന് 60 ശതമാനത്തിലേക്ക് ചുരുക്കി. ജി എസ് ടിയിലൂടെ സംസ്ഥാനങ്ങള്‍ സമാഹരിക്കുന്ന നികുതിയുടെ പകുതി കേന്ദ്രത്തിന് അവകാശപ്പെട്ടതാക്കി. ഇതെല്ലാം സംസ്ഥാനങ്ങള്‍ക്ക് വലിയ വരുമാന നഷ്ടം വരുത്തുന്നു. ഇതുകൂടി പരിഹരിക്കാന്‍ വിഭജിക്കാവുന്ന കേന്ദ്ര നികുതിയുടെ 50 ശതമാനം സംസ്ഥാനങ്ങള്‍ക്കായി നീക്കിവെക്കണമെന്നാണ് നമ്മള്‍ ആവശ്യപ്പെട്ടത്. പതിനഞ്ചാം ധനകാര്യ കമ്മീഷന്‍ ശിപാര്‍ശ 41 ശതമാനമായിരുന്നു.

കേന്ദ്ര സര്‍ക്കാറിന് മതിയായ പണലഭ്യത ഉറപ്പാക്കാന്‍ ഇപ്പോള്‍ പുതിയ നികുതിയേതര മാര്‍ഗങ്ങള്‍ പലതുമുണ്ട്. കുത്തകാവകാശം നിലനിര്‍ത്തിയിട്ടുള്ള പൊതുമേഖലാ കമ്പനികളുടെ ലാഭ വിഹിതം, സ്പെക്ട്രം വില്‍പ്പന, റിസര്‍വ് ബേങ്കിന്റെ ലാഭവിഹിതം, പൊതുമേഖലാ സ്ഥാപനങ്ങളുടെ ഓഹരി വിറ്റഴിക്കല്‍ തുടങ്ങിയവയിലൂടെ വര്‍ഷംതോറും വലിയ തുക ലഭിക്കുന്നു. ഇത്തരം നികുതിയേതര വരുമാനവും സംസ്ഥാനങ്ങളുമായി വിഭജിക്കേണ്ട ധന വിഭവങ്ങളില്‍ ഉള്‍പ്പെടുത്തണം. ഇതിനാവശ്യമായ ഭരണഘടനാ ഭേദഗതി അടിയന്തരമായി നടത്തണമെന്ന് കേന്ദ്ര സര്‍ക്കാറിനോട് ആവശ്യപ്പെടണമെന്നും കേരളം നിര്‍ദേശിച്ചു.
വികസനം, ഗുണമേന്മയുള്ള സേവനങ്ങളുടെ വിതരണം തുടങ്ങിയ കാര്യങ്ങളിലെ സംസ്ഥാനങ്ങള്‍ തമ്മിലുള്ള അസമത്വം ഇന്ത്യന്‍ സമ്പദ് ഘടനയിലെ സ്ഥിരവും വ്യാപകമായതുമായ സവിശേഷതയാണ്. ഓരോ സംസ്ഥാനത്തിന്റെയും വ്യത്യസ്ത സാഹചര്യങ്ങള്‍ ഇക്കാര്യത്തില്‍ പരിഗണിക്കണം. ആര്‍ട്ടിക്കിള്‍ 275 പ്രകാരം ഗ്രാന്റുകള്‍ അനുവദിക്കുമ്പോള്‍ വലിയ തോതില്‍ റവന്യൂ നഷ്ടം ഉണ്ടാകുന്ന സംസ്ഥാനങ്ങള്‍ക്ക് അത് പരിഹരിക്കുന്നതിന് മതിയായ റവന്യൂ കമ്മി ഗ്രാന്റ് അനുവദിക്കണം. 2011ലെ ജനസംഖ്യ മാനദണ്ഡമാക്കിയ പതിനഞ്ചാം ധനകാര്യ കമ്മീഷന്‍ സമീപനം കേരളത്തിന് വലിയ വരുമാന നഷ്ടമുണ്ടാക്കിയിരുന്നു. ദേശീയ ജനസംഖ്യാ നിയന്ത്രണ പദ്ധതി ഏറ്റവും കാര്യക്ഷമമായി നടപ്പാക്കിയതിന് കേരളത്തെ ശിക്ഷിക്കുകയാണ് ചെയ്തത്.
കൊവിഡ്, പ്രളയം, മണ്ണിടിച്ചില്‍ തുടങ്ങി പ്രകൃതി ദുരന്തങ്ങള്‍ ഒന്നിനു പിറകെ ഒന്നായി നേരിടേണ്ടി വന്നപ്പോഴും ഉയര്‍ന്ന സാമ്പത്തിക വളര്‍ച്ചയും അതില്‍ സ്ഥിരതയും കൈവരിക്കാന്‍ കേരളത്തിനായിട്ടുണ്ട്. സംസ്ഥാനം പതിനഞ്ചാം ധനകാര്യ കമ്മീഷന്‍ നിര്‍ദേശിച്ച ധനദൃഢീകരണ പാതയില്‍ മുന്നേറുകയാണെന്നതും നിവേദനത്തില്‍ ചൂണ്ടിക്കാട്ടി. സംസ്ഥാനത്ത് തദ്ദേശ സ്ഥാപനങ്ങളെ അധികാരത്താലും സാമ്പത്തികമായും വലിയ തോതില്‍ ശാക്തീകരിക്കാനായിട്ടുണ്ട്. സംസ്ഥാന വരുമാനത്തിന്റെ നിശ്ചിത ഭാഗം തദ്ദേശ സ്വയംഭരണ സ്ഥാപനങ്ങള്‍ക്കായി നീക്കിവെക്കുന്നു. ഇതേ രീതിയില്‍ കേന്ദ്ര വരുമാനത്തിന്റെ ഒരു നിശ്ചിത ഭാഗം തദ്ദേശ സ്വയംഭരണ സ്ഥാപനങ്ങള്‍ക്കു മാത്രമായി നീക്കിവെക്കുന്നുവെന്ന് ഉറപ്പുവരുത്തണം. ഇത്തരം ഗ്രാന്റ് പൂര്‍ണമായും ഉപാധിരഹിതമായിരിക്കണം.

