കിയ സിറോസ് വിപണിയിലെത്തി; വിലയിൽ വൻ സർപ്രൈസ്‌

വാഹനപ്രേമികൾ കാത്തിരുന്ന കിയയുടെ പുതിയ കോംപാക്‌ട്‌ എസ്‌യുവി സിറോസ്‌ വിപണിയിൽ എത്തി. ഏവരെയും ഞെട്ടിച്ച്‌ വാഹനവിലയും കമ്പനി പുറത്തുവിട്ടു. 8.99 ലക്ഷം രൂപ മുതൽ 16.99 ലക്ഷം രൂപ വരെയാണ് എക്‌സ്‌ ഷോറൂം വില. പതിനൊന്ന് മോഡലുകളിലായി എസ്‍യുവിയുടെ പെട്രോൾ മോഡലിന് 8.99 ലക്ഷം മുതൽ 13.29 ലക്ഷം വരെയും പെട്രോൾ ഡിസിടി ഓട്ടമാറ്റിക്കിന് 12.79 ലക്ഷം രൂപ മുതൽ 15.99 ലക്ഷം വരെയുമാണ് വില. ഡീസൽ മോഡലിന്‍റെ മാനുവലിന് 10.99 ലക്ഷം മുതൽ 14.29 ലക്ഷം വരെയും ഓട്ടമാറ്റിക്കിന് 16.99 ലക്ഷം രൂപയുമാണ് വില.

നാലു മീറ്ററിൽ താഴെയുള്ള എസ്‍യുവി വിഭാഗത്തിലാണ് സിറോസ്‌ മത്സരിക്കുക. തുടക്കത്തിൽ ഐസിഇ എൻജിനും പിന്നീട് ഇലക്ട്രിക് മോഡലും വിപണിയിലെത്തുമെന്നാണ് കിയ അറിയിക്കുന്നത്. ജനുവരി 3 മുതൽ വാഹനത്തിന്‍റെ ബുക്കിങ് ആരംഭിച്ചിരുന്നു.

കിയയുടെ ഇലക്ട്രിക് എസ്‍യുവി ഇവി9, ഇവി3 എന്നിവയിൽ നിന്ന് പ്രചോദനം ഉൾക്കൊണ്ടാണ് സിറോസിന്‍റെ ഡിസൈൻ. റിഇൻഫോഴ്സിഡ് കെ1 പ്ലാറ്റ്ഫോമിലാണ് നിർമാണം. എസ്‍യുവികൾക്ക് ചേർന്ന ബോക്സി ഡിസൈൻ. വെർട്ടിക്കൽ എൽഇഡി പ്രൊജക്റ്റർ ഹെഡ്‍ലാംപുമാണ് വാഹനത്തിന്. ടോൾ ബോയ് ഡിസൈനിലുള്ള വാഹനത്തിന് കറുത്ത എ,സി,ഡി പില്ലറുകളും നൽകിയിട്ടുണ്ട്. വ്യത്യസ്ത രൂപത്തിലുള്ള 17 ഇഞ്ച് അലോയ് വീലുകളാണ് വാഹനത്തിന്. വീൽ ആർച്ചുകളിൽ പ്ലാസ്റ്റിക് ക്ലാഡിങ്ങും നൽകിയിരിക്കുന്നു. എൽ ആകൃതിയിലുള്ള ടെയിൽ ലാംപും മനോഹര പിൻഭാഗവുമുണ്ട്. പനോരമിങ് സൺറൂഫുമുണ്ട് വാഹനത്തിന്.

ഡാഷ്ബോർഡിൽ 30 ഇഞ്ച് ഡിസ്പ്ലെയാണ് നൽകിയിരിക്കുന്നത്. പിന്നിൽ എസി വെന്‍റുകൾ, റിക്ലൈൻ ചെയ്യാവുന്ന പിൻ സീറ്റുകൾ, ഇന്‍റീരിയറിൽ അംബിയന്‍റ്‌ ലൈറ്റിങ് എന്നിവ നൽകിയിരിക്കുന്നു. ഡൈനാമിക്ക് ഡോർ പാഡുകളാണ്. വ്യത്യസ്ത രൂപമുള്ള സ്റ്റൈലൻ ഗിയർനോബ്. വയര്‍ലെസ് ചാര്‍ജര്‍, ടൈപ്പ് സി ചാര്‍ജിങ് പോര്‍ട്ട്, ഡിജിറ്റല്‍ ഇന്‍സ്ട്രുമെന്‍റ്‌ ക്ലസ്റ്റര്‍ എന്നിവയാണ് പ്രധാന ഇന്‍റീരിയര്‍ ഫീച്ചറുകള്‍.

പുതിയ സ്റ്റിയറിങ് വീലും മികച്ച സെന്‍റര്‍ കണ്‍സോളും റിയര്‍ എസി വെന്‍റുകളും റിക്ലൈനിങ് പിന്‍ സീറ്റുകളുമെല്ലാം സിറോസിന്‍റെ അധിക ഫീച്ചറുകളാണ്‌. ലൈവൽ 2 എഡിഎഎസാണ് വാഹനത്തിൽ. 20 സുരക്ഷ ഫീച്ചറുകള്‍ അടിസ്ഥാന മോഡൽ മുതലുണ്ട്. ഹർമൻ കാർഡൻ പ്രീമിയം സൗണ്ട് സിസ്റ്റം, റിമോട്ട് വിന്‍റൊ ഡൗൺ എന്നിവയുമുണ്ട്.