ഷാരൂഖ് ഖാനും മമ്മൂട്ടിക്കും ലീഗ് മെമ്പർഷിപ്പ്; അബദ്ധം തിരുവനന്തപുരത്ത്

തിരുവനന്തപുരം | മുസ്ലിം ലീഗിൻ്റെ അംഗത്വ വിതരണം പൂർത്തിയായപ്പോൾ സിനിമാ നടന്മാർക്കും നടിമാർക്കും വരെ മെമ്പർഷിപ്പ്. ഷാരൂഖ് ഖാൻ, മമ്മൂട്ടി, ആസിഫ് അലി, മിയ ഖലീഫ എന്നിവർ ലീഗിൻ്റെ അംഗത്വ പട്ടികയിലുണ്ട്. തിരുവനന്തപുരം നേമം മണ്ഡലത്തിൽ കളിപ്പാൻകുളം വാർഡിലാണ് ഇവരുടെ അംഗത്വം രേഖപ്പെടുത്തിയത്.

ഓൺലൈൻ വഴി അംഗത്വം നേടിയവരുടെ പട്ടിക വന്നപ്പോഴാണ് അബദ്ധം മനസ്സിലായത്. സാധാരണ പാർട്ടി അംഗങ്ങൾ തന്നെയാണ് അംഗത്വവിതരണം നടത്തുന്നതെങ്കിലും ആൾബലമില്ലാത്ത സ്ഥലത്ത് കംപ്യൂട്ടർ സെന്ററുകളെ എൽപിച്ചവരുണ്ടെന്ന് ഒരു വിഭാഗം പറയുന്നു. വീടുകൾതോറും കയറിയിറങ്ങി അംഗത്വ വിതരണം നടത്താനാണു സംസ്ഥാന നേതൃത്വം നിർദേശിച്ചിരുന്നത്. ഇങ്ങനെ അംഗങ്ങളാകുന്നവർ ഓൺലൈനിൽ പേരും ആധാർ നമ്പറും തിരഞ്ഞെടുപ്പു തിരിച്ചറിയൽ കാർഡ് നമ്പറും ഫോൺ നമ്പറും അപ്‌ലോഡ് ചെയ്യണം. ഓരോ വാർഡിനും ഓരോ പാസ്‌വേഡും നൽകിയിരുന്നു. കോഴിക്കോട്ടുള്ള ഐടി കോ ഓർഡിനേറ്റർക്കേ പിന്നീട് ഇതു തുറന്നു പരിശോധിക്കാൻ കഴിയൂ.

കേരളത്തിൽ ലീഗിന്റെ അംഗത്വ വിതരണം കഴിഞ്ഞ 31നാണ് അവസാനിച്ചത്. സംസ്ഥാനത്ത് ലീഗിന്റെ അംഗസംഖ്യ 24.33 ലക്ഷം ആയെന്നാണു കണക്ക്. 2016നെക്കാൾ 2.33 ലക്ഷം അംഗങ്ങളുടെ വർധന. അംഗങ്ങളിൽ പകുതിയിലേറെ സ്ത്രീകളാണ്.