Kerala
കോട്ടയത്ത് ഉരുൾപൊട്ടൽ; വ്യാപക നാശനഷ്ടം,ഏഴ് വീടുകള് തകര്ന്നു
ഇലവീഴാപൂഞ്ചിറ, ഇല്ലിക്കല്കല്ല്, മാര്മല അരുവി തുടങ്ങിയ വിനോദസഞ്ചാര കേന്ദ്രങ്ങളിലേക്കുള്ള പ്രവേശനവും ഈരാറ്റുപേട്ട-വാഗമണ് റോഡിലെ രാത്രികാലയാത്രയും നിരോധിച്ചു.
![](https://assets.sirajlive.com/2024/05/landslideko-897x538.jpg)
കോട്ടയം | കോട്ടയത്ത് കനത്ത മഴ തുടരുന്നു. ഭരണങ്ങാനം വില്ലേജിലെ ഇടമറുക് ചൊക്കല്ല് ഭാഗത്ത് ഉരുള് പൊട്ടിലില് വ്യാപകനാശനഷ്ടമുണ്ടായി. ഇവിടുത്തെ ഏഴ് വീടുകള് ഉരുള്പ്പൊട്ടലില് തകര്ന്നു. ആളപായമില്ല.
മീനച്ചില് താലൂക്കിലെ മലയോരമേഖലകളില് പലയിടത്തും മണ്ണിടിച്ചില് ഉണ്ടായി. ഈരാറ്റുപേട്ട നടക്കലില് താഴ്ന്ന പ്രദേശങ്ങള് വെള്ളത്തിലായി.ഇതേ തുടര്ന്ന് നിരവധി കുടുംബങ്ങളെ മാറ്റിപ്പാര്പ്പിച്ചു.
ജില്ലയിലെ പടിഞ്ഞാറന് മേഖലയിലും മലയോരമേഖലയിലും കനത്ത മഴ തുടരുകയാണ്. മഴ ശക്തമായി തുടരുന്ന സാഹചര്യത്തില് ഇലവീഴാപൂഞ്ചിറ, ഇല്ലിക്കല്കല്ല്, മാര്മല അരുവി തുടങ്ങിയ വിനോദസഞ്ചാര കേന്ദ്രങ്ങളിലേക്കുള്ള പ്രവേശനവും ഈരാറ്റുപേട്ട-വാഗമണ് റോഡിലെ രാത്രികാലയാത്രയും നിരോധിച്ചു.
മീനച്ചിലാറിന്റെ ജലനിരപ്പ് ഉയരുന്ന സാഹചര്യത്തില് ഇരുകരകളിലുള്ളവരും ജാഗ്രത പാലിക്കണമെന്നും കലക്ടറുടെ നിര്ദേശമുണ്ട്. ശക്തമായ മഴ കണക്കിലെടുത്ത് ജില്ലയില് ഇന്ന് റെഡ് അലര്ട്ട് പ്രഖ്യാപിച്ചിരിക്കുകയാണ്.