പള്ളി തർക്കത്തിലെ നിയമനിർമാണം: ഓർത്തഡോക്സ് സഭ സി പി എം നേതൃത്വത്തെ കണ്ടു

സുപ്രീം കോടതി വിധിക്കെതിരെ നിയമനിർമാണം നടത്തുന്നത് സര്‍ക്കാറിന്റെ പക്ഷപാത നിലപാടാണെന്ന് ആരോപിച്ച് ഓര്‍ത്തഡോക്സ് സഭ കഴിഞ്ഞ ദിവസം തിരുവനന്തപുരം പാളയം സെന്റ്ജോര്‍ജ് ഓര്‍ത്തഡോക്സ് കത്തീഡ്രല്‍ പള്ളിയില്‍ ഉപവാസ പ്രാർഥനാ യജ്ഞം നടത്തിയിരുന്നു. സഭയിലെ മെത്രാപ്പോലീത്തമാരും വൈദീകരും പങ്കെടുക്കുന്ന പ്രാര്‍ഥനാ യജ്ഞം രാവിലെ ഒമ്പതിന് ആരംഭിച്ച് ഉച്ചയോടെ സമാപിച്ചു.

നിയമനിർമാണം നടത്തുന്നതിനുള്ള കരട് പ്രമേയം ഇടത് മുന്നണി യോഗം അംഗീകരിച്ച പശ്ചാത്തലത്തിലാണ് പ്രതിഷേധ സമരം സംഘടിപ്പിച്ചത്. നിയമനിര്‍മാണം എന്ന് കേട്ടപ്പോള്‍ തന്നെ സമാധാനപരമായി ഭരണം നടത്തപ്പെട്ട പള്ളികളില്‍ സംഘര്‍ഷം അരങ്ങേറുന്ന സാഹചര്യം ഉടലെടുത്തതായി ഓര്‍ത്തഡോക്സ് സഭാ വൃത്തങ്ങള്‍ പറഞ്ഞു. വിവിധ ദേവാലയങ്ങളിലേക്ക് സംഘര്‍ഷം വ്യാപിക്കാതിരിക്കാൻ തീരുമാനത്തില്‍ നിന്ന് പിന്തിരിയണമെന്ന് സഭ ആവശ്യപ്പെട്ടു.
കഴിഞ്ഞ ദിവസം സഭയിലെ എല്ലാ ദേവാലയങ്ങളിലും നിയമനിർമാണത്തിനെതിരെ പ്രതിഷേധ പ്രമേയം വായിച്ച് പാസ്സാക്കിയിരുന്നു.