പ്രകൃതി ദുരന്തങ്ങളുടെ ആഘാതം വലിയ തോതിലാണ് കേരളത്തെ ബാധിക്കുന്നത്. ഇത്തരം ദുരന്തങ്ങളുമായി ബന്ധപ്പെട്ട് 2010 മുതല്‍ 2015 വരെയുള്ള കാലയളവിനെ അപേക്ഷിച്ച് 2018 മുതല്‍ 2024 വരെയുള്ള കാലയളവില്‍ 4,273 കോടി രൂപയുടെ അധിക ബാധ്യത സംസ്ഥാനത്തിന് ഏറ്റെടുക്കേണ്ടിവന്നു. ഏതാണ്ട് 25 ഇരട്ടി അധിക ബാധ്യതയാണുണ്ടായത്. അടിയന്തര ദുരന്ത പ്രതികരണ പ്രവര്‍ത്തനങ്ങളുടെ ചെലവുകള്‍ 40 മടങ്ങിലേറെ ഉയര്‍ന്നു. ഇതെല്ലാം പരിഗണിച്ച് കേരളത്തിന്റെ സംസ്ഥാന ദുരിതാശ്വാസ നിധിയിലേക്കുള്ള കേന്ദ്ര വിഹിതം നൂറ് ശതമാനം ഉയര്‍ത്തണം. സംസ്ഥാനം നേരിടുന്ന തീരശോഷണം, മണ്ണിടിച്ചില്‍, അതിതീവ്ര മഴ ഉള്‍പ്പെടെയുള്ള കാര്യങ്ങള്‍ പരിഗണിച്ച് സംസ്ഥാന ദുരിതാശ്വാസ നിധിയിലേക്ക് പ്രത്യേക ഗ്രാന്റായി 13,922 കോടി രൂപ അനുവദിക്കണം.

