പ്രൈം വോളി: കേരള ഡര്‍ബിയില്‍ വിജയം കൊത്തിയെടുത്ത് കൊച്ചി ബ്ലൂ സ്‌പൈക്കേഴ്‌സ്

കൊച്ചി | രുപെ പ്രൈം വോളി ബോൾ ലീഗിൽ കേരള ടീമുകളായ കാലിക്കറ്റ് ഹീറോസും കൊച്ചി ബ്ലൂ സ്‌പൈക്കേഴ്‌സും കൊന്പുകോര്‍ത്തപ്പോള്‍ ആവേശം കത്തിക്കയറി. കൊച്ചി റീജ്യനല്‍ സ്‌പോര്‍ട്‌സ് സെന്ററില്‍ നടന്ന ആവേശ മത്സരത്തില്‍ 3-2 എന്ന സ്‌കോറിനാണ്  ആതിഥേയരായ കൊച്ചി ബ്ലൂ സ്‌പൈക്കേഴ്‌സ് വിജയം കൊത്തിയെടുത്തത്.

കാണിക്കൂട്ടത്തിന് ആവേശം പകരാന്‍ മലയാളി ക്രിക്കറ്റ് താരം സംഞ്ജു സാംസണ്‍ ഉള്‍പ്പെടെയുള്ളവര്‍ ഗ്യാലറിയിലെത്തിയിരുന്നു.

ആദ്യ സെറ്റില്‍ 15-13ന് പരാജയപ്പെട്ട കാലിക്കറ്റ് ഹീറോസ് രണ്ടാം സെറ്റില്‍ തിരിച്ചുവന്നു. 14-15ന് ആണ് കാലിക്കറ്റ് ഹീറോസ് കൊച്ചിന്‍ ബ്ലൂ സ്‌പൈക്കേഴ്‌സിനെ രണ്ടാം സെറ്റില്‍ പരാജയപ്പെടുത്തിയത്. മൂന്നാം സെറ്റിലും കാലിക്കറ്റ് ഹീറോസ് വിജയം തുടര്‍ന്നു. 12- 15നായിരുന്നു കാലിക്കറ്റിന്റെ രണ്ടാം വിജയം.

എന്നാല്‍, നാലാം സെറ്റില്‍ കൊച്ചിയുടെ തിരിച്ചുവരവും പടയോട്ടവുമാണ് കണ്ടത്. സെറ്റ് 15-7നാണ് കൊച്ചി തട്ടിയെടുത്തത്. രണ്ട് സെറ്റുകൾ ഇരു ടീമുകളും വിജയിച്ചതോടെ നിര്‍ണായകമായ അഞ്ചാം സെറ്റ് അക്ഷരാര്‍ഥത്തില്‍ ഡെര്‍ബിയായി മാറി.

മുന്നില്‍ നിന്ന ശേഷം പിന്നിലേക്ക് പോയ കാലിക്കറ്റ് ഹീറോസ് ഒടുവില്‍ പരാജയം രുചിച്ചു. 15- 11 എന്ന സ്‌കോറിനാണ് കൊച്ചിക്കാരുടെ തിരിച്ചു വരവും വിജയവും. ഇതോടെ, 3-2 എന്ന സ്കോറിന് കൊച്ചി കീഴടക്കി.