Kerala
കാര് കയറ്റി കൊല: ഡോ. ശ്രീക്കുട്ടിക്ക് ജാമ്യം അനുവദിച്ചു
കേസില് പ്രേരണാകുറ്റം ചുമത്തിയിരുന്ന ഡോ. ശ്രീക്കുട്ടിയുടെ ജാമ്യാപേക്ഷയില് ശനിയാഴ്ച വാദം പൂര്ത്തിയായിരുന്നു. നിലവില് അട്ടക്കുളങ്ങര ജയിലിലാണ് പ്രതി ശ്രീക്കുട്ടിയുള്ളത്.
കൊല്ലം | കൊല്ലം മൈനാഗപ്പള്ളിയില് സ്കൂട്ടര് യാത്രക്കാരിയെ കാര് കയറ്റി കൊലപ്പെടുത്തിയ കേസിലെ രണ്ടാം പ്രതിയായ ഡോ. ശ്രീക്കുട്ടിക്ക് കൊല്ലം പ്രിന്സിപ്പല് സെഷന്സ് കോടതി ജാമ്യം അനുവദിച്ചു. കേസില് പ്രേരണാകുറ്റം ചുമത്തിയിരുന്ന ഡോ. ശ്രീക്കുട്ടിയുടെ ജാമ്യാപേക്ഷയില് ശനിയാഴ്ച വാദം പൂര്ത്തിയായിരുന്നു. നിലവില് അട്ടക്കുളങ്ങര ജയിലിലാണ് പ്രതി ശ്രീക്കുട്ടിയുള്ളത്.
കരുനാഗപ്പള്ളി സ്വദേശി അജ്മലും സ്വകാര്യ ആശുപത്രിയിലെ ഡോക്റായികുന്ന ശ്രീക്കുട്ടിയും സഞ്ചരിച്ച കാര് കുഞ്ഞുമോളും ബന്ധുവും സഞ്ചരിച്ച സ്കൂട്ടറില് ഇടിച്ചു. മദ്യലഹരിയില് ആയിരുന്ന പ്രതികള് രക്ഷപ്പെടാന് ശ്രമിക്കുന്നതിനിടെ റോഡില് വീണുകിടന്ന കുഞ്ഞുമോളുടെ ശരീരത്തിലൂടെ കാര് കയറ്റിയിറക്കുകയായിരുന്നു. കാറോടിച്ച ഒന്നാം അജ്മലിനെതിരെ മനപ്പൂര്വമുള്ള നരഹത്യ കുറ്റമാണ് ചുമത്തിയത്. കാറിന്റെ പിന്സീറ്റിലായിരുന്നു രണ്ടാം പ്രതി ശ്രീക്കുട്ടി. ശ്രീക്കുട്ടിയുടെ പ്രേരണയിലാണ് അജ്മല് കാറുമായി രക്ഷപ്പെടാന് ശ്രമിച്ചതെന്ന് ദൃക്സാക്ഷികള് പറഞ്ഞിരുന്നു. ഇതിന്റെ അടിസ്ഥാനത്തിലാണ് പ്രതിക്കെതിരെ പ്രേരണ കുറ്റം ചുമത്തിയത്.
ശാസ്താംകോട്ട മജിസ്ട്രേറ്റ് കോടതി ശ്രീക്കുട്ടിയുടെ ജാമ്യാപേക്ഷ തള്ളിയതോടെ പ്രതിഭാഗം ജില്ലാ സെഷന് കോടതിയെ സമീപിച്ചിരുന്നു. പ്രതിയുടെ ജാമ്യാപേക്ഷയില് സെഷന്സ് കോടതി വാദം കേട്ടു. രണ്ടാം പ്രതിക്ക് ജാമ്യം നല്കിയാല് തെളിവ് നശിപ്പിക്കാന് സാധ്യതയുണ്ട് എന്നതടക്കം പ്രോസിക്യൂഷന് കോടതിയില് അറിയിച്ചിരുന്നു.