ദൈര്‍ഘ്യമേറിയ തീരദേശം, ജനസാന്ദ്രത, വിസ്തൃത വനമേഖല, തുടര്‍ച്ചയായി റിപോര്‍ട്ട് ചെയ്യപ്പെടുന്ന മനുഷ്യ-മൃഗ സംഘര്‍ഷം, സംസ്ഥാനത്തിന് അകത്തേക്കും പുറത്തേക്കുമുള്ള തൊഴില്‍പരമായ കുടിയേറ്റം, മുതിര്‍ന്ന പൗരന്മാരുടെ എണ്ണത്തിലുണ്ടാകുന്ന വര്‍ധന തുടങ്ങിയ ഘടകങ്ങള്‍ സംസ്ഥാനത്തിന്റെ പൊതുചെലവ് ഉയര്‍ത്തുന്നു. കേരളത്തിലെ 30 ശതമാനം ജനങ്ങള്‍ തീരദേശത്താണ് താമസിക്കുന്നത്. 586 കിലോമീറ്റര്‍ വരുന്ന തീരദേശത്തെ 360 കിലോമീറ്ററും തീരശോഷണ ഭീഷണി നേരിടുന്നു. കാലാവസ്ഥാ വ്യതിയാനം മൂലം കടല്‍ നിരപ്പ് ഉയരുന്നത് മറ്റൊരു വെല്ലുവിളിയാണ്. സംസ്ഥാനത്തിന്റെ ഭൂവിസ്തൃതിയില്‍ 55 ശതമാനവും വനമാണ്. ഒരു ചതുരശ്ര കിലോമീറ്ററില്‍ 1,898 പേര്‍ എന്നതാണ് കേരളത്തിലെ ജനസാന്ദ്രത. ജനസംഖ്യയില്‍ മുന്നില്‍ നില്‍ക്കുന്ന ബിഹാര്‍, പശ്ചിമ ബംഗാള്‍ ഉള്‍പ്പെടെ സംസ്ഥാനങ്ങളുടെ ഇരട്ടിയോളമാണിത്. ഉയര്‍ന്ന ജനസാന്ദ്രതയും ഭൂമിയുടെ ലഭ്യതയിലെ കുറവും മൂലം സംസ്ഥാനത്ത് വികസന പ്രവര്‍ത്തനങ്ങള്‍ക്ക് ഏറ്റെടുക്കുന്ന ഭൂമിക്ക് വളരെ ഉയര്‍ന്ന വില നല്‍കേണ്ടിവരുന്നു. ദേശീയപാതാ വികസനത്തിന് ഏറ്റെടുത്ത ഭൂമിക്ക് വിലയുടെ 25 ശതമാനം സംസ്ഥാനം നല്‍കേണ്ടിവന്നു. അതിവേഗ നഗരവത്കരണം സവിശേഷ സാഹചര്യങ്ങള്‍ സൃഷ്ടിക്കുന്നു. അതിനാല്‍ തന്നെ ധനവിഭവ വിഭജന മാനദണ്ഡങ്ങളില്‍ ഭൂവിസ്തൃതി, ഭൂമിയുടെ വില, നഗരവത്കരണത്തിന്റെ തോത് എന്നിവക്കൊപ്പം ജനസാന്ദ്രതയും സൂചകങ്ങളാകണം.

2036 ആകുമ്പോഴേക്കും കേരളത്തിലെ മുതിര്‍ന്ന പൗരന്മാരുടെ എണ്ണം ഇരട്ടിയാകുമെന്നാണ് കണക്കാക്കുന്നത്. 2011ലെ 42 ലക്ഷത്തില്‍ നിന്ന് 2036ല്‍ 84 ലക്ഷത്തിലേക്ക് എത്തും. ഇതെല്ലാം സംസ്ഥാനത്തിന്റെ റവന്യൂ ചെലവ് വലിയ തോതില്‍ ഉയര്‍ത്താവുന്ന ഘടകങ്ങളാണ്. മുതിര്‍ന്ന പൗരന്മാര്‍ക്ക് സംരക്ഷണം ഉറപ്പാക്കുന്ന പദ്ധതികള്‍ക്കും ആവശ്യത്തിന് പണം ലഭ്യമാക്കാന്‍ കഴിയാത്ത സ്ഥിതിയിലാണ് സംസ്ഥാനം. ഇതെല്ലാം പരിഗണിച്ച് മേഖലകള്‍ തിരിച്ചും സംസ്ഥാനത്തിന്റെ സവിശേഷമായ പ്രശ്നങ്ങള്‍ പരിഗണിച്ചും പ്രത്യേക ഉപാധിരഹിത ഗ്രാന്റുകള്‍ ലഭ്യമാക്കണം.

പാര്‍ലിമെന്റും സംസ്ഥാന നിയമസഭകളും പാസ്സാക്കിയ ധനഉത്തരവാദിത്വ നിയമത്തിലെ വ്യവസ്ഥകള്‍ക്ക് അതീതമായി, സംസ്ഥാനത്തിന്റെ കടമെടുപ്പ് അവകാശങ്ങളില്‍ കേന്ദ്ര സര്‍ക്കാര്‍ നടത്തുന്ന കൈകടത്തലുകളും സംസ്ഥാനം വിവരിച്ചിട്ടുണ്ട്. ഇത്തരത്തില്‍ കേരളത്തിന്റെ പ്രത്യേകതകള്‍ ചൂണ്ടിക്കാണിച്ചാണ് ധനകാര്യ കമ്മീഷനു മുമ്പില്‍ കേരളം കാര്യങ്ങള്‍ അവതരിപ്പിച്ചത്. നികുതി വിഹിതം സംസ്ഥാനങ്ങള്‍ക്ക് വിഭജിച്ചു നല്‍കുന്നതിലെ അസന്തുലിതാവസ്ഥ പരിഹരിക്കുന്നത് സംബന്ധിച്ചും ഗ്രാന്റുകള്‍ യഥാസമയം ലഭ്യമാക്കാനുള്ള നടപടികള്‍ സംബന്ധിച്ചും ധനകാര്യ കമ്മീഷനെ ബോധ്യപ്പെടുത്താന്‍ കഴിഞ്ഞുവെന്നാണ് വിശ്വാസം. അര്‍ഹമായ പരിഗണന കിട്ടുമെന്ന് തന്നെയാണ് പ്രതീക്ഷ.