Malappuram
തൊഴില്‍ പ്രതിസന്ധി; സഊദിയില്‍ കുടുങ്ങിയ മലയാളി യുവാവ് ഐ സി എഫിന്റെ ഇടപെടലില്‍ നാടണഞ്ഞു
മലപ്പുറം കാരാട് സ്വദേശിയായ ഇല്ലത്ത് റാഫിക്കാണ് ഐ സി എഫ് യാംബു സെന്‍ട്രല്‍ വെല്‍ഫെയര്‍ കമ്മിറ്റി പ്രസിഡന്റായ മുഹമ്മദലി കുറുക്കോളിന്റെ ഇടപെടലില്‍ നാട്ടിലെത്താനായത്.
റഹീമിനുള്ള വിമാന ടിക്കറ്റ് ഐ സി എഫ് സെന്‍ട്രല്‍ ദഅ്‌വാ പ്രസിഡന്റ് ഫിറോസ് മിസ്ബാഹി ഐ സി എഫ് വെല്‍ഫെയര്‍ സെക്രട്ടറി മുഹമ്മദലി കുറുക്കോളിന് കൈമാറുന്നു.
യാംബു | തൊഴില്‍ പ്രതിസന്ധിയിലും നിയമക്കുരുക്കിലും പെട്ട് നാട്ടില്‍ പോകാന്‍ കഴിയാത്ത മലയാളി യുവാവിന് ഐ സി എഫിന്റെ ഇടപെടലില്‍ ഒടുവില്‍ നാടണയാനായി. മലപ്പുറം കാരാട് സ്വദേശിയായ ഇല്ലത്ത് റാഫിക്കാണ് ആറുവര്‍ഷത്തിനു ശേഷം ഐ സി എഫ് യാംബു സെന്‍ട്രല്‍ വെല്‍ഫെയര്‍ കമ്മിറ്റി പ്രസിഡന്റായ മുഹമ്മദലി കുറുക്കോളിന്റെ ഇടപെടലില്‍ നാട്ടിലെത്താനായത്. വര്‍ഷങ്ങള്‍ ബൂഫിയയില്‍ ജീവനക്കാരനായി പ്രവാസ ജീവിതം തുടങ്ങിയ റാഫിയുടെ സ്‌പോണ്‍സര്‍ സ്ഥാപനം ഒഴിവാക്കിയതോടെയാണ് പ്രതിസന്ധിയില്‍ അകപ്പെടുന്നത്.
യാംബുവിലും മക്കയിലുമായി ബൂഫിയയിലും മറ്റും ചില്ലറ ജോലി ചെയ്തു വരികയായിരുന്ന റാഫിയെ സ്‌പോണ്‍സര്‍ ‘ഹുറൂബ്’ കൂടി ആക്കിയതോടെ താമസ രേഖ മാറ്റുവാനോ നിയമ പ്രകാരം മറ്റൊരു സ്ഥാപനത്തില്‍ ജോലി ചെയ്യാനോ കഴിയാതെ വന്നു. റാഫി അകപ്പെട്ട പ്രതിസന്ധി പരിഹരിക്കാന്‍ ജിദ്ദയിലും മറ്റുമുള്ള പല സാമൂഹിക പ്രവര്‍ത്തകരും ഇടപെട്ടുവെങ്കിലും പരിഹരിക്കാനായില്ല.
ഇതിനിടയിലാണ് നാലു മാസങ്ങള്‍ക്കു മുമ്പ് മുഹമ്മദലിയുടെ ശ്രദ്ധയില്‍ റാഫിയുടെ പ്രശ്‌നം എത്തിയത്. വ്യക്തിപരമായി ബന്ധമുള്ള യാംബുവിലെ ഒരു ഉയര്‍ന്ന പോലീസ് ഉദ്യോഗസ്ഥനുമായി മുഹമ്മദലി, വിഷയം ചര്‍ച്ച ചെയ്തതോടെയാണ് പരിഹാരമാര്‍ഗം തെളിഞ്ഞത്. പോലീസ് ഉദ്യോഗസ്ഥന്റെ നിര്‍ദേശപ്രകരം യാംബു ‘തര്‍ഹീല്‍’ വഴി റാഫിയെ നാട്ടിലേക്കയക്കാനുള്ള മാര്‍ഗങ്ങള്‍ സ്വീകരിക്കുകയായിരുന്നു.
കുറച്ച് ദിവസങ്ങള്‍ക്ക് മുമ്പു തന്നെ നാട്ടിലേക്ക് പോകാന്‍ നടപടികള്‍ പൂര്‍ത്തിയാക്കിയ റാഫിയെ പോലീസ് തര്‍ഹീലില്‍ നിന്ന് വിമാനത്താവളത്തിലെത്തിച്ചുവെങ്കിലും വൈകിയതിനാല്‍ അന്ന് ‘ബോര്‍ഡിങ് പാസ്’ എടുക്കാന്‍ കഴിയാതെ വീണ്ടും തര്‍ഹീലിലേക്ക് തന്നെ മടങ്ങേണ്ടിവന്നു. മുഹമ്മദലിയുടെ ഇടപെടലില്‍ പിന്നീട് വെള്ളിയാഴ്ചത്തേക്ക് വിമാനടിക്കറ്റ് മാറ്റിയെടുക്കുകയും പോലീസ് അതിന് വേണ്ട നടപടികള്‍ പൂര്‍ത്തിയാക്കുകയും ചെയ്യുകയായിരുന്നു. ഇന്ത്യന്‍ കള്‍ച്ചറല്‍ ഫൗണ്ടേഷന്‍ (ഐ സി എഫ്) യാംബു സെന്‍ട്രല്‍ കമ്മിറ്റിയാണ് റാഫിക്ക് നാട്ടിലേക്കുള്ള വിമാനടിക്കറ്റ് എടുത്തുകൊടുത്തത്. വര്‍ഷങ്ങളുടെ ദുരിതപൂര്‍ണമായ പ്രവാസത്തിനിടയില്‍ വിവിധ രീതിയില്‍ സഹായങ്ങള്‍ നല്‍കിയ സുമനസ്സുകളായ സന്നദ്ധ പ്രവര്‍ത്തകര്‍ക്ക് നന്ദി പറഞ്ഞ് റാഫി വെള്ളിയാഴ്ച വൈകിട്ട് നാട്ടിലെത്തി.
Latest
ചേലക്കരയെ വീണ്ടും ചുവപ്പിച്ചു; ചേലോടെ പ്രദീപ്
ടിപ്പർ ലോറി സൈക്കിളിൽ ഇടിച്ച് മദ്റസ വിദ്യാർഥി മരിച്ചു
ഇടതു കോട്ട കാത്ത് യു ആര്‍ പ്രദീപ്
മഹാരാഷ്ട്രയില്‍ തുടര്‍ഭരണം ഉറപ്പിച്ച് ബിജെപി മുന്നണി മഹായുതി; ഝാര്‍ഖണ്ഡില്‍ ഇന്ത്യ മുന്നണിക്ക് നേട്ടം
രാഹുലിന് റെക്കോര്‍ഡ് ഭൂരിപക്ഷം; ബി ജെ പി കോട്ടകള്‍ തകര്‍ന്നു, മൂന്നാം സ്ഥാനത്തേക്ക് തള്ളപ്പെട്ട് സരിന്‍
ബംഗാള്‍ ഉപതെരഞ്ഞെടുപ്പ്: ആറ് സീറ്റുകളിലും തൃണമൂല്‍ കോണ്‍ഗ്രസിന് ലീഡ്
