ബാഗേജിന് കനം കൂടുതലാണല്ലോ എന്ന് ചോദിച്ചത് ഇഷ്ടമായില്ല; ബോംബാണെന്ന് മറുപടി, കോഴിക്കോട് സ്വദേശിയുടെ യാത്ര മുടങ്ങി

കൊച്ചി| നെടുമ്പാശ്ശേരി വിമാനത്താവളത്തില്‍ ബാഗേജില്‍ കനം കൂടുതലാണല്ലോ എന്ന് ചോദിച്ചത് ഇഷ്ടപ്പെടാതെ ബോംബാണെന്ന് മറുപടി പറഞ്ഞ കോഴിക്കോട് സ്വദേശിയുടെ യാത്ര മുടങ്ങി. ഇന്നലെ രാത്രി 11.30 ന് കോലാലംപൂരിലേക്ക് പുറപ്പെട്ട തായ് എയര്‍ വിമാനത്തില്‍ യാത്ര ചെയ്യാനെത്തിയ റഷീദിന്റെ യാത്രയാണ് മുടങ്ങിയത്. സംഭവത്തില്‍ റഷീദിനെതിരെ പോലീസ് കേസ് എടുത്തു.

ലഗേജില്‍ നിശ്ചിത പരിധിയില്‍ കൂടുതല്‍ സാധനങ്ങളുണ്ടായാല്‍ ഒഴിവാക്കാന്‍ അധികൃതര്‍ ആവശ്യപ്പെടാറുണ്ട്. ഈ ചോദ്യം ഇഷ്ടപ്പെടാതിരുന്ന യാത്രക്കാരന്റെ ഒറ്റ മറുപടിയാണ് യാത്ര മുടങ്ങാന്‍ കാരണം. ബോംബ് ഭീഷണിയുണ്ടായാല്‍ അടിയന്തരമായി റിപ്പോര്‍ട്ട് ചെയ്യണമെന്ന വ്യോമയാന നിയമത്തിന്റെ അടിസ്ഥാനത്തിലാണ് സംഭവത്തില്‍ നടപടിയെന്ന് വിമാനത്താവള അധികൃതര്‍ വ്യക്തമാക്കി.